ກະຊວງເຕັກໂນໂລຊີ ແລະ ການສື່ສານ ຮ່ວມກັບ ກະຊວງເສດຖະກິດ ແລະ ການເງິນ ສ.ເກົາຫຼີ ຈັດສຳມະນາເປີດໂຄງການ ທີ່ປຶກສາເພື່ອຍົກລະດັບ ລະບົບອອກໃບຮັບຮອງລາຍເຊັນເອເລັກໂຕຣນິກ ຂອງ ສປປ ລາວ ໂດຍການເປັນປະທານຂອງ ທ່ານ ແກ້ວວິສຸກ ໂສລະພົມ ຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ແລະ ທ່ານ ເຊ ຊູຮອນ ທີ່ປຶກສາອາວຸໂສ ຈາກ ສະຖາບັນການພັດທະນາເກົາຫຼີ (KDI), ເຊິ່ງຜູ້ເຂົ້າຮ່ວມມີຊ່ຽວຊານຈາກ ສ.ເກົາຫຼີ ມີຕາງໜ້າຈາກບັນດາກົມ ພາຍໃນກະຊວງ ເຕັກໂນໂລຊີ ແລະ ການສື່ສານ, ຕາງໜ້າ ຈາກກະຊວງອ້ອມຂ້າງ ແລະ ພາກສ່ວນກ່ຽວຂ້ອງ ຫຼາຍກວ່າ 30 ທ່ານ, ສຳມະນາດັ່ງກ່າວ ແມ່ນຈັດຂຶ້ນໃນຕອນເຊົ້າຂອງວັນທີ 02 ພະຈິກ ທີ່ໂຮງແຮມ ລາວພລາຊາ.

        ຈຸດປະສົງໃນການຈັດສຳມະນາໃນຄັ້ງນີ້ ແມ່ນເພື່ອ ເປີດໂຕໂຄງການທີ່ປຶກສາເພື່ອຍົກລະດັບ ລະບົບອອກໃບຮັບຮອງລາຍເຊັນເອເລັກໂຕຣນິກ ຂອງ ສປປ ລາວ ເຊິ່ງເປັນໂຄງການຊ່ວຍເຫຼືອຫຼ້າ (ODA) ໃນນາມຂອງລັດຖະບານເກົາຫຼີ ໃນແຄັມເປນ 2023/24 Knowledge Sharing Program (KSP) ທີ່ທາງ ກະຊວງ ເຕັກໂນໂລຊີ ແລະ ການສື່ສານ ໄດ້ຂຶ້ນແຜນໂຄງການສະເໜີຂໍການຊ່ວຍເຫຼືອໄປ ໃນປີ 2021, ປັດຈຸບັນ ໄດ້ຖືກອະນຸມັດ ແລະ ຈະເລີ່ມຈັດຕັ້ງປະຕິບັດໃນສົກປີ 2023-2024. ໃນນີ້ ສູນອິນເຕີເນັດ ແຫ່ງຊາດ, ກະຊວງເຕັກໂນໂລຊີ ແລະ ການສື່ສານ ແມ່ນເປັນຜູ້ຄຸ້ມຄອງລະບົບອອກໃບຮັບຮອງລາຍເຊັນເອເລັກໂຕຣນິກ ແລະ ເປັນຫຼັກໃນການຈັດຕັ້ງປະຕິບັດໂຄງການໃນຝ່າຍ ສປປ ລາວ. ສະຖາບັນພັດທະນາເກົາຫຼີ (KDI), ກະຊວງເສດຖະກິດ ແລະ ການເງິນ ສ. ເກົາຫຼີ ແມ່ນເປັນຜູ້ຮັບຜິດຊອບໂຄງການ ຝ່າຍ ສ.ເກົາຫຼີ ຮ່ວມກັບ ບໍລິສັດ IGB&Company ແລະ ສູນຮັບຮອງຂໍ້ມູນຂ່າວສານເກົາຫຼີ (KICA) ເຊິ່ງຈະເປັນຜູ້ຄົ້ນຄວ້າສ້າງແຜນໃນການຍົກລະດັບລະບົບອອກໃບຮັບຮອງລາຍເຊັນເອເລັກໂຕຣນິກ ຂອງ ສປປ ລາວ.

