ໃນວັນທີ 04 ກັນຍາ 2023, ຜ່ານມານີ້ ທີ່ ສູນອິນເຕີເນັດ ແຫ່ງຊາດ (ສອຊ), ກະຊວງເຕັກໂນໂລຊີ ແລະ ການສື່ສານ (ກຕສ) ໄດ້ຈັດພິທີເຊັນຮັບຮອງບົດສະເໜີດ້ານເຕັກນິກ “ໂຄງການພັດທະນາໂຄ່ງຂ່າຍຄວາມໄວສູງ ເພື່ອຫຼຸດຜ່ອນຄວາມທຸກຍາກ ແລະ ຮອງຮັບແລວທາງເສດຖະກິດສາຍໄໝດິຈິຕອນ (Development of Foundational ICT Infrastructure in Reducing Poverty and Building Digital Silk Road)” ໂດຍໃຫ້ກຽດເຂົ້າຮ່ວມປະທານຂອງທ່ານ ບັນດິດ ສຈ. ບໍ່ວຽງຄໍາ ວົງດາລາ, ລັດຖະມົນຕີ ກຕສ, ມີທ່ານ ໄຊຊະນະ ສິດທິພອນ, ຮອງປະທານ ຄະນະກໍາມະການ ຮ່ວມມື ລາວ-ຈີນ, ທ່ານ ເລຂາທີ່ປຶກສາຫ້ອງການເສດຖະກິດການຄ້າ ສະຖານທູດ ສປ ຈີນ ປະຈໍາ ສປປ ລາວ ພ້ອມດ້ວຍຄະນະ, ຕາງໜ້າຈາກບັນດາກົມ/ທຽບເທົ່າ ອ້ອມຂ້າງກະຊວງ ແລະ ບັນດາຄະນະຊ່ຽວຊານຈາກ ສະຖາບັນຄົ້ນຄວ້າໄອຊີທີຈີນ (China Academy of Information and Communications Technology, CAICT), ກະຊວງອຸດສາຫະກໍາ ແລະ ເຕັກໂນໂລຊີຂໍ້ມູນຂ່າວສານ ສປ. ຈີນ ເຂົ້າຮ່ວມ.

ທ່ານ ມີນາໄຊ ພິລາວົງ, ຫົວໜ້າສູນອິນເຕີເນັດແຫ່ງຊາດ ໃນນາມຫົວໜ້າຄະນະຮັບຜິດຊອບລົງສຳຫຼວດ ທີ່ຮ່ວມເຮັດວຽກກັບ ຄະນະຊ່ຽວຊານຈາກ ສະຖາບັນຄົ້ນຄວ້າໄອຊີທີຈີນ, ກະຊວງອຸດສາຫະກໍາ ແລະ ເຕັກໂນໂລຊີຂໍ້ມູນຂ່າວສານ (MIIT) ສປ. ຈີນ ໄດ້ຂຶ້ນລາຍງານສະຫຼຸບຜົນການລົງສຳຫຼວດ ແລະ ອອກແບບບົດສະເໜີດ້ານເຕັກນິກເບື້ອງຕົ້ນຂອງໂຄງການ ຊຶ່ງໄດ້ສະເໜີກ່ຽວກັບປະຫວັດຄວາມເປັນມາຂອງໂຄງການ ພາຍຫຼັງສຳເລັດໂຄງການ ການສ້າງສູນອິນເຕີເນັດ ແຫ່ງຊາດ ທີ່ນະຄອນຫຼວງວຽງຈັນ ໃນປີ 2010, ອະດີດອົງການ ໄປສະນີ ແລະ ໂທລະຄົມມະນາຄົມ ແຫ່ງຊາດ ໄດ້ສະເໜີ ຂໍການຊ່ວຍເຫຼືອ ຈາກ ສປ. ຈີນ ເພື່ອສ້າງສູນສຳຮອງ ສູນອິນເຕີເນັດ ແຫ່ງຊາດ ຢູ່ພາກເໜືອ ແລະ ພາກໃຕ້ ແຕ່ໃນໄລຍະນັ້ນ ແມ່ນຍັງຢູ່ໃນຂັ້ນຕອນ ລໍຖ້າການອະນຸມັດການຊ່ວຍເຫຼືອຈາກ ລັດຖະບານ ສປ. ຈີນ ມາຮອດທ້າຍປີ 2017 ອະດີດກະຊວງໄປສະນີ ໂທລະຄົມມະນາຄົມ ແລະ ການສື່ສານ ຈຶ່ງໄດ້ປັບປຸງບົດສະເໜີໂຄງການ ໂດຍປ່ຽນຊື່ມາເປັນ “ໂຄງການພັດທະນາໂຄງຂ່າຍຄວາມໄວສູງ ເພື່ອຫຼຸດຜ່ອນຄວາມທຸກຍາກ ແລະ ຮອງຮັບແລວທາງເສດຖະກິດສາຍໄໝດິຈິຕອນ” ເພື່ອໃຫ້ສອດຄ່ອງກັບນະໂຍບາຍການຊ່ວຍເຫຼືອລ້າ ແລະ ຖືກກັບຮ່ວງການຊ່ວຍເຫຼືອລ້າ ຂອງລັດຖະບານ ສປ. ຈີນ ເພື່ອສະໜັບໜູນການລຶບລ້າງຄວາມທຸກຍາກ ຂອງ ສປປ ລາວ ໃນຕົ້ນປີ 2018 ແຕ່ເນື່ອງຈາກໄລຍະທ້າຍປີ 2019-2022 ສປ. ຈີນ ໄດ້ປະເຊີນກັບສະພາບການແຜ່ລະບາດຂອງພະຍາດ ໂຄວິດ-19 ດັ່ງນັ້ນ ຈຶ່ງບໍ່ສາມາດສົ່ງຊຽວຊານມາສຳຫຼວດເບື້ອງຕົ້ນໄດ້.

