ໃນຕອນເຊົ້າຂອງວັນທີ 01 ທັນວາ 2023 ສູນອິນເຕີເນັດ ແຫ່ງຊາດ (ສອຊ) ໄດ້ຈັດກອງປະຊຸມເຜີຍແຜ່ມູນເຊື້ອ ວັນສະຖາປະນາ ສປປ ລາວ ຄົບຮອບ 48 ປີ (2 ທັນວາ 1975 – 2 ທັນວາ 2023) ແລະ ວັນເກີດ ປະທານ ໄກສອນ ພົມວິຫານ ຄົບຮອບ 103 ປີ (13 ທັນວາ 1920 – 13 ທັນວາ 2023) ທີ່ ຫ້ອງປະຊຸມໃຫຍ່ ຂອງ ສອຊ ໂດຍ ການເປັນປະທານຂອງ ທ່ານ ມີນາໄຊ ພິລາວົງ, ຄະນະພັກກະຊວງເຕັກໂນໂລຊີ ແລະ ການສື່ສານ, ເລຂາໜ່ວຍພັກ ຫົວໜ້າ ສູນອິນເຕີເນັດ ແຫ່ງຊາດ, ພ້ອມດ້ວຍ ຄະນະສູນ, ຄະນະພະແນກ ແລະ ພະນັກງານວິຊາການພາຍໃນສຸນ ເຂົ້າຮ່ວມຢ່າງພ້ອມພຽງ.ໃນກອງປະຊຸມ ໄດ້ມີການຮັບຊົມວີດີໂອ ເລົ່າມູນເຊື້ອ ວັນສະຖາປະນາ ສປປ ລາວ ທີ 2 ທັນວາ ຊຶ່ງເປັນວັນທີ່ມີຄວາມໝາຍ-ຄວາມສຳຄັນ ສຳລັບທົ່ວພັກ, ທົ່ວລັດ ແລະ ທົ່ວປວງຊົນລາວທັງຊາດ, ເປັນວັນທີ່ສະແດງໃຫ້ເຫັນເຖິງມູນເຊື້ອອົງອາດກ້າຫານແຫ່ງການຕໍ່ສູ້ຂອງກອງທັບ ແລະ ປະຊາຊົນລາວບັນດາເຜົ່າ ພາຍໃຕ້ການຊີ້ນຳ-ນຳພາອັນສະຫຼາດສ່ອງໃສຂອງ ພັກປະຊາຊົນປະຕິວັດລາວ ຢ່າງພິລະອາດຫານ ຕ້ານຈັກກະພັດຜູ້ຮຸກຮານ ແລະ ການຄອບຄອງຂອງພວກລ່າເມືອງຂຶ້ນທັງແບບເກົ່າ ແລະ ໃໝ່, ສາມາດປົດປ່ອຍປະເທດຊາດໄດ້ຢ່າງມີໄຊ ແລະ ປະກາດສ້າງຕັ້ງ ສປປ ລາວ ຂຶ້ນຢ່າງສະຫງ່າຜ່າເຜີຍ ໃນວັນທີ 2 ທັນວາ 1975, ແລະ ຍັງເປັນວັນທີ່ປະຊາຊົນລາວບັນດາເຜົ່າ ໄດ້ເປັນເຈົ້າຂອງປະເທດຊາດ ຢ່າງແທ້ຈິງ, ມີເອກະລາດຢ່າງສົມບູນ ແລະ ມີອະທິປະໄຕຢ່າງຄົບຖ້ວນ, ມີທີ່ຕັ້ງອັນສົມກຽດ ແລະ ມີຖານະເທົ່າທຽມກັບປະເທດອື່ນໆ ໃນເວທີປະຊາຄົມໂລກ, ແມ່ນວັນແຫ່ງສັນຕິພາບກ້າວສູ່ຍຸກສະໄໝໃໝ່ ແຫ່ງການສ້າງປະເທດໃຫ້ມີສັນຕິພາບ ເອກະລາດ ປະຊາທິປະໄຕ ເອກະພາບ ວັດທະນາຖາວອນ.