         ສຳມະນາດັ່ງກ່າວ ທ່ານ ແກ້ວວິສຸກ ໂສລະພົມ ຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ແລະ ທ່ານ ເຊ ຊູຮອນ ທີ່ປຶກສາອາວຸໂສ ຈາກ ສະຖາບັນການພັດທະນາເກົາຫຼີ (KDI) ໄດ້ມີຄຳເຫັນຕໍ່ກັບສຳມະນາ ເຮັດໃຫ້ນັກສຳມະນາກອນ ໄດ້ຮັບຮູ້ກ່ຽວກັບ ທີ່ມາ, ຈຸດປະສົງ ແລະ ຄວາມໝາຍຄວາມສຳຄັນຂອງໂຄງການ, ພ້ອມນີ້ ນັກສຳມະນາກອນຍັງໄດ້ຮັບຟັງການນຳສະເໜີກ່ຽວກັບ ສູນຮັບຮອງລາຍເຊັນເອເລັກໂຕຣນິກແຫ່ງຊາດ ຈາກ ສູນອິນເຕີເນັດ ແຫ່ງຊາດ ພ້ອມທັງຮັບຟັງ ແນວທາງແຜນການຂອງການຈັດຕັ້ງປະຕິບັດໂຄງການໃນໄລຍະ 01ປີ (2023-2024) ຈາກຊ່ຽວຊານເກົາຫຼີ.

ອີງໃສ່ ວິໄສທັດການພັດທະນາເສດຖະກິດດິຈິຕ໋ອນ ແຫ່ງຊາດ 20 ປີ (2021-2040), ຍຸດທະສາດການພັດທະນາເສດຖະກິດດິຈິຕ໋ອນແຫ່ງຊາດ 10 ປີ (2021-2030) ແລະ ແຜນພັດທະນາເສດຖະກິດດິຈິຕ໋ອນ ແຫ່ງຊາດ 5 ປີ (2021-2025), ກະຊວງເຕັກໂນໂລຊີ ແລະ ການສື່ສານ ໄດ້ເອົາໃຈໃສ່ ຈັດຕັ້ງປະຕິບັດຢ່າງຕັ້ງໜ້າ ສະແດງອອກໃນການຄົ້ນຄວ້າສ້າງນິຕິກຳຄຸ້ມຄອງ, ສ້າງພື້ນຖານໂຄງລ່າງເພື່ອອຳນວຍຄວາມສະດວກໃຫ້ແກ່ການພັດທະນາລະບົບເອເລັກໂຕຣນິກ ທັງພາກລັດ ແລະ ເອກະຊົນ. ການສ້າງສູນອອກໃບຮັບຮອງລາຍເຊັນເອເລັກໂຕຣນິກ ແຫ່ງຊາດ ເຊິ່ງຄຸ້ມຄອງໂດຍສູນອິນເຕີເນັດ ແຫ່ງຊາດ ກໍ່ເປັນອີກວຽກງານໜຶ່ງທີ່ຕິດພັນ ແລະ ນອນຢູ່ໃນແຜນການຫັນເປັນດິຈິຕອນ ທີ່ຈະສົ່ງເສີມໃຫ້ສັງຄົມລາວ ມີຄວາມຮັບຮູ້ກ່ຽວກັບໜ້າທີ່ ແລະ ຄວາມສຳຄັນ ຂອງລາຍເຊັນດິຈິຕ໋ອນ ໃນຍຸກເສດຖະກິດດິຈິຕອນ, ການນຳໃຊ້ ການຢັ້ງຢືນຕົວຕົນທາງເລັກໂຕຣນິກ ເຂົ້າໃນການເຮັດທຸລະກຳທາງເອເລັກໂຕຣນິກ ໃນຂົງເຂດຕ່າງໆປີ່ນອ້ອມ ລວມໄປເຖິງຮັບຮູ້ເຖິງຄວາມສຳຄັນ ແລະ ຄວາມປອດໄພຂອງການຢັ້ງຢືນຂໍ້ມູນຜ່ານອິນເຕີເນັດ.

ໂຄງການປຶກສາເພື່ອຍົກລະດັບ ລະບົບອອກໃບຮັບຮອງລາຍເຊັນເອເລັກໂຕຣນິກ ຂອງ ສປປ ລາວ ນີ້ ຈິ່ງປຽບສະເໝືອນເປັນໂຕປະເມີນຄືນຄວາມອາດສາມາດຂອງລະບົບຂອງເຮົາທີ່ມີໃນປັດຈຸບັນ, ວິເຄາະຫາຄວາມຕ້ອງການໃນການປັບປຸງລະບົບ ປຽບທຽບໃສ່ແນວທາງການພັດທະນາເສດຖະກິດໃນປັດຈຸບັນ ສ້າງເປັນແຜນເພີ່ມຂີດຄວາມສາມາດ ທັງໃນດ້ານເຕັກນິກ ແລະ ດ້ານບຸກລະຄາກອນ ເພື່ອໃຫ້ຮັບປະກັນການຮັບໃຊ້ແກ່ສັງຄົມ.