ມາຮອດເດືອນ ມັງກອນ 2023, ສະຖານທູດ ສປ. ຈີນ ປະຈຳ ສປປ ລາວ ໄດ້ແຈ້ງຜ່ານ ຄະນະກຳມະການຮ່ວມມື ລາວ-ຈີນ ກ່ຽວກັບແຜນການມາສຳຫຼວດຂອງຄະນະຊ່ຽວຊານ ຈາກສະຖາບັນຄົ້ນຄວ້າໄອຊີທີ ສປ. ຈີນ ຫຼັງຈາກນັ້ນທັງສອງຝ່າຍກໍໄດ້ເລີ່ມເຮັດວຽກຮ່ວມກັນໂດຍຜ່ານກອງປະຊຸມທາງໄກ ແລະ ການແລກປ່ຽນຂໍ້ມູນຫຼາຍຄັ້ງ ຈົນມາຮອດ ວັນທີ 16 ສິງຫາ 2023 ຄະນະຊ່ຽວຊານຈາກສະຖາບັນຄົ້ນຄວ້າໄອຊີທີ ສປ. ຈີນໄດ້ເດີນທາງມາລາວ ແລະ ເຮັດວຽກຢູ່ ສປປ ລາວ ຈົນຮອດ ວັນທີ 05 ກັນຍາ 2023 ລວມ 21ມື້.

ກະຊວງ ເຕັກໂນໂລຊີ ແລະ ການສື່ສານ ໄດ້ມີການແຕ່ງຕັ້ງຄະນະເຮັດວຽກຮ່ວມກັບຊ່ຽວຊານຈີນ ໂດຍມີສູນອິນເຕີເນັດ ແຫ່ງຊາດ ເປັນຫຼັກໃນຄະນະລົງສຳຫຼວດ ຊຶ່ງໄດ້ໄປສຳຫຼວດຈຸດສະຖານທີ່ ທີ່ຈະສ້າງເປັນສູນຂໍ້ມູນ ຢູ່ແຂວງອຸດົມໄຊ ແລະ ຢູ່ແຂວງຈຳປາສັກ. ພ້ອມກັນນັ້ນ, ກໍໄດ້ສຳຫຼວດ ສະຖານທີ່ ຢູ່ຕຶກສູນອິນເຕີເນັດ ແຫ່ງຊາດ ຢູ່ເຂດບ້ານສາຍລົມ ແລະ ຢູ່ຕຶກກົມຄື້ນຄວາມຖີ່ວິທະຍຸສື່ສານ ຢູ່ເຂດດົງໂພສີ ນະຄອນຫຼວງວຽງຈັນ ເພື່ອສ້າງເປັນສູນຂໍ້ມູນແຫ່ງຊາດໃໝ່ 4 ແຫ່ງ. ພ້ອມກັນນັ້ນ, ຊ່ຽວຊານຈີນກໍໄດ້ໄປເກັບກຳຂໍ້ມູນ ແລະ ເຮັດວຽກ ກັບ ກະຊວງແຜນການ ແລະ ການລົງທຶນ, ກະຊວງກະສິກຳ ແລະ ປ່າໄມ້, ຄະນະກຳມະການ ຮ່ວມມື ລາວ-ຈີນ ແລະ ສະຖາບັນເຕັກໂນໂລຊີຂໍ້ມູນຂ່າວສານ, ກະຊວງເຕັກໂນໂລຊີ ແລະ ການສື່ສານ ແລະ ຍັງໄດ້ໄປຢ້ຽມຢາມເຮັດວຽກກັບ ບໍລິສັດ ທາງລົດໄຟລາວ-ຈີນ ແລະ ບໍລິສັດ ອີທີແອລ ຈຳກັດ.

