ໃນຕອນບ່າຍຂອງວັນທີ 10 ມັງກອນ 2024 ທີ່ຫໍປະຊຸມແຫ່ງຊາດ, ນະຄອນຫຼວງວຽງຈັນ ໄດ້ມີພິທີເຊັນບົດບັນທຶກຄວາມເຂົ້າໃຈ ການຮ່ວມມືຂົງເຂດການພັດທະນາຊັບພະຍາກອນອິນເຕີເນັດ ລະຫວ່າງສູນອິນເຕີເນັດ ແຫ່ງຊາດ (LANIC), ກະຊວງເຕັກໂນໂລຊີ ແລະ ການສື່ສານ ສປປ ລາວ ແລະ ສູນອິນເຕີເນັດ ແຫ່ງຊາດ (VNNIC), ກະຊວງ ຖະແຫລ່ງຂ່າວ ແລະ ການສື່ສານ ສສ ຫວຽດນາມ

ຈຸດປະສົງຂອງການເຊັນບົດບັນທຶກຄວາມເຂົ້້າໃຈໃນຄັ້ງນີ້ ເພື່ອເສີມຂະຫຍາຍການຮ່ວມມືສອງຝ່າຍ ຢູ່ໃນຂົງເຂດວຽກງານການຄຸ້ມຄອງ, ພັດທະນາ ແລະ ບໍລິຫານຈັດການ ຊັບພະຍາກອນອິນເຕີເນັດແຫ່ງຊາດ ແລະ ປັບປຸງໂຄງລ່າງພື້ນຖານທີ່ສຳຄັນຂອງອິນເຕີເນັດ, ແລະ ຂົງເຂດການຮ່ວມມື, ໃຫ້ຄຳປຶກສາ ແລະ ພັດທະນາຊັບພະຍາກອນມະນຸດ ເພື່ອຊຸກຍູ້ສົ່ງເສີມວຽກງງານການຫັນເປັນດິຈິຕອນໃນ ສປປ ລາວ. ສູນອິນເຕີເນັດ ແຫ່ງຊາດ (LANIC), ກະຊວງ ເຕັກໂນໂລຊີ ແລະ ການສື່ສານ ສປປ ລາວ ແລະ ສູນອິນເຕີເນັດ ແຫ່ງຊາດ (VNNIC), ກະຊວງ ຖະແຫລ່ງຂ່າວ ແລະ ການສື່ສານ ສສ ຫວຽດນາມ ໄດ້ເຫັນດີເປັນເອກະພາບ ໃນບັນດາຫົວຂໍ້ ແລະ ກິດຈະກຳ ຂອງສູນອິນເຕີເນັດ ແຫ່ງຊາດ (LANIC) ເຊັ່ນ: ວຽກງານລະຫັດຊື່ອິນເຕີເນັດສູງສຸດ (ccTLD), ວຽກງານ DNS ແລະ ຄວາມປອດໄພອິນເຕີເນັດ, ວຽກງານການຫັນສູ່ເລກໝາຍອິນເຕີເນັດຮູ່ນທີ 6 (IPv6 transition), ການເກັບກຳສະຖິຕິ ແລະ ການຕິດຕາມ, ວຽກຝຶກອົບຮົມ ແລະ ກອງປະຊຸມສຳມະນາ, ສົ່ງເສີມໃຫ້ LANIC ສ້າງກຸ່ມປະຕິບັດງານເຄືອຂ່າຍອິນເຕີເນັດພາຍໃນ (Lao Internet Exchange Network Operation Group: LIXNOG).

ຮ່ວມລົງນາມໃນບົດບັນທຶກຄວາມເຂົ້າໃຈ ລະຫວ່າງ LANIC ແລະ VNNIC ໂດຍແມ່ນ ທ່ານ ມີນາໄຊ ພິລາວົງ ຫົວໜ້າ ສູນອິນເຕີເນັດ ແຫ່ງຊາດ, ກະຊວງເຕັກໂນໂລຊີ ແລະ ການສື່ສານ ສປປ ລາວ ແລະ ທ່ານ Nguyễn Hồng Thắng (ຫງວຽນ ຮົງ ຖັງ) ຫົວໜ້າສູນອິນເຕີເນັດ ແຫ່ງຊາດ, ກະຊວງ ຖະແຫລ່ງຂ່າວ ແລະ ການສື່ສານ ສສ ຫວຽດນາມ.ແລະ ໃຫ້ກຽດເຂົ້າຮ່ວມເປັນສັກຄີພະຍານຂອງ ທ່ານ ແກ້ວວິສຸກ ໂສລະພົມ ຮອງລັດຖະມົນຕີ ກະຊວງ ເຕັກໂນໂລຊີ ແລະ ການສື່ສານ,  ທ່ານ Nguyễn Huy Dũng (ຫງວຽນ ຮຸຍ ສຸງ) ຮອງລັດຖະມົນຕີ ກະຊວງ ຖະແຫລ່ງຂ່າວ ແລະ ການສື່ສານ ສສ ຫວຽດນາມ, ຫົວໜ້າຫ້ອງການ, ກົມ, ສູນ, ສະຖາບັນ ແລະ ພ້ອມດ້ວຍພະນັກງານທີ່ກ່ຽວຂ້ອງທັງສອງຝາຍເຂົ້າຮ່ວມຢ່າງພ້ອມພຽງ.

