ໃນວັນທີ 07 ກັນຍາ 2023, ສຸນອິນເຕີເນັດ ແຫ່ງຊາດ ໄດ້ຈັດພິທີສະເຫຼີມສະຫຼອງວັນສ້າງຕັ້ງ ສູນອິນເຕີເນັດ ແຫ່ງຊາດ ຄົບຮອບ 13 ປີ (07 ກັນຍາ 2010 - 07 ກັນຍາ 2023), ປະກາດການຈັດຕັ້ງພາຍໃນສູນ, ຮັບຊົມຮູບເງົາຫວນຄືນມູນເຊື້ອ ເພື່ອສະເຫຼີມສະຫຼອງ 03 ວັນປະຫວັດສາດສໍາຄັນຂອງພັກ-ຂອງຊາດ ຄື: ວັນລັດຖະທໍາມະນູນແຫ່ງ ສປປ ລາວ ຄົບຮອບ 32 ປີ(15 ສິງຫາ 1991-15 ສິງຫາ 2023), ວັນຢຶດອໍານາດທົ່ວປະເທດ ຄົບຮອບ 78 ປີ(23 ສິງຫາ 1945-23 ສິງຫາ 2023) ແລະ ວັນສ້າງຕັ້ງອາຊຽນ ຄົບຮອບ 56 ປີ, ໂດຍການເປັນປະທານ ຂອງ ທ່ານ ມີນາໄຊ ພິລາວົງ, ຄະນະພັກກະຊວງ, ຫົວໜ້າສູນອິນເຕີເນັດ ແຫ່ງຊາດ, ມີບັນດາທ່ານຮອງຫົວໜ້າສູນ, ຫົວໜ້-ຮອງຫົວໜ້າ ພະແນກ ແລະ ວິຊາການທົ່ວສູນອິນເຕີເນັດ ແຫ່ງຊາດ ເຂົ້າຮ່ວມຢ່າງພ້ອມພຽງ.

ໃນພິທີປະກາດການຈັດຕັ້ງ ແມ່ນເລື່ອນພະນັກງານຂັ້ນວິຊາການ ຂຶ້ນເປັນຮອງຫົວໜ້າພະແນກ 5 ທ່ານ ຄື: ທ່ານ ນ ອ້ອຍຄຳ ໄຊຍະວົງ ຂຶ້ນເປັນຮອງຫົວໜ້າພະແນກສັງລວມ, ທ່ານ ນ ທອງດຳ ມາລາວົງ ຂຶ້ນເປັນຮອງຫົວໜ້າພະແນກສົ່ງເສີມການນຳໃຊ້ ແລະ ການບໍລິການ, ທ່ານ ພິມພອນ ສິດລາກອນ ຂຶ້ນເປັນຮອງຫົວໜ້າພະແນກລະຫັດຊື່ອິນເຕີເນັດສູງສຸດແຫ່ງຊາດ, ທ່ານ ສົມໃຈ ມົວ ຂຶ້ນເປັນຮອງຫົວໜ້າພະແນກສູນຮັບຮອງລາຍເຊັນເອເລັກໂຕຣນິກແຫ່ງຊາດ, ແລະ ທ່ານ ນ ສຸພາວະດີ ປຣະເສີດ ຂຶ້ນເປັນຮອງຫົວໜ້າພະແນກຫ້ອງການກອງເລຂາ ຄະນະກຳມະການຄຸ້ມຄອງອິນເຕີເນັດແຫ່ງຊາດ.

