ໃນວັນທີ 07 ພະຈິກ 2024 ຜ່ານມານີ້, ທີ່ ຫ້ອງວ່າການແຂວງສະຫວັນນະເຂດ, ຫ້ອງການກອງເລຂາຄະນະກໍາມະການຄຸ້ມຄອງອິນເຕີເນັດ ແຫ່ງຊາດ, ກະຊວງເຕັກໂນໂລຊີ ແລະ ການສື່ສານ ໄດ້ຈັດກອງປະຊຸມຝຶກອົບຮົມສ້າງຄວາມເຂັ້ມແຂງ ຄະນະກຳມະການຄຸ້ມຄອງ ອິນເຕີເນັດ ຂັ້ນແຂວງ 3 ແຂວງສະຫວັນນະເຂດ, ສາລະວັນ ແລະ ເຊກອງ ໂດຍການເປັນປະທານຮ່ວມ ຂອງ ທ່ານ ແກ້ວວີສຸກ ໂສລະພົມ, ຮອງລັັັດຖະມົນຕີ ກະຊວງເຕັກໂນໂລຊີ ແລະ ການສື່ສານ, ຮອງປະທານ ຄະນະກຳມະການຄຸ້ມຄອງອິນເຕີເນັດແຫ່ງຊາດ (ຄຄອຊ) ແລະ ທ່ານ ປອ. ແສນສັກ ສຸລິສັກ, ຮອງເຈົ້າແຂວງ, ປະທານຄະນະກຳມະການຄຸ້ມຄອງອິນເຕີເນັດແຂວງສະຫວັນນະເຂດ. ມີບັນດາທ່ານວິທະຍາກອນ ຈາກພາກສ່ວນກ່ຽວຂ້ອງ ຄະນະກຳມະການຄຸ້ມຄອງອິນເຕີເນັດແຫ່ງຊາດ, ພ້ອມດ້ວຍບັນດາຄະນະກຳມະການຄຸ້ມຄອງອິນເຕີເນັດ ຂັ້ນແຂວງ 3 ແຂວງ: ສະຫວັນນະເຂດ, ສາລະວັນ ແລະ ເຊກອງ, ເຂົ້າຮ່ວມຢ່າງພ້ອມພຽງ.

ໃນໂອກາດນີ້, ປະທານຮ່ວມກອງປະຊຸມ ທ່ານ ແສນສັກ ສຸລິສັກ ຮອງເຈົ້າແຂວງ ສະຫວັນນະເຂດ, ປະທານ ຄຄອຂ ສະຫວັນນະເຂດ ຍັງປະກອບຄໍາເຫັນ ໃນການລົງມາຈັດຝຶກອົບຮົມ ສ້າງຄວາມເຂັ້ມແຂງໃຫ້ແກ່ ຄຄອຂ ແມ່ນມີຄວາມໝາຍຄວາມສໍາຄັນຕໍ່ການສ້າງຄວາມເຂົ້າໃຈກົນໄກການຕອບໂຕ້ສື່ສັງຄົມອອນລາຍ, ທັງເສີມສ້າງທັກສະ, ປູກຈິດສໍານຶກໃນວຽກງານຄວາມປອດໄພທາງໄຊເບີ ເພື່ອເປັນການສ້າງຄວາມອາດສາມາດໃນຂະແໜງການເຂົ້າໃຈໄພຄຸກຄາມ ແລະ ໄພອັນຕະລາຍຕ່າງໆ ເພື່ອນໍາໄປເຜິຍແຜ່ຄວາມຮູ້, ແກ່ສັງຄົມ ເພື່ອຫຼຸດຜ່ອນຄວາມສ່ຽງຕ່າງໆ ທີ່ອາດເກີດຂຶ້ນກັບຕົນ, ການຈັດຕັ້ງ ແລະ ສັງຄົມ ໂດຍສະເພາະການຈັດຕັ້ງປະຕິບັດວຽກງານຄຸ້ມຄອງອິນເຕີເນັດຂັ້ນແຂວງ ກໍຄືວຽກງານຫັນເປັນດິຈິຕອນ ໃຫ້ນັບມື້ດີຂຶ້ນເທື່ອລະກ້າວ.