LANIC ແລະ VNNIC ກໍ່ໄດ້ມີການພົວພັນກັນຢ່າງສະໜິດແໜ້ນ ນັບຕັ້ງແຕປີ 2011 ເປັນຕົ້ນມາ. ໃນປີ 2012 ສູນອີນເຕີເນັດແຫ່ງຊາດ ສປປ ລາວ ໄດ້ສົ່ງພະນັກງານ 4 ທ່ານ ໄປຝຶກອົບຮົມ ແລະ ເຮັດວຽກຕົວຈິງ ກັບ ສູນອີນເຕີເນັດ ແຫ່ງຊາດ ຂອງ ສສ ຫວຽດນາມ ເປັນເວລາ 6 ເດືອນ ເພື່ອສຶກສາ ຖອດຖອນບົດຮຽນວຽກງານລະຫັດຊື່ອິນເຕີເນັດ. ທັງສອງສູນ ຍັງໄດ້ເຊັນ MOM ວ່າດ້ວຍ ທິດທາງ ແລະ ແຜນການຮ່ວມມື ລະຫວ່າງປີ 2013-2015 ໃນການສ້າງນິຕິກຳ, ລະບຽບການຕ່າງໆ ກັບກ່ຽວລະຫັດຊື່ອິນເຕີເນັດ, ການຈັດຝຶກອົບຮົມ ແລະ ສະໜັບສະໜູນທາງດ້ານວິຊາການ ໃນວັນທີ 15 ສິງຫາ 2013, ຫຼັງຈາກນັ້ນ, ຕັ້ງແຕ່ປີ 2016 ເປັນຕົ້ນມາ ທັງສອງສູນ ກໍ່ໄດ້ສືບຕໍ່ໃຫ້ການຮ່ວມມື ແລະ ສະໜັບສະໜູນເຊິ່ງກັນ ແລະ ກັນ ຕະຫຼອດມາ ໂດຍ VNNIC ກໍ່ໄດ້ນຳສົ່ງພະນັກງານ ແລະ ຊ່ຽວຊານ ມາຈັດຝຶກອົບຮົມ ວຽກງານ ລະຫັດຊື່ອິນເຕີເນັດ ໃຫ້ທີ່ LANIC ຫຼາຍຄັ້ງ ໃນຫຼາຍຫົວຂໍ້ ເປັນຕົ້ນແມ່ນ ນະໂຍບາຍ ແລະ ນິຕິກໍາລະຫັດຊື່ອິນເຕີເນັດ, ລະຫັດຊື່ອິນເຕີເນັດຂັ້ນສາມ ໃນ DNSSEC ແລະ ລະຫັດຊື່ອິນເຕີເນັດພາສາທ້ອງຖິ່ນ (IDN ccTLD ພ້ອມກັນນັ້ນ ຄະນະຈາກ LANIC ກໍ່ໄດ້ເດີນທາງໄປຢ້ຽມຢາມ VNNIC ເພື່ອແລກປ່ຽນຖອດຖອນບົດຮຽນ ຈຳນວນ 03 ຄັ້ງ, ນອກຈາກວຽກງານ ລະຫັດຊື່ອິນເຕີເນັດ ແລ້ວ VNNIC ຍັງໃຫ້ການຮ່ວມມືໃນດ້ານວຽກງານການຄຸ້ມຄອງຊັບພະຍາກອນ ແລະ ການນຳໃຊ້ ເລກໝາຍອິນເຕີເນັດ (IP) ເຊິ່ງ VNNIC ກໍ່ໄດ້ນຳສົ່ງພະນັກງານ ແລະ ຊ່ຽວຊານ ມາຈັດຝຶກອົບຮົມ ໃຫ້ທີ່ LANIC ໃນຫົວຂໍ້ ການຫັນປ່ຽນເປັນ IPv6 ແລະ Internet Infrastructure and Routing Security ພ້ອມທັງໄດ້ຮ່ວມກັນຮ່າງນິຕິກຳ ເພື່ອເປັນບ່ອນອີງໃນການຄຸ້ມຄອງ ແລະ ການນຳໃຊ້ ເລກໝາຍອິນເຕີເນັດ ສົ່ງເສີມການຫັນປ່ຽນ ແລະ ການນຳໃຊ້ IPv6.