ໃນວັນທີ 21 ທັນວາ 2023 ຫ້ອງການກອງເລຂາຄະນະກໍາມະການຄຸ້ມຄອງອິນເຕີເນັດ ແຫ່ງຊາດ ແລະ ສູນອິນເຕີເນັດ ແຫ່ງຊາດ, ກະຊວງເຕັກໂນໂລຊີ ແລະ ການສື່ສານ, ຮ່ວມກັບ ພະແນກເຕັກໂນໂລຊີ ແລະ ການສື່ສານ ແຂວງບໍ່ແກ້ວ ໄດ້ຈັດກອງປະຊຸມສຳມະນາສ້າງຄວາມເຂັ້ມແຂງຄະນະກຳມະການຄຸ້ມຄອງອິນເຕີເນັດແຂວງບໍ່ແກ້ວ ແລະ ຝຶກອົບຮົມວຽກງານສູນອິນເຕີເນັດ ແຫ່ງຊາດ ຂຶ້ນ ໂດຍການເປັນປະທານຮ່ວມ ຂອງ  ທ່ານ ແກ້ວວີສຸກ ໂສລະພົມ ຄະນະປະຈຳພັກກະຊວງ, ຮອງລັດຖະມົນຕີກະຊວງເຕັກໂນໂລຊີ ແລະ ການສື່ສານ, ຮອງປະທານຄະນະກຳມະການຄຸ້ມຄອງອິນເຕີເນັດ ແຫ່ງຊາດ, ແລະ ທ່ານ ດຣ ຄຳຜະຫຍາ ພົມປັນຍາ, ຄະນະປະຈຳພັກແຂວງ, ຮອງເຈົ້າແຂວງ ແຂວງບໍ່ແກ້ວ, ປະທານຄະນະກຳມະການຄຸ້ມຄອງອິນເຕີເນັດແຂວງບໍ່ແກ້ວ, ພ້ອມດ້ວຍບັນດາທ່ານໃນຄະນະກຳມະການຄຸ້ມຄອງອິນເຕີເນັດ ແຂວງບໍ່ແກ້ວ (ຄຄອຂ), ອົງການຈັດຕັ້ງພັກ, ເມືອງ, ບັນດາພະແນກການແຂວງ, ອົງການຈັດຕັ້ງມະຫາຊົນ, ປກສ-ປກຊ, ແລະ ບັນດາພາກສ່ວນລັດວິສາຫະກິດ, ທຸລະກິດ ພາຍໃນແຂວງເຂົ້າຮ່ວມຢ່າງພ້ອມພຽງ ລວມທັງໝົດ 112 ທ່ານ, ຍິງ 37 ທ່ານ.

ໃນໂອກາດນີ້, ປະທານກອງປະຊຸມ ໄດ້ຍົກໃຫ້ເຫັນເຖິງຄວາມໝາຍ ຄວາມສຳຄັນ ແລະ ຄວາມເອົາໃຈໃສ່ຢ່າງເປັນເອກະພາບ ຕໍ່ກັບວຽກງານຄຸ້ມຄອງອິນເຕີເນັດພາຍໃນແຂວງບໍແກ້ວ, ກໍ່ຄື ການພັດທະນາວຽກການຄຸ້ມຄອງ, ການພັດທະນາ ແລະ ການນໍາໃຊ້ ອິນເຕີເນັດ, ເຕັກໂນໂລຊີການສື່ສານຂໍ້ມູນຂ່າວສານ ເຂົ້າໃນການຈັດຕັ້ງປະຕິບັດວຽກງານ, ການດຳເນີນທຸລະກິດ, ການດຳລົງຊີວິດ, ການຕິດຕໍ່ພົວພັນ ຂອງສັງຄົມ ຕ່າງໆ, ຍິ່ງເຫັນໄດ້ແຈ້ງ ເຖິງຄວາມສໍາຄັນ ແລະ ຄວາມຈຳເປັນຂອງ ອິນເຕີເນັດ. ແຕ່ຄຽງຄູ່ກັບຜົນປະໂຫຍດອັນມະຫາສານຈາກ ອິນເຕີເນັດ, ກໍ່ເຫັນໄດ້ແຈ້ງບັນຫາ ແລະ ສິ່ງທ້າທາຍຕ່າງໆ, ໂດຍສະເພາະ ແມ່ນການນໍາໃຊ້ສື່ສັງຄົມອອນລາຍ ແລະ ການນຳໃຊ້ອິນເຕີເນັດ ໄປໃນທາງທີ່ບໍ່ດີ.