ທ່ານ ແກ້ວວີສຸກ ໂສລະພົມ ຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ, ຮອງປະທານ ຄຄອຊ ໄດ້ຍົກໃຫ້ເຫັນເຖິງຄວາມໝາຍ ຄວາມສຳຄັນ ແລະ ຄວາມເອົາໃຈໃສ່ຢ່າງເປັນເອກະພາບ ຕໍ່ກັບວຽກງານຄ້ມຄອງອິນເຕີເນັດພາຍໃນ 3 ແຂວງ: ສະຫວັນນະເຂດ, ສາລະວັນ ແລະ ເຊກອງ, ກໍ່ຄື ການພັດທະນາວຽກການຄຸ້ມຄອງ, ການພັດທະນາ ແລະ ການນໍາໃຊ້ ອິນເຕີເນັດ, ເຕັກໂນໂລຊີການສື່ສານຂໍ້ມູນຂ່າວສານ ເຂົ້າໃນການຈັດຕັ້ງປະຕິບັດວຽກງານ, ການດຳເນີນທຸລະກິດ, ການດຳລົງຊີວິດ, ການຕິດຕໍ່ພົວພັນ ຂອງສັງຄົມ ຕ່າງໆ, ຍິ່ງເຫັນໄດ້ແຈ້ງ ເຖິງຄວາມສໍາຄັນ ແລະ ຄວາມຈຳເປັນຂອງ ອິນເຕີເນັດ. ແຕ່ຄຽງຄູ່ກັບຜົນປະໂຫຍດອັນມະຫາສານຈາກ ອິນເຕີເນັດ, ກໍ່ເຫັນໄດ້ແຈ້ງບັນຫາ ແລະ ສິ່ງທ້າທາຍຕ່າງໆ, ໂດຍສະເພາະ ແມ່ນການນໍາໃຊ້ສື່ສັງຄົມອອນລາຍ ແລະ ການນຳໃຊ້ອິນເຕີເນັດ ໄປໃນທາງທີ່ບໍ່ດີ. ຄະນະປະທານ ຍັງໄດ້ເນັ້ນຢ້ຳກ່ຽວກັບ ການຫັນເປັນດີຈີຕອນຂອງ ສປປ ລາວ ຊຶ່ງຖືເປັນອັນລວມ ທີ່ມີພື້ນຖານໂຄງລ່າງຈາກການພັດທະນາອິນເຕີເນັດ, ຊຶ່ງມັນໄດ້ຊຸກຍູ້ການເຕີບໂຕທາງດ້ານເສດຖະກິດ ຢູ່ ສປປ ລາວ ຢ່າງແຂງແຮງ ໂດຍສະເພາະພາຍຫຼັງການລະບາດຂອງໂລກພະຍາດໂຄວິດ-19, ທີ່ເຮັດໃຫ້ທຸກພາກສ່ວນເຫັນເຖິງຄວາມສຳຄັນຂອງການພັດທະນາ ແລະ ນຳໃຊ້ເຕັກໂນໂລຊີການສື່ສານ ແລະ ດິຈິຕອນຢູ່ທຸກຂົງເຂດ. ການຫັນປ່ຽນທາງດ້ານດິຈິຕອນໃນ ສປປ ລາວ ຈະຊ່ວຍໃຫ້ການຄ້າ, ການຊໍາລະແບບບໍ່ໃຊ້ເງິນສົດ ແລະ ການໃຫ້ບໍລິການສາທາລະນະ ມີປະສິດທິພາບຫຼາຍຂຶ້ນ.