ພ້ອມດຽວກັນນັ້ນ, ຍັງໄດ້ຮັບຊົມວີດີໂອ ເລົ່າມູນເຊື້ອ ປະຫວັດຫຍໍ້ ຊີວິດ ພາລະກິດຂອງ ປະທານ ໄກສອນ ພົມວິຫານ ໃນການເຄື່ອນໄຫວແຕ່ລະໄລຍະ, ໂດຍສະເພາະແມ່ນ ມູນເຊື້ອການເຄື່ອນໄຫວພາລະກິດປະຕິວັດອັນອົງອາດກ້າຫານ, ເດັດດ່ຽວໜຽວແໜ້ນຂອງ ປະທານ ໄກສອນ ພົມວິຫານ ຈົນກາຍເປັນນັກຮົບປະຕິວັດທີ່ຍິ່ງໃຫຍ່ຂອງຊາດ, ເປັນວິລະບູລຸດ, ເປັນຜູ້ນຳຂອງພັກ-ລັດ ທີ່ມີຄວາມສາມາດສະຫຼາດສ່ອງໃສ, ເປັນນັກທິດສະດີ ແລະ ພຶດຕິກຳ,ເປັນນັກປຸກລະດົມຂົນຂວາຍ, ເປັນແບບຢ່າງອັນໃສແຈ້ງ, ມີແບບແຜນນໍາພາ, ມີວິທີເຮັດວຽກທີ່ດີ, ເປັນແກ່ນສານຂອງຄວາມສາມັກຄີພາຍໃນພັກ ແລະ ຊາດ, ເປັນຜູ້ທີ່ມີຄຸນສົມບັດສິນທຳປະຕິວັດສູງສົ່ງ, ມີທັດສະນະມະຫາຊົນກວ້າງຂວາງ ເປັນຜູ້ນຳທີ່ບໍລິສຸດປອດໃສ, ເປັນນັກເຄື່ອນໄຫວສາກົນຜູ້ດີເດັ່ນ ທັງເປັນຜູ້ວາງແນວທາງ ແລະ ເປັນແບບຢ່າງປະຕິບັດແນວທາງຕ່າງປະເທດຢ່າງຖືກຕ້ອງ ເຮັດໃຫ້ ສປປ ລາວ ມີບົດບາດໃນເວທີສາກົນ.

ໃນຕອນທ້າຍຂອງກອງປະຊຸມ ທ່ານ ມີນາໄຊ ພິລາວົງ ໄດ້ໃຫ້ກຽດໂອ້ລົມພະນັກງານພາຍໃນສູນ ໃຫ້ສືບຕໍ່ເອົາໃຈໃສ່ຈັດຕັ້ງປະຕິບັດວຽກງານວິຊາສະເພາະທີ່ຕົນຮັບຜິດຊອບ ດ້ວຍຄວາມຮັບຜິດຊອບສູງ ໂດຍໃຫ້ປັບການປະຕິບັດແຕ່ລະໜ້າວຽກໃຫ້ສອດຄ່ອງ ແລະ ແທດເໝາະຕາມສະພາບການຕົວຈິງໃນແຕ່ລະໄລຍະ. ຄຽງຄູ່ກັນນີ້ ທ່ານ ຫົວໜ້າສູນ ຍັງໄດ້ຮຽກຮ້ອງໃຫ້ບັນດາພະນັກງານພາຍໃນສູນທຸກຄົນ ເອົາໃຈໃສ່ໃນການຍົກລະດັບຄວາມຮູ້ ການເພີ່ມຂີດຄວາມສາມາດຂອງຕົນ ເພື່ອນຳມາຜັນຂະຫຍາຍ ແລະ ປະກອບສ່ວນເຂົ້າໃນການຈັດຕັ້ງປະຕິບັດວຽກງານໃນຂົງເຂດທີ່ຕົນຮັບຜິດຊອບຢ່າງຕັ້ງໜ້າ ແລະ ໃຫ້ໄດ້ຮັບຜົນສໍາເລັດຍິ່ງໆຂຶ້ນໄປ.