ເພື່ອຂ່ຳນັບຮັບຕ້ອນ ວັນສະຖາປະນາ ສປປ ລາວ ຄົບຮອບ 48 ປີ (2 ທັນວາ 1975 – 2 ທັນວາ 2023) ແລະ ວັນເກີດ ປະທານ ໄກສອນ ພົມວິຫານ ຄົບຮອບ 103 ປີ (13 ທັນວາ 1920 – 13 ທັນວາ 2023) ສູນອິນເຕີເນັດ ແຫ່ງຊາດ (ສອຊ) ໄດ້ຈັດຕັ້ງການອອກແຮງງານລວມພາຍໃນສູນ ແລະ ມີການປະດັບທຸງຊາດ-ທຸງພັກ, ທຸງທິວ ເພື່ອເປັນການສະເຫຼີມສະຫຼອງວັນສຳຄັນຂອງຊາດ. ຂະບວນການຄັ້ງນີ້ນຳພາໂດຍ ທ່ານ ມີນາໄຊ ພິລາວົງ, ຄະນະພັກກະຊວງ ເຕັກໂນໂລຊີ ແລະ ການສື່ສານ, ເລຂາໜ່ວຍພັກ, ຫົວໜ້າ ສູນອິນເຕີເນັດ ແຫ່ງຊາດ, ພ້ອມທັງມີຄະນະສູນ, ຄະນະພະແນກ, ແລະ ພະນັກງານວິຊາການພາຍໃນສູນອິນເຕີເນັດແຫ່ງຊາດ ແລະ ກົມຄວາມປອດໄພໄຊເບີ ເຂົ້າຮ່ວມຂະບວນການຢ່າງຟົດຟື້ນ.

ຈຸດປະສົງໃນການອອກແຮງງານຄັ້ງນີ້ ນອກຈາກເພື່ອສະເຫຼີມສະຫຼອງວັນຊາດ ຄົບຮອບ 48 ປີ ແລະ ວັນເກີດ ປະທານ ໄກສອນ ພົມວິຫານ ຄົບຮອບ 103 ປີ ແລ້ວ, ອີກດ້ານໜື່ງກໍ່ເພື່ອຮັກສາຄວາມສະອາດທົ່ວ ສອຊ ເນື່ອງຈາກເຫັນເຖິງຄວາມສຳຄັນ ຂອງສະພາບດິນຟ້າອາກາດໃນໄລຍະນີ້, ອາກາດແລ້ງ, ໃບໄມ້ແຫ້ງຫຼາຍ; ເພື່ອປ້ອງກັນເຫດສຸກເສີນທີ່ອາດເກີດຈາກອັກຄີໄພ, ສອຊ ຈຶ່ງໄດ້ສ້າງຂະບວນການອກແຮງງານມ້ຽນມັດເສດໄມ້, ໃບໄມ້ , ອຸປະກອນຕ່າງໆທົ່ວ ສອຊ ໃຫ້ເປັນລະບຽບຮຽບຮ້ອຍ ເພື່ອຮັບປະກັນຄວາມປອດໄພທາງພາຍໃນ ແລະ ພາຍນອກອາຄານ.