ໃນພາກເຊົ້າ ແມ່ນ ກອງປະຊຸມສຳມະນາ ຄຄອຂ ບໍ່ແກ້ວ ແລະ ຝຶກອົບຮົມວຽກງານສູນອິນເຕີເນັດ ແຫ່ງຊາດ, ຮ່ວມຊີ້ນຳກອງປະຊຸມໂດຍ ທ່ານ ໄຊສົມຫວັງ ສຸວັນນະວົງ, ຮອງຫົວໜ້າສູນອິນເຕີເນັດ ແຫ່ງຊາດ, ກອງເລຂາຄະນະກຳມະການຄຸ້ມຄອງອິນເຕີເນັດ ແຫ່ງຊາດ, ແລະ ທ່ານ ພອນສະໄໝ ພິດທະຈິດ, ເລຂາໜ່ວຍພັກຮາກຖານ, ຮອງຫົວໜ້າພະແນກເຕັກໂນໂລຊີ ແລະ ການສື່ສານ ແຂວງບໍ່ແກ້ວ. ຜູ້ເຂົ້າຮ່ວມ ໄດ້ຮັບຟັງການນຳສະເໜີວຽກງານການຄຸ້ມຄອງ, ພັດທະນາ ແລະ ການບໍລິການ ວຽກງານເຕັກນິກ ສູນອິນເຕີເນັດແຫ່ງຊາດ ກໍ່ຄື ໂຄງລ່າງພື້້ນຖານດ້ານເຕັກໂນໂລຊີ ແລະ ການສື່ສານ, ໂດຍສະເພາະ ວຽກງານລວມສູນການສື່ສານ (ໂທລະສັບ, ຂໍ້ຄວາມຄວາມສັ້ນ, ແລະ ອິນເຕີເນັດ), ວຽກງານຊັບພະຍາກອນອິນເຕີເນັດ ກໍ່ຄື ລະຫັດຊື່ອິນເຕີເນັດ .LA .ລາວ, ວຽກງານລາຍເຊັນເອເລັກໂຕຣນິກ, ແລະ ວຽກງານສູນຂໍ້ມູນແຫ່ງຊາດ. ວຽກງານດັ່ງກ່າວ ແມ່ນຖືເປັນພື້້ນຖານ ຂອງການຄຸ້ມຄອງອິນເຕີເນັດ ແລະ ຂໍ້ມູນຂ່າວສານ, ກໍ່ຄື ການຫັນເປັນດິຈິຕອນ ໂດຍລວມຂອງ ປະເທດເຮົາ. ຜູ້ເຂົ້າຮ່ວມຍັງໄດ້ຮັບຟັງນຳສະເໜີໂດຍ ການຕອບຕ້ານກົນອຸບາຍຂອງກຸ່ມຄົນບໍ່ດີ ຜ່ານສື່ມວນຊົນ, ຊຶ່ງໄດ້ອະທິບາຍໂດສັງເຂບ ກ່ຽວກັບ ສະພາບລວມຂອງສື່ມວນຊົນລາວ, ສະພາບຫາງສຽງສັງຄົມ, ການນຳພາຫາງສຽງສັງຄົມຜ່ານສື່ມວນຊົນ, ການຕິດຕາມ, ກວດກາ, ຕອບໂຕ້ ແລະ ການຄຸ້ມຄອງໜ້າຂ່າວອອນລາຍ. ພ້ອມດ້ຽວກັນໄດ້, ຍັງໄດ້ມີການສະເໜີບົດ ກ່ຽວກັບ ສະຕິຕໍ່ການບໍ່ຖືກຫຼອກລວງທາງອອນລາຍ ຫຼື Online Scams, ຊຶ່ງເປັນການສ້າງຄວາມເຂົ້າໃຈ ແລະ ຍົກສູງສະຕິດ້ານຄວາມປອດໄພທາງລະບົບຄອມພິວເຕີ.ປະກອບດ້ວຍການຮັບຟັງການບັນຍາຍກ່ຽວກັບ ການຄຸ້ມຄອງຂໍ້ມູນຂ່າວສານຜ່ານອິນເຕີເນັດ.

