ຄະນະຊາວໜຸ່ມປະຊາຊົນປະຕິວັດລາວ (ຄຊປປລ) ຮາກຖານ ສູນອິນເຕີເນັດ ແຫ່ງຊາດ (ສອຊ) ໄດ້ຈັດກອງປະຊຸມໃຫຍ່ ຄັ້ງທີ III ຂຶ້ນໃນວັນທີ 30 ພະຈິກ 2023 ທີ່ ຫ້ອງປະຊຸມໃຫຍ່ ຊັ້ນ 2 ຂອງ ສອຊ, ໂດຍການເປັນປະທານຂອງ ສະຫາຍ ມີນາໄຊ ພິລາວົງ ຄະນະພັກກະຊວງ ເຕັກໂນໂລຊີ ແລະ ການສື່ສານ (ກຕສ), ເລຂາໜ່ວຍພັກ, ຫົວໜ້າ ສອຊ, ແລະ ສະຫາຍ ພວງປະເສີດ ແກ້ວສຸວັນ, ຄະນະພັກກະຊວງເຕັກໂນໂລຊີ ແລະ ການສື່ສານ, ກຳມະການຄະນະບໍລິຫານງານ ສູນກາງຊາວໜຸ່ມປະຊາຊົນປະຕິວັດລາວ, ເລຂາຄະນະບໍລິຫານງານຊາວໜຸ່ມ ກຕສ, ພ້ອມທັງມີ ຕາງໜ້າແມ່ຍິງ ແລະ ກຳມະບານ ສອຊ, ຄະນະປະຈຳ-ຄະນະບໍລິຫານງານຊາວໜຸ່ມກະຊວງ, ຕາງຫນ້າຮາກຖານ/ຫນ່ວຍ ຊາວໜຸ່ມ ຫ້ອງການ, ກົມ, ສູນ, ອົງການ, ບໍລິສັດ ອ້ອມຂ້າງກະຊວງ, ແລະ ສະມາຊິກຊາວໜຸ່ມຮາກຖານ ສອຊ, ເຂົ້າຮ່ວມທັງໝົດ 68 ສະຫາຍ, ຍິງ 27 ສະຫາຍ.

ໃນໂອກາດນີ້, ສະຫາຍ ໄຊສົມຫວັງ ສຸວັນນະວົງ, ຄະນະປະຈຳ-ຮອງປະທານກວດກາ ຄະນະບໍລິຫານງານຊາວໜຸ່ມ ກຕສ, ເລຂາຄະນະບໍລິຫານງານຊາວໜຸ່ມຮາກຖານ ສອຊ ໄດ້ຂຶ້ນຜ່ານ ຮ່າງບົດລາຍງານການເມືອງ ແລະ ທິດທາງແຜນການ 05 ປີຕໍ່ໜ້າ ພ້ອມທັງຕີລາຄາດ້ານດີ, ດ້ານອ່ອນ, ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້. ຫຼັງຈາກນັ້ນ ສະຫາຍ ສຸລິສັກ ພົມມະແສນ, ຮອງເລຂາຄະນະບໍລິຫານງານຊາວໜຸ່ມຮາກຖານ ສອຊ ໄດ້ຂຶ້ນຜ່ານ ຮ່າງບົດສໍາຫຼວດການນໍາພາ-ຊີ້ນໍາລວມ ຂອງຄະນະຊາວໜຸ່ມຮາກຖານ ສອຊ. ພ້ອມດຽວກັນນີ້ ຍັງໄດ້ມີພິທີມອບໃບຍ້ອງຍໍຜົນງານ 05 ປີ ໃຫ້ຄະນະບໍລິຫານງານຊາວໜຸ່ມຮາກຖານ ສອຊ ຊຸດເກົ່າ ແລະ ພິທີມອບຮັບໃບຢັ້ງຢືນ 4 ບຸກ ປີ 2021 ໃຫ້ຄະນະຮາກຖານຊາວໜຸ່ມ ສອຊ.

