ໃນຕອນເຊົ້າຂອງວັນທີ 31 ຕຸລາ 2023 ນີ້, ທ່ານ ມີນາໄຊ ພິລາວົງ ຫົວໜ້າສູນອິນເຕີເນັດ ແຫ່ງຊາດ (ສອຊ)  ໄດ້ຕ້ອນຮັບການເຂົ້າຢ້ຽມຢາມ ຂອງຄະນະຜູ້ຊ່ຽວຊານຈາກ ສະຖາບັນການພັດທະນາເກົາຫຼີ (KDI) ແລະ ປະຊຸມປຶກສາຫາລື ກ່ຽວກັບໂຄງການ ທີ່ປຶກສາເພື່ອຍົກລະດັບ ລະບົບອອກໃບຮັບຮອງລາຍເຊັນເອເລັກໂຕຣນິກ ຂອງ ສປປ ລາວ. ໂຄງການດັ່ງກ່າວນີ້ ເປັນໂຄງການຊ່ວຍເຫຼືອຫຼ້າ (ODA) ໃນນາມຂອງລັດຖະບານເກົາຫຼີ ໃນແຄັມເປນ 2023/24 Knowledge Sharing Program (KSP) ໃນຫົວຂໍ້ Consultation for Improvement of Lao National Certificate Authentication’ ທີ່ທາງ ສອຊ ໄດ້ຂຽນໂຄງການສະເໜີຂໍການຊ່ວຍເຫຼືອໄປ ໃນປີ 2021, ປັດຈຸບັນ ໄດ້ຖືກອະນຸມັດ ແລະ ຈະເລີ່ມຈັດຕັ້ງປະຕິບັດໃນສົກປີ 2023-2024.

ສອຊ ແມ່ນໄດ້ ເລີ່ມສ້າງຕັ້ງສູນຮັບຮອງລາຍເຊັນເອເລັກໂຕຣນິກ ແຫ່ງຊາດ (NRCA) ຕັ້ງແຕ່ປີ 2018, ແຕ່ ການຮັບຮອງທາງເອເລັກໂຕຣນິກ ແມ່ນຍັງເປັນສິ່ງທີ່ໃຫມ່ ແລະ ເປັນສິ່ງທີ່ທ້າທາຍ ສຳລັບ ສປປ ລາວ ເຊິ່ງເປັນປະເທດທີ່ກຳລັງພັດທະນາ. ໃນຍຸກດິຈິຕ໋ອນນີ້ ການຮັບຮອງຄວາມຖືກຕ້ອງທາງເອເລັກໂຕຣນິກ ແມ່ນສຳຄັນຫຼາຍ ໂດຍສະເພາະການເຮັດທຸລະກຳຜ່ານອິນເຕີເນັດ. ສອຊ ແມ່ນເຫັນໄດ້ເຖິງຈຳເປັນ ແລະ ຄວາມປອດໄພຂອງການນຳໃຊ້ຂໍ້ມຸນຂ່າວສານຜ່ານອິນເຕີເນັດ ຈິ່ງໄດ້ສ້າງສູນຮັບຮອງລາຍເຊັນເອເລັກໂຕຣນິກ ແຫ່ງຊາດ ຂຶ້ນມາເພື່ອເປັນສື່ສານໃນການຮັບຮອງຄວາມຖືກຕ້ອງທາງເອເລັກໂຕຣນີກ ແລະ ຈະສືບຕໍ່ພັດທະນາໃຫ້ລະບົບດັ່ງກ່າວ ມີປະສິດທິພາບທຽບເທົ່າສາກົນ. 

ໂຄງການ ທີ່ປຶກສາເພື່ອຍົກລະດັບ ລະບົບອອກໃບຮັບຮອງລາຍເຊັນເອເລັກໂຕຣນິກ ຂອງ ສປປ ລາວນີ້ ບໍ່ພຽງແຕ່ມີຈຸດປະສົງ ເພື່ອຍົກລະດັບລະບົບອອກໃບຮັບຮອງລາຍເຊັນເອເລັກໂຕຣນິກ (CA) ຂອງລາວ ໃຫ້ມີປະສິດທິພາບສູງຂຶ້ນ ແຕ່ຍັງເປັນອີກໜຶ່ງໂຄງການ ທີ່ໄດ້ປະກອບສ່ວນອັນສຳຄັນ ການໃນສ້າງສາພັດທະນາປະເທດຊາດ ໃນດ້ານການຫັນເປັນດິຈິຕອນ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ລະຫວ່າງ 2 ປະເທດ ໃຫ້ມີຄວາມແໜ້ນແຟ້ນຍິ່ງຂຶ້ນ.

ພາບ ແລະ ຂ່າວ: ສອຊ