ໃນຕອນບ່າຍ ວັນທີ 13 ຕຸລາ 2023, ສູນອິນເຕີເນັດ ແຫ່ງຊາດ ໄດ້ຈັດຕັ້ງການອອກແຮງງານລວມ ຂອງພະນັກງານທົ່ວສູນ ຢ່າງເປັນຂະບວນຟົດຟື້ນ ເນື່ອງໃນໂອກາດວັນສຳຄັນຂອງຊາດ ກໍ່ຄື ວັນປະກາດເອກະລາດ ຄົບຮອບ 78 ປີ (12/10/1945 -12/10/2023), ພ້ອມທັງເປັນການສ້າງຂະບວນການຂ່ຳນັບຮັບຕ້ອນ ກອງປະຊຸມໃຫຍ່ຂອງ ສາມອົງການຈັດຕັ້ງມະຫາຊົນ ຂອງ ສຸນອິນເຕີເນັດ ແຫ່ງຊາດ. ສະມາຊິກຂອງສາມອົງການຈັດຕັ້ງມະຫາຊົນ ສູນອິນເຕີເນັດແຫ່ງຊາດໄດ້ຮ່ວມແຮງ ຮ່ວມໃຈກັນ ອະນາໄມ ແລະ ສ້າງຄວາມເປັນລະບຽບຮຽບຮ້ອຍອ້ອມຮອບອາຄານ ສະຖານທີ່ ສູນອິນເຕີເນັດ ແຫ່ງຊາດ; ໄດ້ຕັດຕົ້ນໄມ້ບາງຈຳນວນທີ່ເຫັນວ່າມີຄວາມສ່ຽງ ແລະ ຕັດແຕ່ງກີ່ງໄມ້ບາງສ່ວນ ເພື່ອປ້ອງກັນພະຍຸລົມແຮງ ທີ່ອາດຈະເຮັດໃຫ້ຕົ້ນໄມ້ອ້ອມຮອບຫັກລົ້ມໃສ່ຕືກອາຄານ ແລະ ພາຫະນະຕ່າງໆ, ໄດ້ພາກັນມ້ຽນມັດເສດໄມ້ ແລະ ໃບໄມ້ແຫ້ງ ເພື່ອປ້ອງກັນເຫດສຸກເສີນທີ່ອາດເກີດຈາກອັກຄີໄພ, ທັງເປັນການເປັນການສະກັດກັ້ນໄຂ້ເລືອດອອກ ໂດຍໄດ້ພາກັນຖາງຫຍ້າ, ກຳຈັດບ່ອນນ້ຳຂັງ ທີ່ເປັນບ່ອນເພາະພັນ ແຜ່ເຊື້ອຂອງຍຸງລາຍ.

ຂະບວນການຄັ້ງນີ້ນຳພາໂດຍ ສະຫາຍ ວົງນ້ອຍ ສີວັນທອງ, ຮອງເລຂາໜ່ວຍພັກ ຮອງຫົວໜ້າສູນອິນເຕີເນັດແຫ່ງຊາດ, ມີສະມາຊິກ ຊາວໜຸ່ມ,​ແມ່ຍິງ ແລະ ກຳມະບານຂອງສູນເຂົ້າຮ່ວມ ຫຼາຍກວ່າ 50 ສະຫາຍ.

ພາບ ແລະ ຂ່າວ: ສອຊ