ໃນວັນທີ 26 ຕຸລາ 2023 ທີ່ຜ່ານມາ ທີ່ ສູນອິນເຕີເນັດແຫ່ງຊາດ (ສອຊ) ໄດ້ຕ້ອນຮັບຂະບວນທັດສະນະ ສຶກສາຂອງຄູອາຈານ ແລະ ນັກສຶກສາຈາກ ຈາກສະຖາບັນການເມືອງ ແລະ ການປົກຄອງແຫ່ງຊາດ, ນຳພາຄະນະໂດຍ ທ່ານ ປອ. ນ. ພອນມະນີ ບຸນຄ້ຳ ຫົວໜ້າພາກວິຊາວິທະຍາສາດການປົກຄອງ, ພ້ອມດ້ວຍ ບັນດາຄູອາຈານ ແລະ ນັກສຶກສາທັງໝົດ 25 ທ່ານ.

      ໃຫ້ກຽດກ່າວຕ້ອນຮັບຄະນະຄູອາຈານ ແລະ ນັກສຶກສາໂດຍ ທ່ານ ມີນາໄຊ ພິລາວົງ ຫົວໜ້າ ສູນອິນເຕີເນັດ ແຫ່ງຊາດ(ສອຊ) ພ້ອມດ້ວຍຄະນະ ທີ່ມາຈາກບັນດາພະແນກພາຍໃນ ສອຊ ລວມທັງໝົດ 09 ທ່ານ.

ທັງສອງຝ່າຍໄດ້ແນະນຳບັນດາສະມາຊິກຂອງຕົນໃຫ້ອີກຝ່າຍຊາບ. ຕໍ່ມາ, ທ່ານ ພົມມະທັດ ພູມະນີວົງ ຮອງຫົວໜ້າ ສອຊ ໄດ້ໃຫ້ກຽດຂື້ນນຳສະເໜີກ່ຽວກັບ ພາລະບົດບາດ ແລະ ວຽກງານຂອງ ສອຊ ໂດຍຫຍໍ້ ເປັນຕົ້ນແມ່ນ: ວຽກງານລວມສູນການສື່ສານ, ວຽກງານສູນຂໍ້ມູນແຫ່ງຊາດ, ວຽກງານລະຫັດຊື່ອິນເຕີເນັດ (.LA), ວຽກງານການອອກໃບຮັບຮອງລາຍເຊັນເອເລັກໂຕຣນິກ ແລະ ວຽກງານຫ້ອງການກອງເລຂາ ຄະນະ ກຳມະການຄຸ້ມຄອງອິນເຕີເນັດແຫ່ງຊາດ. ເຊິ່ງທາງຄະນະຄູອາຈານ ແລະ ນັກສຶກສາ ໄດ້ສະແດງຄວາມສົນໃຈ ແລະ ຕັ້ງຄຳຖາມ ເພື່ອແລກປ່ຽນຄວາມຮູ້ ກ່ຽວກັບ ການຄຸ້ມຄອງວຽກງານໄອຊີທີໂດຍລວມ ພາຍໃຕ້ ຄວາມຮັບຜິດຊອບ ຂອງ ສອຊ ຢ່າງຟົດຟື້ນ.

    ຫຼັງຈາກນັ້ນ ທ່ານ ພົມມະທັດ ພູມະນີວົງ ກໍ່ໄດ້ນຳພາຄະນະດັ່ງກ່າວ ເຂົ້າຢ້ຽມຊົມຫ້ອງສູນຂໍ້ມູນ ແລະ ໄດ້ອະທິບາຍການເຮັດວຽກໂດຍລວມ ກ່ຽວກັບລະບົບເຕັກນິກ ແລະ ລະບົບຮັກສາຄວາມປອດໄພຂອງ ສູນຂໍ້ມູນ ແຫ່ງຊາດ.

ບົດຂ່າວ ແລະ ພາບ: ສອຊ