ໃນຕອນເຊົ້າຂອງວັນທີ 14 ພຶດສະພາ 2024 ຜ່ານມານີ້, ຢູ່ທີ່ ຫ້ອງປະຊຸມ ທະນາຄານ ແຫ່ງ ສປປ ລາວ, ຄະນະກໍາມະການຄຸ້ມຄອງອິນເຕີເນັດ ແຫ່ງຊາດ (ຄຄອຊ), ຮ່ວມກັບ ທະນາຄານ ແຫ່ງສປປລາວ  ໄດ້ຈັດກອງປະຊຸມ ສໍາມະນາຫົວຂໍ້ ສ້າງຄວາມເຂັ້ມແຂງວຽກງານຄຸ້ມຄອງອິນເຕີເນັດແຫ່ງຊາດ ແລະ ວຽກງານຂ່າວສານ ທະນາຄານແຫ່ງ ສປປ ລາວ, ໂດຍການເປັນປະທານຮ່ວມຂອງ ທ່ານ ແກ້ວວີສຸກ ໂສລະພົມ, ຮອງລັດຖະມົນຕີ ກະຊວງ ເຕັກໂນໂລຊີ ແລະ ການສື່ສານ, ຮອງປະທານ ຄຄະຊ ແລະ ທ່ານ ນາງ  ຂັນແກ້ວ ຫຼ້າມະນີເງົາ ຮອງຜູ້ວ່າທະນາຄານ ແຫ່ງສປປລາວ ຜູ້ຊີ້ນໍາວຽກງານ ຂ່າວສານຂອງຂະແໜງການທະນາຄານ ພ້ອມດ້ວຍ ບັນດາທ່ານ ວິທະຍາກອນ ຈາກບັນດາພາກສ່ວນ ຫ້ອງການກອງເລຂາ ຄະນະກໍາມະການຄຸ້ມຄອງອິນເຕີເນັດ ແຫ່ງຊາດ, ຫ້ອງວ່າການສໍານັກງານນາຍົກລັດຖະມົນຕີ, ກະຊວງ ປ້ອງກັນຄວາມສະຫງົບ, ກະຊວງ ເຕັກໂນໂລຊີ ແລະ ການສື່ສານ, ກະຊວງ ຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ, ຄະນະຮັບຜິດຊອບ ຫ້ອງການກອງເລຂາ ຄະນະກໍາມະການຄຸ້ມຄອງອິນເຕີເນັດ ແຫ່ງຊາດ ແລະ ບັນດານັກສໍາມະນາກອນຈາກບັນດາຄະນະກົມ-ຄະນະສາຂາ  ທະນາຄານ ແຫ່ງ ສປປລາວ  ປະຈໍາພາກ, ຄະນະພະແນກ ແລະ ວິຊາການ ທີ່ກ່ຽວຂ້ອງເຂົ້າຮ່ວມ.