ໃນກອງປະຊຸມ ສະຫາຍ ມີນາໄຊ ພິລາວົງ ໄດ້ໃຫ້ກຽດມີຄຳເຫັນຊີ້ນຳຕໍ່ກອງປະຊຸມໃຫຍ່ ແລະ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານການຊີ້ນໍາ-ນໍາພາ ຂອງ ຄະນະຊາວໜຸ່ມຮາກຖານ ສອຊ ໃນໄລຍະຜ່ານມາ. ພ້ອມນັ້ນ, ສະຫາຍຍັງໄດ້ສະແດງຄວາມເປັນຫ່ວງເປັນໄຍຕໍ່ດ້ານອ່ອນ ແລະ ບາງຂໍ້ຄົງຄ້າງ ທີ່ຄະນະຊາວໜຸ່ມຮາກຖານ ສອຊ ຈະຕ້ອງໄດ້ສູ້ຊົນປັບປຸງແກ້ໄຂ. ສະຫາຍຍັງໄດ້ຮຽກຮ້ອງໃຫ້ບັນດາສະຫາຍຜູ້ແທນກອງປະຊຸມ ຍົກສູງສະຕິຄວາມຮັບຜິດຊອບ ແລະ ຄຳນຶງເຖິງຄວາມສຳຄັນຂອງການຕັດສິນໃຈເລືອກເອົາຄະນະບໍລິຫານງານຊາວໜຸ່ມຊຸດໃໝ່ ເຊິ່ງຈະເປັນຜູ້ນຳພາເຄື່ອນໄຫວວຽກງານຊາວໜຸ່ມທີ່ຕິດພັນກັບວຽກງານວິຊາສະເພາະ ໃນອີກ 5 ປີ ຕໍ່ໜ້າ ໂດຍການຄຳນຶງເຖິງມາດຖານເງື່ອນໄຂ, ຄວາມຮູ້ ຄວາມສາມາດ, ວິໄສທັດ ແລະ ຄວາມເປັນຜູ້ນຳ ພ້ອມທັງສະເໜີໃຫ້ບັນດາສະຫາຍຜູ້ແທນກອງປະຊຸມພ້ອມກັນປະຕິບັດການລົງຄະແນນສຽງໃຫ້ຖືກຕາມກົດລະບຽບ ແລະ ຂັ້ນຕອນ ທີ່ທາງຄະນະຄວບຄຸມການປ່ອນບັດແນະນຳຢ່າງເຂັ້ມງວດ ເພື່ອເຮັດໃຫ້ກອງປະຊຸມໃຫຍ່ຄັ້ງນີ້ເກີດປະໂຫຍດສູງສຸດ ແລະ ບັນລຸຕາມເປົ້າໝາຍທີ່ໄດ້ວາງໄວ້.

ບັນດາຜູ້ແທນກອງປະຊຸມ ໄດ້ພ້ອມກັນນໍາໃຊ້ສິດປະຊາທິປະໄຕຂອງຕົນ ປ່ອນບັດເລືອກຕັ້ງເອົາຄະນະບໍລິຫານງານຊາວໜຸ່ມຮາກຖານ ສອຊ ຊຸດໃໝ່ ບົນພື້ນຖານຫຼັກການລວມສູນປະຊາທິປະໄຕ ທັງຖືກຕ້ອງສອດຄ່ອງກັບມາດຖານເງື່ອນໄຂທີ່ກໍານົດໄວ້, ຊຶ່ງມີຜູ້ລົງຮັບສະໝັກເລືອກຕັ້ງທັງໝົດ 11 ສະຫາຍ, ຍິງ 02 ສະຫາຍ ແລະ ເລືອກໄດ້ 07 ສະຫາຍ. ກອງປະຊຸມຄັ້ງປະຖົມມະລຶກຄົບຄະນະປະທານກອງປະຊຸມໃຫຍ່ ໄດ້ຕົກລົງເຫັນດີຮັບຮອງເອົາ ຄະນະບໍລິຫານງານຊາວໜຸ່ມ ຄື: ສະຫາຍ ສຸລິສັກ ພົມມະແສນ ເປັນ ເລຂາ; ສະຫາຍ ຈະຕຸພົນ ພູມິນ ເປັນ ຮອງເລຂາ, ປະທານກວດກາ; ສະຫາຍ ນ. ສຸວັນນີ ໄຊສົງຄາມ ເປັນ ຮອງເລຂາ; ສະຫາຍ ທົງໄຊ ພຸດທະວົງສີ ເປັນ ຮອງປະທານກວດກາ; ສະຫາຍ ພິມພອນ ສິດລາກອນ ເປັນ ກຳມະການ; ສະຫາຍ ສົມນຶກ ແກ້ວທະວີໄຊ ເປັນ ກຳມະການ ແລະ ສະຫາຍ ນ. ພິມມະສອນ ອິນທະເພັດ ເປັນ ກຳມະການ.