ໃນຕອນທ້າຍ, ທ່ານ ມີນາໄຊ ພິລາວົງ, ຄະນະພັກກະຊວງ, ຫົວໜ້າສູນອິນເຕີເນັດ ແຫ່ງຊາດ, ຍັງໄດ້ມີຄໍາເຫັນຕໍ່ພິທີ ຊື່ງທ່ານໄດ້ສະແດງຄວາມຍ້ອງຍໍ ຊົມເຊີຍ ຕໍ່ຜູ້ທີ່ໄດ້ຮັບການແຕ່ງຕັ້ງໃໝ່ ພ້ອມທັງ ຮຽກຮ້ອງມາຍັງພະນັກງານທັງໝົດ ສືບຕໍ່ເອົາໃຈໃສ່ຊີ້ນໍາ-ນໍາພາວຽກງານທີ່ຕົນຮັບຜິດຊອບ ດ້ວຍຄວາມຮັບຜິດຊອບສູງ ແລະ ມີຜົນສໍາເລັດຍິ່ງໆຂຶ້ນ. ພ້ອມນັ້ນ, ທ່ານໄດ້ເນັ້ນຄືນກ່ຽວກັບຮູບເງົາ 03 ມູນເຊື້ອວັນສຳຄັນຂອງຊາດທີ່ໄດ້ນໍາມາເຜີຍແຜ່ຄັ້ງນີ້ ໃຫ້ສືບຕໍ່ຖອດຖອນເອົາບົດຮຽນການນໍາພາອັນສະຫຼາດສ່ອງໃສຂອງພັກທີ່ສາມາດຍຶດອໍານາດໄດ້ ຍອມເສຍສະຫຼະຊີວິດເພື່ອປະເທດຊາດ. ການປະກາດໃຊ້ລັດຖະທຳມະນູນ ເປັນເຫດການການເມືອງທີ່ສຳຄັນຂອງຊາດ, ທັງເປັນຂີດໝາຍໃໝ່ແຫ່ງການຫັນໄປສູ່ການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍ ແລະ ສ້າງລັດແຫ່ງກົດໝາຍ. ທ່ານຍັງໄດ້ຍົກໃຫ້ເຫັນຄວາມໝາຍຄວາມສຳຄັນຂອງອາຊຽນ ແລະ ການທີ່ ສປປ ລາວ ໄດ້ເຂົ້າເປັນສະມາຊິກອາຊຽນ ຊຶ່ງເປັນຂີດໝາຍສຳຄັນຂອງຊາດເຮົາ ໃນວຽກງານຮ່ວມມືໃນລະດັບພາກພື້ນ. ໃນໄຍະຜ່ານມາ ສປປ ລາວ ໄດ້ເປັນປະທານອາຊຽນໃນປີ 2004-2005 ແລະ 2016 ພ້ອມທັງໄດ້ເປັນເຈົ້າພາບຈັດກອງປະຊຸມສຸດຍອດອາຊຽນ ຄັ້ງທີ 28 ແລະ 29 ໃນປີ 2016. ໃນປີ 2024 ທີ່ຈະມາເຖິງນີ້ ສປປ ລາວ ກໍ່ຈະໄດ້ຮັບກຽດເປັນອາຊຽນ ຊຶ່ງຈະໄດ້ຈັດກອງປະຊຸມສຸດຍອດ ແລະ ກອງປະຊຸມສຳຄັນປິ່ນອ້ອມຢູ່ ສປປ ລາວ ຕື່ມອີກ. ທັງໝົດນີ້ ໄດ້ກາຍເປັນໝາກຜົນທາງປະຫວັດສາດ ແລະ ເປັນແວ່ນແຍງອັນສຳຄັນໃຫ້ແກ່ຄົນຮຸ່ນຫຼັງໄດ້ຖອດຖອນບົດຮຽນ ແລະ ສືບຕໍ່ພາລະກິດປົກປັກຮັກສາ ແລະ ສ້າງສາພັດທະນາປະເທດຊາດຂອງພວກເຮົາ; ໂດຍຕິດພັນກັບພາລະກິດຂອງກະຊວງເຕັກໂນໂລຊີ ແລະ ການສື່ສານ ກໍ່ຄື ພາລະກິດລວມຂອງຊາດ ໃນການຫັນເປັນດິຈິຕອນຂອງປະເທດເຮົາ ຊຶ່ງນັບມື້ນັບມີບົດບາດຄວາມສໍາຄັນ ຕໍ່ການດໍາລົງຊີວິດ ແລະ ການພັດທະນາປະເທດ ໂດຍພ້ອມກັນສຸມໃສ່ຈັດຕັ້ງປະຕິບັດ ແລະ ບຸກທະລຸໃນ 03 ເສົາຄໍ້າ ຄື: ລັດຖະບານດິຈິຕອນ, ເສດຖະກິດດິຈິຕອນ ແລະ ສັງຄົມດິຈິຕອນ.