ໂອກາດດັ່ງກ່າວ, ທ່ານ ແກ້ວວີສຸກ ໂສລະພົມ, ໄດ້ມີຄໍາເຫັນໂດຍເນັ້ນໜັກ 2 ບັນຫາໃຫຍ່ຄື: ບັນຫາທີ 1: ແມ່ນກ່ຽວກັບດ້ານວຽກງານການຫັນເປັນດິຈິຕອນ: ວຽກງານນີ້ ແມ່ນມີຄວາມສໍາຄັນ ແລະ ຄວາມຈໍາເປັນຫຼາຍສໍາລັບພວກເຮົາ, ເຊິ່ງການຫັນເປັນດິຈິຕອນ ຈະຫັນໄປທັງ 3 ເສົາຄໍ້າຄື: ລັດຖະບານດິຈິຕອນ, ເສດຖະກິດດິຈິຕອນ ແລະ ສັງຄົມດິຈິຈອນ, ເພື່ອເຮັດໃຫ້ວຽກງານນີ້ ປະກົດຜົນເປັນຈິງ ພວກເຮົາກໍ່ໄດ້ມີ ວິໄສທັດການພັດທະນາເສດຖະກິດດິຈິຕອນ ໄລຍະ 20 ປີ (2021-2040), ຍຸດທະສາດການພັດທະນາເສດຖະກິດດິຈິຕອນ ໄລຍະ 10 ປີ (2021-2030) ແລະ ແຜນພັດທະນາເສດຖະກິດດິຈິຕອນ ໄລຍະ 5 ປີ (2021-2025), ບັນຫາທີ 2: ການຄຸ້ມຄອງອິນເຕີເນັດ: ການຄຸ້ມຄອງອິນເຕີເນັດ, ເພາະວ່າ ອິນເຕີເນັດ ເປັນເສັ້ນເລືອດ, ເປັນຫົນທາງ, ເປັນໂຄງລ່າງພື້ນຖານທີ່ສໍາຄັນ ຮອງຮັບໃຫ້ແກ່ວຽກງານ ການຫັນເປັນດິຈິຕອນ. ເຊິ່ງການຄຸ້ມຄອງອິນເຕີເນັດ ເນື່ອແທ້ຈະແມ່ນການຄຸ້ມຄອງທາງດ້ານເຕັກນິກ ແລະ ທາງດ້ານເນື້ອໃນ. ການຄຸ້ມຄອງດ້ານເນື້ອໃນ, ກໍ່ຕ້ອງໄດ້ຈາກການຮ່ວມມື ສະໜອງຂໍ້ມູນຈາກຈຸດປະສານງານຢູ່ບັນດາກະຊວງ ແລະ ຄຄອຂ ຢູ່ບັນດາແຂວງ, ບັນຫາເກີດຂື້ນຢູ່ບ່ອນໃດ ບ່ອນນັ້ນຕ້ອງໄດ້ເລັ່ງແກ້, ເລັ່ງຖະແຫຼງຂ່າວ ແລະ ເລັ່ງສະໜອງຂໍ້ມູນທີ່ຖືກຕ້ອງ ໃຫ້ບັນດາສື່ມວນຊົນທາງການ. ພາກສ່ວນຕ່າງໆ ຕ້ອງໄດ້ເລັ່ງ ເຜີຍແຜ່ ແລະ ສຶກສາອົບຮົມ ບັນດາໄວໜຸ່ມ, ພະນັກງານ, ລັດຖະກອນ, ສະມາຊິກພັກ, ທະຫານ, ຕໍາຫຼວດ ໃນການຮູ້ໄພອັນຕະລາຍຂອງອິນເຕີເນັດ, ສື່ສັງຄົມອອນລາຍ, ຮູ້ຈໍາແນກຂ່າວປອມ, ຂ່າວອະກຸສົນ, ຂ່າວບິດເບືອນ ແລະ ບັນດາຂໍ້ມູນເທັດ ທີ່ມີຈຸດປະສົງຫວັງທໍາລາຍ ຄວາມສາມັກຄີ, ຄວາມສະຫງົບສຸກຂອງສັງຄົມ, ມ້າງເພທໍາລາຍປະເທດຊາດ ແລະ ລະບອບການເມືອງ, ລະບົບໃຫມ່ ຂອງພວກເຮົາ.