ໃນຕອນທ້າຍຂອງກອງປະຊຸມ ຍັງໄດ້ຮັບຟັງການໂອ້ລົມອັນມີຄວາມໝາຍໜັກແໜ້ນ ແລະ ເລິກເຊິ່ງຈາກ ສະຫາຍ ພວງປະເສີດ ແກ້ວສຸວັນ, ຊຶ່ງສະຫາຍໄດ້ເຫັນດີເປັນເອກະພາບຕໍ່ການຕີລາຄາສະພາບການເຄື່ອນໄຫວຂອງຄະນະຊາວໜຸ່ມຮາກຖານ ສອຊ ໃນໄລຍະຜ່ານມາ ເເລະ ເຫັນດີ ເປັນເອກະພາບ ຕໍ່ບົດລາຍງານການເມືອງ ແລະ ບົດສຳຫຼວດການນຳພາ ຂອງຄະນະຊາວໜຸ່ມ ຊຸດເກົ່າ ແລະ ຊົມເຊີຍ ຕໍ່ຜົນສໍາເລັດທີ່ຄະນະຊາວໜຸ່ມ ຍາດມາໄດ້ໃນໄລຍະຜ່ານມາ ຊຶ່ງເປັນຜົນງານອັນໃຫຍ່ຫຼວງ ແລະ ເປັນພື້ນຖານອັນສໍາຄັນໃຫ້ແກ່ການສືບຕໍ່ ຜັນຂະຫຍາຍເຂົ້າໃນຂົງເຂດວຽກງານຊາວໜຸ່ມຮາກຖານ ສອຊ ພາຍໃຕ້ຂໍ້ແຂ່ງຂັນ 4 ບຸກ ທີ່ຕິດພັນກັບການເຄື່ອນໄຫວວຽກງານວິຊາສະເພາະ. ພ້ອມທັງໄດ້ເນັ້ນໜັກໃຫ້ ຄະນະຊາວໜຸ່ມຮາກຖານ ສອຊ ສືບຕໍ່ນໍາພາ ສະມາຊິກຊາວໜຸ່ມພາຍໃນຮາກຖານ, ປະຕິບັດວຽກງານທີ່ຖືກມອບໝາຍໃຫ້ຢ່າງຕັ້ງໜ້າ, ເພີ່ມທະວີຄວາມສາມັກຄີ ພາຍໃຕ້ການນໍາພາ ຂອງພັກ ແລະ ເຊີດຊູຄວາມຮັບຜິດຊອບສູງໃນໜ້າທີ່ວຽກງານການເມືອງ ຂອງຕົນ ແລະ ສຸມໃສ່ໜ້າທີ່ວຽກງານທີ່ໄດ້ຮັບມອບໝາຍ ປະກອບສ່ວນເຮັດໃຫ້ວຽກງານດັ່ງກ່າວປະສົບຜົນສຳເລັດຕາມແຜນການທີ່ວາງໄວ້ຢ່າງຈົບງາມ.