ໃນວັນທີ 20 ທັນວາ 2023 ຫ້ອງການກອງເລຂາຄະນະກໍາມະການຄຸ້ມຄອງອິນເຕີເນັດ ແຫ່ງຊາດ ແລະ ສູນອິນເຕີເນັດ ແຫ່ງຊາດ, ກະຊວງເຕັກໂນໂລຊີ ແລະ ການສື່ສານ, ຮ່ວມກັບ ພະແນກເຕັກໂນໂລຊີ ແລະ ການສື່ສານ ແຂວງຫຼວງນໍ້າທາ ໄດ້ຈັດກອງປະຊຸມສຳມະນາສ້າງຄວາມເຂັ້ມແຂງຄະນະກຳມະການຄຸ້ມຄອງອິນເຕີເນັດແຂວງຫຼວງນໍ້າທາ ແລະ ຝຶກອົບຮົມວຽກງານສູນອິນເຕີເນັດ ແຫ່ງຊາດ ຂຶ້ນ ໂດຍການເປັນປະທານຂອງ  ທ່ານ ແກ້ວວີສຸກ ໂສລະພົມ, ຄະນະປະຈຳພັກກະຊວງ, ຮອງລັດຖະມົນຕີກະຊວງເຕັກໂນໂລຊີ ແລະ ການສື່ສານ, ຮອງປະທານຄະນະກຳມະການຄຸ້ມຄອງອິນເຕີເນັດ ແຫ່ງຊາດ, ໂດຍມີບັນດາທ່ານໃນຄະນະກຳມະການຄຸ້ມຄອງອິນເຕີເນັດ ແຂວງຫຼວງນໍ້າທາ (ຄຄອຂ), ອົງການຈັດຕັ້ງພັກ, ເມືອງ, ບັນດາພະແນກການແຂວງ, ອົງການຈັດຕັ້ງມະຫາຊົນ, ປກສ-ປກຊ, ແລະ ບັນດາພາກສ່ວນລັດວິສາຫະກິດ, ທຸລະກິດ ພາຍໃນແຂວງເຂົ້າຮ່ວມຢ່າງພ້ອມພຽງ ລວມທັງໝົດ 48 ທ່ານ, ຍິງ 16 ທ່ານ.

