ໃນຕອນບ່າຍຂອງວັນທີ 09 ຕຸລາ 2023 ນີ້, ທີ່ຫ້ອງປະຊຸມ ຂອງສູນອິນເຕີເນັດແຫ່ງຊາດ, ກະຊວງເຕັກໂນໂລຊີ ແລະ ການສື່ສານ (ກຕສ), ໄດ້ມີພິທີຮັບເອົາມະຫາຊົນກ້າວໜ້າເຂົ້າເປັນສະມາຊິກພັກສໍາຮອງ ຂອງ 02 ໜ່ວຍພັກພາຍໃນ ອົງຄະນະພັກ ກຕສ ປະກອບມີ: ໜ່ວຍພັກສູນອິນເຕີເນັດແຫ່ງຊາດ ແລະ ໜ່ວຍພັກສູນບໍລິຫານລັດດິຈີຕອນ ໃຫ້ກຽດເປັນປະທານໂດຍ ສະຫາຍ ແກ້ວວິສຸກ ໂສລະພົມ ຄະນະປະຈໍາພັກ, ຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ, ມີບັນດາສະຫາຍເລຂາ, ຮອງເລຂາ ຂອງໜ່ວຍພັກກົມ/ທຽບເທົ່າ ພ້ອມດ້ວຍສະມາຊິກພັກ ໜ່ວຍພັກສູນອິນເຕີເນັດ ແຫ່ງຊາດ ແລະ ໜ່ວຍພັກສູນບໍລິຫານລັດດິຈິຕອນ ເຂົ້າຮ່ວມ ຢ່າງພ້ອມພຽງ.

ໃນພິທີດັ່ງກ່າວ, ສະຫາຍ ມີນາໄຊ ພິລາວົງ, ຄະນະພັກກະຊວງ ຕສ, ເລຂາໜ່ວຍພັກ, ຫົວໜ້າ ສູນອິນເຕີເນັດ ແຫ່ງຊາດ ໄດ້ຂຶ້ນຜ່ານ ມະຕິຕົກລົງ ວ່າດ້ວຍການອະນຸມັດໃຫ້ມະຫາຊົນກ້າວໜ້າ ສູນອິນເຕີເນັດ ແຫ່ງຊາດ ເຂົ້າເປັນສະມາຊິກພັກສໍາຮອງ ຈໍານວນ 02 ສະຫາຍ ຄື: ສະຫາຍ ອານົງ ແກ້ວປະເສີດ ແລະ ສະຫາຍ ນັນທະກອນ ກຸລະວົງ. ຈາກນັ້ນ, ສະຫາຍ ຄໍາຜາຍ ອິນທະຣາ, ຕາງໜ້າໜ່ວຍພັກ, ຮອງຫົວໜ້າ ສູນບໍລິຫານລັດດິຈີຕອນ ໄດ້ຂຶ້ນຜ່ານ ມະຕິຕົກລົງ ວ່າດ້ວຍການອະນຸມັດໃຫ້ມະຫາຊົນກ້າວໜ້າ ສູນບໍລິຫານລັດດິຈີຕອນ ເຂົ້າເປັນສະມາຊິກພັກສໍາຮອງ ຈໍານວນ 01 ສະຫາຍ ຄື: ສະຫາຍ ມັງກອນທອງ ມະນີວົງ.

ໂອກາດດຽວກັນນີ້, ສະຫາຍ ແກ້ວວີສຸກ ໂສລະພົມ ກໍໄດ້ໃຫ້ກຽດມອບມະຕິຕົກລົງ ແລະ ປື້ມກົດລະບຽບພັກປະຊາຊົນປະຕິວັດລາວ ສະໄໝທີ XI ໃຫ້ກັບສະມາຊິກພັກສໍາຮອງໃໝ່. ພ້ອມນັ້ນ, ສະຫາຍຍັງໄດ້ກ່າວສະແດງຄວາມຍິນດີ, ຍ້ອງຍໍຊົມເຊີຍ ແລະ ໂອ້ລົມ ຜູ້ທີ່ໄດ້ເຂົ້າເປັນສະມາຊິກພັກໃໝ່ ໂດຍໄດ້ເນັ້ນໜັກໃຫ້ບັນດາສະມາຊິກພັກໃໝ່ ແລະ ສະມາຊິກພັກທັງໝົດ ຈົ່ງມີຄວາມຫ້າວຫັນ ສືບຕໍ່ຝຶກຝົນຫຼໍ່ຫຼອມຕົນເອງ ທາງດ້ານຄວາມຮູ້, ຄວາມສາມາດ ແລະ ຈັດຕັ້ງປະຕິບັດບັນດາກົດລະບຽບ ແລະ ນິຕິກໍາຕ່າງໆ ຂອງພັກປະຊາຊົນປະຕິວັດລາວທີ່ວາງອອກຢ່າງເຂັ້ມງວດ. ໂດຍສະເພາະແມ່ນການເອົາໃຈໃສ່ພັດທະນາຕົນເອງ, ຮັບຜິດຊອບໜ້າທີ່ຂອງຕົນ ທີ່ພັກ ແລະ ການຈັດຕັ້ງ ໄດ້ມອບໝາຍໃຫ້ ພ້ອມທັງເປັນແບບຢ່າງໃນທຸກຂະບວນການ ໃຫ້ກາຍເປັນສະມາຊິກພັກທີ່ມີຄຸນທາດການເມືອງ, ມີຄຸນສົມບັດສິນທໍາປະຕິວັດທີ່ໜັກແໜ້ນ, ຍົກລະດັບຄວາມຮູ້, ຄວາມສາມາດທາງດ້ານວິຊາສະເພາະ, ທິດສະດີການເມືອງ ເພື່ອສາມາດຕອບສະໜອງໄດ້ຕາມຄວາມຮຽກຮ້ອງຕ້ອງການ ແລະ ປະກອບສ່ວນເຂົ້າໃນການສ້າງສາພັດທະນາປະເທດຊາດ.

ບົດຂ່າວໂດຍ ສອຊ