ໃນຕອນບ່າຍຂອງວັນທີ 06 ພະຈິກ 2024, ຄະນະກຳມະການຄຸ້ມຄອງອິນເຕີເນັດແຫ່ງຊາດ ແລະ ກະຊວງ ເຕັກໂນໂລຊີ ແລະ ການສື່ສານ ເຄື່ອນໄຫວຊຸກຍູ້ວຽກງານການເຊື່ອມຕໍ່ ລະບົບສາຍສົ່ງໂທລະຄົມມະນາຄົມ ຢູ່ແຂວງ ຄຳມ່ວນ, ນຳພາຄະນະໂດຍ ທ່ານ ແກ້ວວີສຸກ ໂສລະພົມ ຮອງລັດຖະມົນຕີ ກະຊວງ ເຕັກໂນໂລຊີ ແລະ ການສື່ສານ (ກຕສ), ຮອງປະທານ ຄະນະກຳມະການຄຸ້ມຄອງອິນເຕີເນັດແຫ່ງຊາດ (ຄຄອຊ), ພ້ອມດ້ວຍຄະນະຮັບຜິດຊອບຈາກ ຄຄອຊ ແລະ ບັນດາກົມ ທີ່ກ່ຽວຂ້ອງ ຈາກ ກະຊວງ ຕສ.  ເຂົ້າຮ່ວມເຮັດວຽກນຳຄະນະ ມີ ທ່ານ ຫວາດ ອິນຄໍາວົງ ຫົວໜ້າພະແນກ ເຕັກໂນໂລຊີ ແລະ ການສື່ສານ ແຂວງຄໍາມ່ວນ, ພ້ອມດ້ວຍ ຄະນະພະແນກ ຕສ ແຂວງ ແລະ ພະນັກງານວິຊາການ ພາຍໃນພະແນກການ.

        ທ່ານ ຫວາດ ອິນຄໍາວົງ ຫົວໜ້າພະແນກ ຕສ ແຂວງຄໍາມ່ວນ ໄດ້ລາຍງານໂດຍຫຍໍ້ ການຈັດຕັ້ງປະຕິບັດວຽກງານ ໃນດ້ານການຈັດຕັ້ງບຸກຄະລາກອນ ແລະ ນິຕິກໍາ, ວຽກງານການຄຸ້ມຄອງການສື່ສານ ແລະ ອິນເຕີເນັດ, ວຽກງານຄຸ້ມຄອງການເຊື່ອມຕໍ່ສາຍສົ່ງໂທລະຄົມມະນາຄົມ, ວຽກງານຄຸ້ມຄອງຄື້ນຄວາມຖີ່ຂ້າມຊາຍແດນ ແລະ ວຽກຂຶ້ນທະບຽນຊິມກາດ.

ໃນນີ້ ທ່ານ ແກ້ວວີສຸກ ໂສລະພົມ ຮອງລັດຖະມົນຕີ ກະຊວງ ເຕັກໂນໂລຊີ ແລະ ການສື່ສານ, ຮອງປະທານ ຄຄອຊ ປະທານກອງປະຊຸມ, ໄດ້ໂອ້ລົມ ແລະ ມີຄຳເຫັນຊີ້ນໍາໃຫ້ພະແນກການເອົາໃຈໃສ່ວຽກການຄຸ້ມຄອງຮອບດ້ານ, ໂດຍສະເພາະ ແມ່ນການເຊື່ອມຕໍ່ ລະບົບສາຍສົ່ງໂທລະຄົມມະນາຄົມ ລະຫວ່າງ ຂົວມິດຕະພາບ ລາວ-ໄທ ຢູ່ແຂວງຄຳມ່ວນ, ພ້ອມທັງ ໃຫ້ເລັ່ງຈັດຕັ້ງປະຕິບັດການຂຶ້ນທະບຽນເລກໝາຍໂທລະສັບ, ເບີໃດ ທີ່ບໍ່ຂື້ນທະບຽນ ຕ້ອງໄດ້ປິດອອກຈາກລະບົບສູນກາງໂທລະສັບມືຖື ຂອງແຕ່ລະບໍລິສັດ ເພື່ອຮັບປະກັນ ແລະ ຕອບສະໜອງຕໍ່ວຽກງານຄວາມໝັ້ນຄົງ ປກສ-ປກຊ, ການຄຸ້ມຄອງອິນເຕີເນັດແຫ່ງຊາດ. ມອບໃຫ້ ຄຄອຂ ແຂວງ ເອົາໃຈໃສ່ໃນການເປັນກອງເລຂາ ເອົາໃຈໃສ່ປະສານງານ ກອງເລຂາ ຄຄອຊ ໃຫ້ມີການເຮັດວຽກສອດຄ່ອງກັນຢ່າງທັນກັບສະພາບການ, ເປັນຕົ້ນ ບັນຫາທີ່ມີປະກົດການເກີດຂຶ້ນໃນປະຈຸບັນ ການຫຼອກລວງທາງອອນລາຍ (Online Scams), ການກໍ່ອາຊະຍາກໍາທາງຄອມພິວເຕີ ແລະ ບັນຫາອື່ນໆທີ່ເປັນບັນຫາພົ້ນເດັ່ນທີ່ເກີດຂື້ນຢູ່ໃນສັງຄົມ.

ໃນຕອນທ້າຍ ໄດ້ມີພິທີມອບອຸປະກອນຄອມພິວເຕີ ໂດຍທ່ານ ຮອງປະທານ ຄະນະກໍາມະການຄຸ້ມຄອງອິນເຕີເນັດແຫ່ງຊາດ ໃຫ້ກັບ ຄະນະກໍາມະການຄຸ້ມຄອງອິນເຕີເນັດແຂວງຄຳມ່ວນ ເປັນມູນຄ່າ 37,500,000 ກີບ ເພື່ອນໍາໃຊ້ເຂົ້າໃນວຽການຄຸ້ມຄອງອິນເຕີເນັດຂັ້ນແຂວງ ຄໍາມ່ວນ.