ໃນພາກເຊົ້າຂອງວັນດຽວກັນ ໄດ້ມີກອງປະຊຸມສຳມະນາ ຄຄອຂ ຫຼວງນໍ້າທາ ແລະ ຝຶກອົບຮົມວຽກງານສູນອິນເຕີເນັດ ແຫ່ງຊາດ, ຮ່ວມຊີ້ນຳກອງປະຊຸມໂດຍ ທ່ານ ວັນທາ ພົມວິໄລ, ເລຂາຄະນະພັກຮາກຖານ, ຫົວໜ້າພະແນກເຕັກໂນໂລຊີ ແລະ ການສື່ສານ ແຂວງຫຼວງນໍ້າທາ ແລະ ທ່ານ ໄຊສົມຫວັງ ສຸວັນນະວົງ, ຮອງຫົວໜ້າສູນອິນເຕີເນັດ ແຫ່ງຊາດ, ກອງເລຂາຄະນະກຳມະການຄຸ້ມຄອງອິນເຕີເນັດ ແຫ່ງຊາດ. ຜູ້ເຂົ້າຮ່ວມ ໄດ້ຮັບຟັງການນຳສະເໜີຂອງ ຄະນະສູນ-ຄະນະພະແນກ ສູນອິນເຕີເນັດແຫ່ງຊາດ ໃນວຽກງານການຄຸ້ມຄອງ, ພັດທະນາ ແລະ ການບໍລິການ ວຽກງານເຕັກນິກ ຂອງ ສອຊ ກໍ່ຄື ໂຄງລ່າງພື້້ນຖານດ້ານເຕັກໂນໂລຊີ ແລະ ການສື່ສານ, ໂດຍສະເພາະ ວຽກງານລວມສູນການສື່ສານ (ໂທລະສັບ, ຂໍ້ຄວາມຄວາມສັ້ນ, ແລະ ອິນເຕີເນັດ), ວຽກງານຊັບພະຍາກອນອິນເຕີເນັດ ກໍ່ຄື ລະຫັດຊື່ອິນເຕີເນັດ .LA .ລາວ, ວຽກງານລາຍເຊັນເອເລັກໂຕຣນິກ, ແລະ ວຽກງານສູນຂໍ້ມູນແຫ່ງຊາດ. ວຽກງານດັ່ງກ່າວ ແມ່ນຖືເປັນພື້້ນຖານ ຂອງການຄຸ້ມຄອງອິນເຕີເນັດ ແລະ ຂໍ້ມູນຂ່າວສານ, ກໍ່ຄື ການຫັນເປັນດິຈິຕອນ ໂດຍລວມຂອງ ປະເທດເຮົາ. ຜູ້ເຂົ້າຮ່ວມຍັງໄດ້ຮັບຟັງນຳສະເໜີກ່ຽວກັບ ການຄຸ້ມຄອງຂໍ້ມູນຂ່າວສານຜ່ານອິນເຕີເນັດ, ໂດຍທ່ານ ໄຊສົມຫວັງ ສຸວັນນວົງ, ໂດຍໄດ້ຍົກໃຫ້ເຫັນສະພາບການພັດທະນາ ແລະ ການນຳໃຊ້ ດ້ານອິນເຕີເນັດໃນສາກົນ ແລະ ໃນລາວ, ບັນດານິຕິກຳ ແລະ ມາດຕະການຄຸ້ມຄອງຕ່າງໆ.  ຈາກນັ້ນ, ທ່ານ ພູວັນ ຈັນທະມີໄຊ ຮອງຫົວໜ້າພະແນກຂໍ້ມູນຂ່າວສານ-ອິນເຕີເນັດ ກົມສື່ມວນຊົນ ກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ ໄດ້ນຳສະເໜີກ່ຽວກັບການຕອບຕ້ານກົນອຸບາຍຂອງກຸ່ມຄົນບໍ່ດີ ຜ່ານສື່ມວນຊົນ, ຊຶ່ງໄດ້ອະທິບາຍໂດສັງເຂບ ກ່ຽວກັບ ສະພາບລວມຂອງສື່ມວນຊົນລາວ, ສະພາບຫາງສຽງສັງຄົມ, ການນຳພາຫາງສຽງສັງຄົມຜ່ານສື່ມວນຊົນ, ການຕິດຕາມ, ກວດກາ, ຕອບໂຕ້ ແລະ ການຄຸ້ມຄອງໜ້າຂ່າວອອນລາຍ. ພ້ອມດ້ຽວກັນໄດ້, ຍັງໄດ້ມີການສະເໜີບົດກ່ຽວກັບ ສະຕິຕໍ່ການບໍ່ຖືກຫຼອກລວງທາງອອນລາຍ ຫຼື Online Scams, ໂດຍ ທ່ານ ອາເລັກໂຊ ສີພອນ ຫົວໜ້າພະແນກຄົ້ນຄວ້າ ແລະ ພັດທະນາ ກົມຄວາມປອດໄພໄຊເບີ ກະຊວງເຕັກໂນໂລຊີ ແລະ ການສື່ສານ, ຊຶ່ງເປັນການສ້າງຄວາມເຂົ້າໃຈ ແລະ ຍົກສູງສະຕິດ້ານຄວາມປອດໄພທາງລະບົບຄອມພິວເຕີ. ປະກອບດ້ວຍການຮັບຟັງການບັນຍາຍກ່ຽວກັບ ການຄຸ້ມຄອງຂໍ້ມູນຂ່າວສານຜ່ານອິນເຕີເນັດ.

ໃນພາກບ່າຍ, ທ່ານ ໄຊສົມຫວັງ ສຸວັນນະວົງ ໄດ້ຂຶ້ນລາຍງານຜົນສຳເລັດການຈັດ ສຳມະນາ ແລະ ຝຶກອົບຮົມ ໃນພາກເຊົ້າ. ຈາກນັ້ນ, ທ່ານ ວັນທາ ພົມວິໄລ ກໍ່ໄດ້ຂຶ້ນລາຍງານສະພາບການຄຸ້ມຄອງ, ພັດທະນາ ແລະ ນຳໃຊ້ ດ້ານໂທລະຄົມມະນາຄົມ, ອິນເຕີເນັດ ແລະ ການຄຸ້ມຄອງຂໍ້ມູນຂ່າວສານຜ່ານອິນເຕີເນັດ ພາຍໃນແຂວງຫຼວງນໍ້າທາ ຄື: ບໍລິສັດລາວໂທລະຄົມ ມະຫາຊົນ, ບໍລິສັດສະຕຮາໂທລະຄົມ, ບໍລິສັດອີທີແອລ ຈຳກັດ ມີສະຖານີຮັບ-ສົ່ງສັນຍານໂທລະສັບມືຖື ແລະ ອິນເຕີເນັດທັງໝົດ 210 ສະຖານີ, ມີສັນຍານຄວບຄຸມ 320 ບ້ານ, ໃນຈຳນວນບ້ານ 352 ບ້ານໃນທົ່ວແຂວງ, ກວມເອົາ 91%, ມີລະບົບ 2G ຄວບຄຸມເຖິງ 320 ບ້ານ ເທົ່າກັບ 91%, ລະບົບ 3G ຄວບຄຸມເຖິງ 165 ບ້ານ ເທົ່າກັບ 66,54%, ລະບົບ 4G ຄວບຄຸມເຖິງ 211 ບ້ານ ເທົ່າກັບ 89,11%,   ລະບົບ 4,5G ເທົ່າກັບ 27,02%,  ມີຜູ້ຊົມໃຊ້ຜູ້ຊົມໃຊ້ເລກໝາຍໂທລະສັບທັງໝົດ 176,579 ເລກໝາຍ, ຄິດເປັນເປີເຊັນ 88,3%, ໄດ້ຂື້ນທະບຽນໄປແລ້ວຈຳນວນ 108,864 ເລກໝາຍ ເທົ່າກັບ 61,65% ຍັງ 67,715 ເລກໝາຍ ເທົ່າກັບ 38,5% ທີ່ຈະຕ້ອງໄດ້ຂຶ້ນທະບຽນໃຫ້ສຳເລັດຕາມເວລາທີ່ທາງລັດຖະບານກົດໄວ້, , ນອກຈາກນີ້ ຍັງມີການລາຍງານກ່ຽວກັບ ການຕິດຕາມຫາງສຽງ, ການຕອບໂຕ້ຫາງສຽງໃນສື່ສັງຄົມອອນລາຍ ໃນສະໜອງຂໍ້ມູນໃຫ້ເຈົ້າໜ້າທີ ໃນການສືບສວນ-ສອບສວນ ເພື່ອປະກອບສຳນວນຄະດີຂອງຜູ້ຖືກຫາ ໄດ້ທັງໝົດ 31 ຄັ້ງ, ມີ 41 ເລກໝາຍ.