ນອກນັ້ນ, ທ່ານ  ນາງ  ຂັນແກ້ວ ຫຼ້າມະນີເງົາ, ໄດ້ມີຄໍາເຫັນໃນປະຈຸບັນວຽກງານຂ່າວສານຢູ່ໃນສື່ອອນລາຍ ເປັນບັນຫາສຳຄັນຂອງທຸກຂະແໜງການເວົ້າລວມ ເວົ້າສະເພາະ ແມ່ນຂະແໜງການ ທະນາຄານ ເຊິ່ງໃນໄລຍະຜ່ານມາທົ່ວຂະແໜງການທະນາຄານແມ່ນ ມີກຸ່ມຄົນບໍ່ຫວັງດີຈຳນວນໜຶ່ງ ໄດ້ມີການຕົ້ວຍົ້ວຫຼອກລວງ ເອົາເງິນຂອງປະຊາຊົນທີ່ເກີດຂຶ້ນໃນສັງຄົມເປັນຕົ້ນ ການໂຄສະນາ ໃຫ້ບໍລິການອະນຸມັດສິນເຊື່ອອອນລາຍ ຂອງບາງທະນາຄານ, ການລະດົມເງິນດ້ວຍຫຼາຍຮູບແບບຜ່ານສື່ອອນລາຍ, ການແລກປ່ຽນເງິນຕາ, ການໃສ່ຮ້າຍປາຍສີຕໍ່ກັບທະນາຄານທຸລະກິດ ແລະ ອື່ນໆ ເພື່ອສວຍໃຊ້ ແລະ ຫວັງທຳລາຍມ້າງເພທະນາຄານ ແລະ ສ້າງຄວາມບໍ່ເຊື້ອໝັ້ນໃຫ້ກັບລະບົບທະນາຄານຂອງພວກເຮົາ. ສະນັ້ນ, ເພື່ອເປັນການສ້າງຄວາມຮັບຮູ້ ແລະ ເຂົ້າໃຈ, ສ້າງຄວາມເຂັ້ມແຂງໃຫ້ຄະນະຮັບຜິດຊອບໃນການຄຸ້ມຄອງ, ຕິດຕາມ-ກວດກາ, ການຊອກຫາຂໍ້ມູນການກະທຳຜິດໃນການນຳໃຊ້ຂໍ້ມູນຂ່າວສານຜ່ານອິນເຕີເນັດ ໂດຍສະເພາະການນຳໃຊ້ສື່ສັງຄົມອອນລາຍຕ່າງໆ ຂອງກຸ່ມຄົນບໍ່ຫວັງດີ ເພື່ອຕອບຕ້ານກຸ່ມຄົນດັ່ງກ່າວ ພ້ອມທັງໃຫ້ຂໍ້ມູນທີ່ຖືກຕ້ອງແກ່ສັງຄົມໄດ້ຮັບຮູ້.

ການຈັດສໍາມະນາດັ່ງກ່າວແມ່ນເພືີ່ອຍົກສູງສະຕິເປັນເຈົ້າເພື່ອສ້າງຄວາມຮັບຮູ້ ແລະ ຄວາມເຂົ້າໃຈໃຫ້ແກ່ນັກສໍາມະນາກອນ ໃນການສະກັດກັ້ນ, ຕອບຕ້ານໃຫ້ທັນຕໍ່ສະພາບການ ໄດ້ແນະນໍາວິທີການ ຈັດຕັ້ງປະຕິບັດວຽກງານ ແລະ ການຄຸ້ມຄອງຂອງ ຄະນະກໍາມະການຄູ້ມຄອງງອິນເຕີເນັດ ແຫ່ງຊາດ; ການຄຸ້ມຄອງຂໍ້ມູນຂ່າວສານຜ່ານອິນເຕີເນັດ, ການກະກຽມເນື້ອໃນຂ່າວ, ຂັ້ນຕອນ ໃນການຖະແຫຼ່ງຂ່າວ;ການໂຄສະນານໍາພາຫາງສຽງສັງຄົມຜ່ານສື່ມວນຊົນ; ວິທີການຄົ້ນຫາຂໍ້ມູນ ແລະ ແກ້ໄຂບັນຫາທາງສື່ສັງຄົມອອນລາຍ ແລະ ອາດຊະຍາກໍາທາງລະບົບໂທລະຄົມ (Cyber Crime). ຜູ້ເຂົ້າຮ່ວມໄດ້ມີຄວາມເອົາໃຈໃສ່ ແລກປ່ຽນຄໍາຄິດຄໍາເຫັນຂອງຢ່າງກົງໄປກົງມາ ແລະ ບັນລຸໝາກຜົນອັນຈົບງາມ ຕາມຄາດໝາຍທີ່ໄດ້ວາງໄວ້

ຮຽບຮຽງ: ຫ້ອງການກອງເລຂາ ຄຄອຊ