ໃນຕອນເຊົ້າຂອງວັນທີ 13 ກັນຍາ 2023, ທີ່ ສູນອິນເຕີເນັດ ແຫ່ງຊາດ, ກະຊວງ ເຕັກໂນໂລຊີ ແລະ ການສື່ສານ ໄດ້ມີພິທີເປີດ “ຊຸດຝືກອົບຮົມ ວຽກງານ ລາຍເຊັນດິຈິຕ໋ອນ ແລະ ການຢັ້ງຢືນເອເລັກໂຕຣນິກ ລາວ-ຫວຽດນາມ” ໃນຫົວຂໍ້: ການຄຸ້ມຄອງພື້ນຖານໂຄງລ່າງ ຄູ່ກະແຈສາທາລະນະ (Public Key Infrastructure system Administrative) ໂດຍມີ ທ່ານ ມີນາໄຊ ພິລາວົງ ຫົວໜຸ້າສູນອິນເຕີເນັດ ແຫ່ງຊາດ (LANIC), ກະຊວງ ເຕັກໂນໂລຊີ ແລະ ການສື່ສານ (ກຕສ) ແລະ ທ່ານ ຟາມ ກວັກ ຫວນ (Mr. Pham Quoc Hoan), ຮອງຫົວໜ້າສູນຮັບຮອງລາຍເຊັນເອເລັກໂຕຣນິກ ແຫ່ງຊາດ (NEAC), ສສ ຫວຽດນາມ, ກະຊວງ ຖະແຫຼງຂ່າວ ແລະ ການສື່ສານ (MIC) ສສ ຫວຽດນາມ. ມີບັນດາທ່ານຄະນະພະແນກ ແລະ ຊ່ຽວຊານຂອງທັງສອງສູນ, ບັນດານັກສໍາມະນາກອນ ຕາງໜ້າຈາກບັນດາກົມພາຍໃນກະຊວງ ຕສ, ກະຊວງອ້ອມຂ້າງ, ຜູ້ໃຫ້ບໍລິການອອກໃບຮັບຮອງລາຍເຊັນເອເລັກໂຕຣນິກ ແລະ ພາກສ່ວນກ່ຽວຂ້ອງ ເຂົ້າຮ່ວມຢ່າງພ້ອມພຽງ.

ການຈັດຝຶກອົບຮົມໃນຄັ້ງນີ້ ແມ່ນເປັນໝາກຜົນຈາກການຮ່ວມມືພາຍໃຕ້ບົດບັນທຶກຄວາມເຂົ້າໃຈ ແລະ ແຜນການຮ່ວມມື ລະຫວ່າງ ກະຊວງ ເຕັກໂນໂລຊີ ແລະ ການສື່ສານ ສປປ ລາວ ແລະ ກະຊວງ ຖະແຫຼງຂ່າວ ແລະ ການສື່ສານ ສສ ຫວຽດນາມ, ການຮ່ວມມືໃນກອບວຽກງານສະເພາະ ເຊິ່ງກໍ່ແມ່ນວຽກງານ ລາຍເຊັນດິຈິຕ໋ອນ ແລະ ການຮັບຮອງທາງເອເລັກໂຕຣນິກ ລະຫວ່າງ LANIC ແລະ NEAC. ຊຸດຝຶກອົບຮົມໃນມື້ນີ້ ຈະຖືເປັນຂີດໝາຍອັນສຳຄັນ ໃນການສ້າງຈິດສຳນຶກ ແລະ ຄວາມຮັບຮູ້ໃນສັງຄົມລາວ ກ່ຽວກັບການນຳໃຊ້ ການຢັ້ງຢືນຕົວຕົນທາງເລັກໂຕຣນິກ ກໍຄື ໜ້າທີ່ ແລະ ຄວາມສຳຄັນ ຂອງລາຍເຊັນດິຈິຕ໋ອນ ໃນຍຸກເສດຖະກິດດິຈິຕ໋ອນ, ການນຳໃຊ້ເຂົ້າໃນການເຮັດທຸລະກຳທາງເອເລັກໂຕຣນິກ ໃນຂົງເຂດຕ່າງໆປີ່ນອ້ອມ ລວມໄປເຖິງຮຽນຮູ້ພື້ນຖານ ແລະ ລະດັບຄວາມປອດໄພຂອງລະບົບຄູ່ກະແຈສາທະລະນະ ພ້ອມທັງ ແລກປ່ຽນບົດຮຽນນຳ ຄະນະຊ່ຽວຊານ ຈາກສູນ NEAC ສສ ຫວຽດນາມ ເຊິ່ງເປັນຜູ້ທີ່ປະສົບຜົນສຳເລັດ ແລະ ຖືກນຳໃຊ້ໃນສັງຄົມ ເປັນຈຳນວນຫຼາຍແລ້ວ.

ບົດຮຽນຈາກຊຸດຝຶກອົບຮົມໃນຄັ້ງນີ້, ສູນອິນເຕີເນັດ ແຫ່ງຊາດ ຈະໄດ້ນໍາໄປຜັນຂະຫຍາຍເຂົ້າໃນການພັດທະນາ ເພື່ອຍົກລະດັບລະບົບຮັບຮອງລາຍເຊັນເອເລັກໂຕຣນິກ ຂອງ ສປປ ລາວ, ສ້າງບັນດາ ລະບຽບການ, ນິຕິກໍາ ແລະ ການຈັດຕັ້ງປະຕິບັດ ທີີ່ຕິດພັນກັບໜ້າວຽກຕົວຈິງ ເພື່ອກະກຽມຄວາມພ້ອມ ໃນການຫັນເປັນດິຈິຕອນ (Digital Transformation) ແລະ ການພັດທະນາເສດຖະກິດດິຈິຕອນ (Digital Economy) ໃຫ້ສອດຄ່ອງກັບແຜນພັດທະນາເສດຖະກິດຂອງຊາດ.