ໃນພາກບ່າຍ, ທ່ານ ໄຊສົມຫວັງ ສຸວັນນະວົງ ໄດ້ຂຶ້ນລາຍງານຜົນສຳເລັດການຈັດ ສຳມະນາ ແລະ ຝຶກອົບຮົມ ໃນພາກເຊົ້າ ແລະ ນຳສະເໜີກ່ຽວກັບ ການຄຸ້ມຄອງຂໍ້ມູນຂ່າວສານຜ່ານອິນເຕີເນັດ, ໂດຍໄດ້ຍົກໃຫ້ເຫັນສະພາບການພັດທະນາ ແລະ ການນຳໃຊ້ ດ້ານອິນເຕີເນັດໃນສາກົນ ແລະ ໃນລາວ, ບັນດານິຕິກຳ ແລະ ມາດຕະການຄຸ້ມຄອງຕ່າງໆ. ພ້ອມດຽວກັນນັ້ນ, ທ່ານ ວິລັດ ພົງສະຫວັດ, ຮອງຫົວໜ້າພະແນກເຕັກໂນໂລຊີ ແລະ ການສື່ສານ ແຂວງບໍ່ແກ້ວ, ກໍ່ໄດ້ຂຶ້ນລາຍງານສະພາບການຄຸ້ມຄອງ, ພັດທະນາ ແລະ ນຳໃຊ້ ດ້ານໂທລະຄົມມະນາຄົມ, ອິນເຕີເນັດ ແລະ ການຄຸ້ມຄອງຂໍ້ມູນຂ່າວສານຜ່ານອິນເຕີເນັດ ພາຍໃນແຂວງບໍ່ແກ້ວ, ຊຶ່ງໃນປະຈຸບັນມີ 04 ບໍລິສັດ ແລະ ມີໜ່ວຍງານປະຈໍາຢູ່ແຕ່ລະເມືອງ ທີ່ເຮັດບໍລິການຮັບໃຊ້ຄື: ບໍລິສັດ ລາວໂທລະຄົມມະຫາຊົນ, ບໍລິສັດສະຕາໂທລະຄົມ, ບໍລິສັດອີທີແອລ ຈໍາກັດ ແລະ ບໍລິສັດເບດສໂທລະຄົມ, ມີສະຖານີຮັບ-ສົັ່ງສັນຍານໂທລະສັບມືຖື ແລະ ອິນເຕີເນັດທັງໝົດ 373 ສະຖານີ, ມີສັນຍານຄວບຄຸມເຖິງບ້ານ 246 ບ້ານ, ໃນຈໍານວນບ້ານ 248 ບ້ານໃນທົ່ວແຂວງ, ກວມເອົາ 99,19 %, ມີຜູ້ຊົມໃຊ້ເລກໝາຍໂທລະສັບທັງໝົດ 579.594 ເລກໝາຍ ແລະ ໄດ້ຂື້ນທະບຽນໄປແລ້ວ ຈໍານວນ 139,938 ເລກໝາຍ ເທົ່າກັບ 25%, ເພື່ອໄດ້ຮັບຮູ້ສະພາບການ ແລະ ວິທີການແກ້ໄຂບັນຫາ. ໃນວຽກງານຄຸ້ມຄອງຂໍ້ມູນຂ່າວສານຜ່ານອິນເຕີເນັດ ແມ່ນໄດ້ມີການແຕ່ງຕັ້ງ ຄະນະກຳມະການຄຸ້ມຄອງອິນເຕີເນັດຂັ້ນແຂວງ ໂດຍມີ ທ່ານ ດຣ ຄຳຜະຫຍາ ພົມປັນຍາ, ຄະນະປະຈຳພັກແຂວງ, ຮອງເຈົ້າແຂວງ ຜູ້ຊີ້ນຳວຽກງານວັດທະນະທຳ-ສັງຄົມ ເປັນປະທານ, ຊຶ່ງໃນໄລຍະຜ່ານມາ ກໍ່ໄດ້ເອົາໃຈໃສ່ໃນການຕິດຕາມ, ກວດກາ ແລະ ຕອບໂຕ້ ຫາງສຽງຂອງສັງຄົມ ຜ່ານທາງສື່ສັງຄົມອອນລາຍ ກ່ຽວກັບການໂພສ ໃສ່ຮ້າຍປ້າຍສີໂຈມຕີການນໍາພັກ-ລັດ, ໂພສ ສິ່ງລາມົກອານາຈານ, ດູຖູກໝິ່ນປະໝາດ ເຮັດໃຫ້ສັງຄົມ ກໍ່ຄື ປະເທດຊາດ, ບຸກ ຄົນ, ນິຕິບຸກຄົນ,ໄດ້ຮັບຄວາມເຊື່ອມເສຍ ແລະ ແຕະຕ້ອງເຖິງກຽດສັກສີ ຂອງເຂົາເຈົ້າ, ໃນວຽກງານດັ່ງກ່າວມີບາງກໍ່ລະນີກໍ່ໄດ້ເຮັດໜັງສືແຈ້ງຕອບເປັນລາຍລັກອັກສອນໃຫ້ແກ່ ຜູ້ເສຍຫາຍ ແລະ ບາງກໍໍລະນີກໍ່ໄດ້ເອີ້ນມາ ສືກສາອົບຮົມ, ຕໍານິຕິຕຽນກ່າວເຕືອນ ພ້ອມທັງເຮັດບັນທືກໄວ້ເພື່ອເປັນຫຼັກຖານ ແລະ ຕິດຕາມການເຄື່ອນໄຫວຂອງຜູ້ກ່ຽວຕໍ່ໄປ.

ຜູ້ເຂົ້າຮ່ວມກອງປະຊຸມໄດ້ຮ່ວມກັນປຶກສາຫາລື ແລກປ່ຽນຄຳຄິດຄຳເຫັນຂອງຢ່າງກົງໄປກົງມາ ໃນການຈັດຕັ້ງປະຕິບັດວຽກງານຄຸ້ມຄອງອິນເຕີເນັດ ພາຍໃນແຂວງບໍ່ແກ້ວ, ລວມທັງວິທີການປະສານງານລະຫວ່າງ ຄະນະກຳມະການຄຸ້ມຄອງອິນເຕີເນັດແຫ່ງຊາດ (ຄຄອຊ) ແລະ ຄະນະກຳມະການຄຸ້ມຄອງອິນເຕີເນັດຂັ້ນແຂວງ ເພື່ອໃຫ້ມີກົນໄກປະສານງານຢ່າງໂລ່ງລ່ຽນ, ທັນສະພາບການ.

ບົດຂ່າວ ແລະ ພາບ ສອຊ.