ໃນກອງປະຊຸມຝຶກອົບຮົມຄັ້ງນີ້, ຍັງໄດ້ຮັບຟັງການບັນຍາຍຂອງວິທະຍາກອນຈາກບັນດາ ກົມ, ສູນ ກ່ຽວຂ້ອງພາຍໃນ ຄຄອຊ ໃນຫຼາຍຫົວຂໍ້ ຄື: ພາລະບົດບາດ ຂອງ ຄຄອຊ ແລະ ການຄຸ້ມຄອງຂໍ້ມູນຂ່າວສານຜ່ານອິນເຕີເນັດ ນໍາສະເໜີໂດຍທ່ານ ມີນາໄຊ ພິລາວົງ, ຫົວໜ້າສູນອິນເຕີເນັດແຫ່ງຊາດ, ຫົວໜ້າຫ້ອງການກອງເລຂາ ຄຄອຊ; ການໃຫ້ຄວາມຮູ້ກ່ຽວກັບການກວດສອບຂ່າວປອມ ແລະ ຂັ້ນຕອນການແຈ້ງຄວາມ ສະເໜີໂດຍ ທ່ານ ພັທ. ເສີດ ທຳມະວົງ, ຮອງຫົວໜ້າກົມສືບສວນ-ສອບສວນ, ກົມໃຫຍ່ຕໍາຫຼວດ, ກະຊວງປ້ອງກັນຄວາມສະຫງົບ; ການຄົ້ນຫາຂໍ້ມູນ, ແກ້ໄຂບັນຫາທາງສື່ສັງຄົມອອນລາຍ ສະເໜີໂດຍ ທ່ານ ສຸລິສັກ ໄຊຍະແສງ, ຫົວໜ້າພະແນກ, ກົມຄວາມປອດໄພໄຊເບີ, ກະຊວງ ຕສ, ສະຕິຕໍ່ການບໍ່ໃຫ້ຖືກຫລອກລວງທາງ ອອນລາຍ (Scams online) ສະເໜີໂດຍທ່ານ ອາເລັກໄຊ ສີພອນ, ຫົວໜ້າພະແນກກົມຄວາມປອດໄພໄຊເບີ, ກຕສ; ການຈັດຕັ້ງປະຕິບັດວຽກງານຂ່າວສານ ແລະ ວຽກງານຖະແຫຼງຂ່າວ ສະເໜີໂດຍທ່ານ ນາງ ຄໍາບິກ ສຸຂັນທາ, ຮອງຫົວໜ້າພະແນກ ກົມປະຊາສໍາພັນ, ຫ້ອງວ່າການສຳນັກງານນາຍຍົກລັດຖະມົນຕີ.

ຜູ້ເຂົ້າຮ່ວມ ໄດ້ຮ່ວມກັນ ປຶກສາຫາລື ແລກປ່ຽນຄຳຄິດຄຳເຫັນ ຢ່າງກົງໄປກົງມາ ກ່ຽວກັບວຽກງານຄຸ້ມຄອງອິນເຕີເນັດ ພາຍໃນແຂວງຂອງຕົນ ກໍຄືພາຍໃນປະເທດ ແລະ ຂອງປະເທດອ້ອມຂ້າງ, ວິທີການປະສານງານລະຫວ່າງ ຄຄອຊ ແລະ ຄຄອຂ, ລວມທັງຂໍ້ສະດວກ ແລະ ຂໍ້ຫຍຸ້ງຍາກ ໃນການຈັດຕັ້ງປະຕິບັດວຽກງານດັ່ງກ່າວ ເພື່ອໃຫ້ມີກົນໄກການປະສານງານໂລ່ງລ່ຽນ, ການແກ້ໄຂບັນຫາ ແລະ ການໃຫ້ຂໍ້ມູນຂ່າວສານທີ່ຖືກຕ້ອງ ແລະ ທັນສະພາບການ.

ພ້ອມດຽວກັນນັ້ນ ກໍ່ໄດ້ມີ ພິທີມອບອຸປະກອນຄອມພິວເຕີ ໂດຍ ທ່ານ ແກ້ວວີສຸກ ໂສລະພົມ, ຮອງລັັັດຖະມົນຕີ ກະຊວງເຕັກໂນໂລຊີ ແລະ ການສື່ສານ, ຮອງປະທານ ຄຄອຊ, ມອບໃຫ້ ຄະນະກໍາມະການຄຸ້ມຄອງອິນເຕີ ຂັ້ນແຂວງ 3 ແຂວງ: ສະຫວັນນະເຂດ, ສາລະວັນ ແລະ ເຊກອງ, ພາກສ່ວນລະ 3 ຊຸດ/ແຂວງ ເປັນມູນຄ່າ 37,500,000 ກີບ ເພື່ອຮັບໃຊ້ເຂົ້າໃນວຽກງານຄຸ້ມຄອງອິນເຕີເນັດແຂວງຂອງຕົນ.