ໃນວັນທີ 20 ແລະ 21 ກຸມພາ 2024, ສູນອິນເຕີເນັດ ແຫ່ງຊາດ, ກະຊວງ ເຕັກໂນໂລຊີ ແລະ ການສື່ສານ, ໄດ້ຕ້ອນຮັບການທັດສະນະສຶກສາ ຂອງ ຄະນະຄູອາຈານ ແລະ ນັກຮຽນຊັ້ນມັດທະຍົມ 3 ຂອງ ໂຮງຮຽນ ກຽດຕິສັກ ນານາຊາດ ເຊິ່ງໄດ້ແບ່ງອອກເປັນ 2 ຊຸດ ຄື ວັນທີ 20 ນັກຮຽນ 44 ຄົນ ແລະ ວັນທີ 21 ນັກຮຽນ 35 ຄົນ, ໂດຍມີ ທ່ານ ໄຊສົມຫວັງ ສຸວັນນະວົງ ຮອງຫົວໜ້າສູນ ອິນເຕີເນັດ ແຫ່ງຊາດ ພ້ອມດ້ວຍບັນດາຄະນະພະແນກ ເຂົ້າຮ່ວມ.

ໃນໂອກາດດັ່ງກ່າວ, ທ່ານ ໄຊສົມຫວັງ ສຸວັນນະວົງ ໄດ້ໃຫ້ກຽດກ່າວຕ້ອນຮັບ ແລະ ນຳສະເໜີ ກ່ຽວກັບພາລະບົດບາດ ວຽກງານ ຂອງ ສູນອິນເຕີເນັດ ແຫ່ງຊາດ, ພ້ອມທັງ ໄດ້ອະທິບາຍຄວາມຮູ້ພື້ນຖານກ່ຽວກັບ ອິນເຕີເນັດ, ສື່ສັງຄົມອອນລາຍ ແລະ ການມີສະຕິລະວັງຕົວ ໃນການນຳໃຊ້ເຄື່ອງມື ແລະ ເຕັກໂນໂລຊີຕ່າງໆ ໃຫ້ມີຄວາມປອດໄພ. ໃນຕອນທ້າຍ ຄະນະຄູອາຈານ ແລະ ນ້ອງນັກຮຽນ ຍັງໄດ້ເຂົ້າທັດສະນະ ຢ້ຽມຢາມ ຫ້ອງສູນຂໍ້ມູນ ຂອງ ສູນຂໍ້ມູນແຫ່ງຊາດ ເພື່ອໃຫ້ໄດ້ເຫັນຕົວຈິງ ບັນດາໂຄງລ່າງພື້ນຖານລະບົບເຕັກນິກ ສ້າງຄວາມຮັບຮູ້ພື້ນຖານໄອຊີທີ ແລະ ດິຈິຕອນ ດ້ານເຕັກນິກ, ເຮັດໃຫ້ນ້ອງໆນັກຮຽນ ເຕີບໃຫຍ່ເປັນອະນາຄົດຂອງຊາດ ທີ່ມີທັກສະພື້ນຖານທາງດ້ານດິຈິຕອນ, ປະກອບສ່ວນເຂົ້າໃນຍຸດທະສາດການພັດທະນາບຸກຄະລາກອນທາງດ້ານດິຈິຕອນຂອງຊາດ.

ບົດຂ່າວ ແລະ ຮູບພາບ ສອຊ