ໃນລະຫວ່າງວັນທີ 14-19 ຕຸລາ 2024, ສູນອິນເຕີເນັດ ແຫ່ງຊາດ, ກະຊວງເຕັກໂນໂລຊີ ແລະ ການສື່ສານ (ກຕສ), ເຊິ່ງເປັນຜູ້ຄຸ້ມຄອງວຽກງານການຮັບຮອງລາຍເຊັນເອເລັກໂຕຮນິກ ແຫ່ງຊາດ (CA) ໄດ້ເດີນທາງໄປເຮັດວຽກ ທີ່ ສສ ຫວຽດນາມ ເພື່ອແລກປ່ຽນບົດຮຽນການຄຸ້ມຄອງວຽກງານການຢັ້ງຢືນທາງເອເລັກໂຕຣນິກ ກັບບັນດາຄູ່ຮ່ວມມືຈາກ ສສ ຫວຽດນາມ, ຄະນະດັ່ງກ່າວ ແມ່ນນໍາໂດຍ ທ່ານ ໄຊສົມຫວັງ ສຸວັນນະວົງ, ຮອງຫົວໜ້າ ສູນອິນເຕີເນັດ ແຫ່ງຊາດ, ມີ ທ່ານ ນ. ນີລາເພັດ ຄຳມຸງຄຸນ, ຫົວໜ້າພະແນກ ສູນຮັບຮອງລາຍເຊັນເອເລັກໂຕຣນິກ ແຫ່ງຊາດ ພ້ອມດ້ວຍວິຊາການເຕັກນິກ ທີ່ກ່ຽວຂ້ອງ ເຂົ້າຮ່ວມ.

ຄະນະຈາກ ສູນອິນເຕີເນັດ ແຫ່ງຊາດ (LANIC) ແມ່ນໄດ້ເດີນທາງເຂົ້າຢ້ຽມຢາມ ເຮັດວຽກ ກັບ ສູນຮັບຮອງເອເລັກໂຕຣນິກ ສສ ຫວຽດນາມ (NEAC) ທີ່ນະຄອນຫຼວງຮາໂນຍ. ສູນ NEAC ເປັນຜູ້ຄຸ້ມຄອງວຽກງານການຮັບຮອງລາຍເຊັນເອເລັກໂຕຮນິກ ຂອງ ສສ ຫວຽດນາມ ເພື່ອຮ່ວມກອງປະຊຸມ ປຶກສາຫາລື ແລກບົດຮຽນການຄຸ້ມຄອງວຽກງານການຢັ້ງຢືນທາງເອເລັກໂຕຣນິກ, ທົບທວນຜົນຈັດຕັ້ງປະຕິບັດແຜນການຮ່ວມມືໃນໄລຍະຜ່ານມາ ແລະ ທິດທາງແຜນການຮ່ວມມືໃນປີ 2025 ລະຫວ່າງ LANIC ແລະ  NEAC. ຫຼັງຈາກນັ້ນ ໄດ້ເດິນທາງໄປຢ້ຽມຢາມ ແລະ ຮ່ວມກອງປະຊຸມປຶກສາຫາລື ກັບ ບໍລິສັດ VNPT-CA ເຊິ່ງເປັນບໍລິສັດຜູ້ໃຫ້ບໍລິການວຽກງານຮັບຮອງເອເລັກໂຕຣນິກ ລະດັບແຖວໜ້າຂອງ ສສ ຫວຽດນາມ ເພື່ອປຶກສາຫາລື ແຜນການຮ່ວມມືໃນການພັດທະນານຳໃຊ້ໃບຮັບຮອງເອເລັກໂຕຣນິກ ເຂົ້າໃນບັນຫາລະບົບທາງບໍລິສັດ VNPT-CA ກະກຽມພັດທະນາໃຫ້ ສປປ ລາວ, ກອງປະຊຸມດັ່ງກ່າວ ຈັດຂຶ້ນທີ່  ບໍລິສັດ VNPT-CA ນະຄອນຫຼວງ ຮາໂນຍ, ສສ ຫວຽດນາມ.

ຄະນະໄດ້ເດີນທາງໄປເຂົ້າຮ່ວມເປັນຜູ້ສັງເກດການ ໃນກອງປະຊຸມປະຈຳປີ ຂອງ ສະມາຄົມພື້ນຖານໂຄງລ່າງຄວາມປອດໄພສາທາລະນະ ຂອງອາຊີ (Asia Public Key Infrastructure Consortium, APKIC), ເຊິ່ງກອງປະຊຸມດັ່ງກ່າວ ແມ່ນຈັດຂຶ້ນທີ່ ເມືອງ ຮາລອງ, ສສ ຫວຽດນາມ. ກອງປະຊຸມດັ່ງກ່າວ ຈັດຂຶ້ນ ເພື່ອລາຍງານຄວາມຄືບໜ້າ ການຄົ້ນຄວ້າສ້າງມາດຖະການ ການທັງໃນດ້ານນິຕິກຳ ແລະ ເຕັກນິກ ຂອງບັນດາປະເທດທີ່ເຂົ້າຮ່ວມ, ອັບເດດສະພາບການໃຫ້ບໍລິການ ຂອງແຕ່ລະປະເທດ ທີ່ປະສົບຜົນສຳເລັດ ໃນການໃຫ້ບໍລິການໃບຮັບຮອງເອເລັກໂຕຣນິກ ແລະ ແນວໂນ້ມ ການນຳໃຊ້ໃບຮັບຮອງເອເລັກໂຕຣນິກໃນລະບົບດີຈິຕອນ ໃນຕໍ່ໜ້າ.