ຜູ້ເຂົ້າຮ່ວມກອງປະຊຸມໄດ້ຮ່ວມກັນປຶກສາຫາລື ແລກປ່ຽນຄຳຄິດຄຳເຫັນຂອງຢ່າງກົງໄປກົງມາ ໃນການຈັດຕັ້ງປະຕິບັດວຽກງານຄຸ້ມຄອງອິນເຕີເນັດ ພາຍໃນແຂວງຫຼວງນໍ້າທາ, ລວມທັງວິທີການປະສານງານລະຫວ່າງ ຄະນະກຳມະການຄຸ້ມຄອງອິນເຕີເນັດແຫ່ງຊາດ (ຄຄອຊ) ແລະ ຄະນະກຳມະການຄຸ້ມຄອງອິນເຕີເນັດຂັ້ນແຂວງ ເພື່ອໃຫ້ມີກົນໄກປະສານງານຢ່າງໂລ່ງລ່ຽນ, ທັນສະພາບການ.

ໃນຕອນທ້າຍ, ທ່ານ ແກ້ວວີສຸກ ໂສລະພົມ ໄດ້ໃຫ້ກຽດໂອ້ລົມຕໍ່ກອງປະຊຸມ ໂດຍໄດ້ຍົກໃຫ້ເຫັນເຖິງຄວາມໝາຍ ຄວາມສຳຄັນ ແລະ ຄວາມເອົາໃຈໃສ່ຢ່າງເປັນເອກະພາບ ຕໍ່ກັບວຽກງານຄຸ້ມຄອງອິນເຕີເນັດພາຍໃນແຂວງຫຼວງນໍ້າທາ, ກໍ່ຄື ການພັດທະນາວຽກການຄຸ້ມຄອງ, ການພັດທະນາ ແລະ ການນໍາໃຊ້ ອິນເຕີເນັດ, ເຕັກໂນໂລຊີການສື່ສານຂໍ້ມູນຂ່າວສານ ເຂົ້າໃນການຈັດຕັ້ງປະຕິບັດວຽກງານ, ການດຳເນີນທຸລະກິດ, ການດຳລົງຊີວິດ, ການຕິດຕໍ່ພົວພັນ ຂອງສັງຄົມ ຕ່າງໆ, ຍິ່ງເຫັນໄດ້ແຈ້ງ ເຖິງຄວາມສໍາຄັນ ແລະ ຄວາມຈຳເປັນຂອງ ອິນເຕີເນັດ. ແຕ່ຄຽງຄູ່ກັບຜົນປະໂຫຍດອັນມະຫາສານຈາກ ອິນເຕີເນັດ, ກໍ່ເຫັນໄດ້ແຈ້ງບັນຫາ ແລະ ສິ່ງທ້າທາຍຕ່າງໆ, ໂດຍສະເພາະ ແມ່ນການນໍາໃຊ້ສື່ສັງຄົມອອນລາຍ ແລະ ການນຳໃຊ້ອິນເຕີເນັດ ໄປໃນທາງທີ່ບໍ່ດີ.

ບົດຂ່າວ ແລະ ພາບ ສອຊ.