ໂຄງການດັ່ງກ່າວ ຈະສ້າງພື້ນຖານໂຄງລ່າງດິຈິຕອນ ຄື ສູນຂໍ້ມູນ ແຫ່ງຊາດ 4 ແຫ່ງ ທີ່ສໍາຄັນ ໃນການຮອງຮັບການຫັນເປັນດິຈິຕອນ ຂອງ ສປປ ລາວ, ຊຶ່ງຈະສ້າງໃຫ້ ສປປ ລາວ ກາຍເປັນປະເທດ ທີ່ມີການເຊື່ອມໂຍງທາງດ້ານດິຈິຕອນ ແລະ ເປັນປະຕູທາງຜ່ານ ຈາກ ສປ. ຈີນ ໄປຫາບັນດາປະເທດອາຊຽນ ໂດຍຜ່ານ ລະບົບໂຄງຂ່າຍຄວາມໄວສູງ ຂອງ ສປປ ລາວ. ໃນນີ້, ຈະມີການປັບປຸງ ແລະ ຂະຫຍາຍ ລະບົບສູນກາງອິນເຕີເນັດ (IIG), ລະບົບສູນກາງອິນເຕີເນັດພາຍໃນ (NIX) ຈະຮອງຮັບການລວມສູນການສື່ສານ ສັນຍານອິນເຕີເນັດ ໃຫ້ຜ່ານ ສອຊ ທີ່ນະຄອນຫຼວງວຽງຈັນ ແລະ ຈຸດເຊື່ອມຕໍ່ທີ່ ພາກເໜືອ ແລະ ພາກໃຕ້.

ຜ່ານການສຳຫຼວດ ແລະ ເຮັດວຽກກັບຄະນະຂອງກະຊວງ ເຕັກໂນໂລຊີ ແລະ ການສື່ສານ, ຄະນະຈາກສະຖາບັນຄົ້ນຄວ້າໄອຊີທີ ສປ.ຈີນ ໄດ້ອອກແບບ ແລະ ສ້າງເປັນບົດສະເໜີດ້ານເຕັກນິກ ເພື່ອເຊັນຮັບຮອງຮ່ວມກັນ ໂດຍແມ່ນ ທ່ານ ມີນາໄຊ ພິລາລົງ, ຫົວໜ້າສູນອິນເຕີເນັດ ແຫ່ງຊາດ ຕາງໜ້າກະຊວງເຕັກໂນໂລຊີ ແລະ ການສື່ສານ ເປັນຜູ້ລົງນາມ, ແລະ ຕາງໜ້າຄະນະຊ່ຽວຊານຝ່າຍ ສປ.ຈີນ ລົງນາມໂດຍ ທ່ານ ສ໊າວ ເຫີງ (Cao Heng), ຫົວໜ້າສະຖາບັນຄົ້ນຄວ້າໄອຊີທີ ສປ. ຈີນ ບົດສະເໜີດ້ານເຕັກນິກດັ່ງກ່າວຈະເປັນບ່ອນອີງໃຫ້ສະຖາບັນຄົ້ນຄວ້າໄອຊີທີ ສປ.ຈີນ ໃນການລາຍງານຕໍ່ ອົງການຮ່ວມມືພັດທະນາສາກົນຈີນ (CIDCA) ເພື່ອຄົ້ນຄວ້າອະນຸມັດການຮັບຮອງໂຄງການດັ່ງກ່າວໃນຂັ້ນຕໍ່ໄປ.

ຂ່າວໂດຍ: ສູນອິນເຕີເນັດ