ໃນຕອນບ່າຍ ຂອງວັນທີ 12 ພຶດສະພາ 2023 ທີ່ຫ້ອງປະຊຸມໃຫຍ່ຊັ້ນ 02 ສູນອິນເຕີເນັດແຫ່ງຊາດ, ທ່ານ ແກ້ວວີສຸກ ໂສລະພົມ, ຮອງລັດຖະມົນຕີ ກະຊວງ ເຕັກໂນໂລຊີ ແລະ ການສື່ສານ ໄດ້ໃຫ້ກຽດເປັນປະທານກອງປະຊຸມ ລາຍງານການຈັດຕັ້ງປະຕິບັດວຽກງານປະຈຳເດືອນພຶດສະພາ 2023 ຂອງ ສູນອິນເຕີເນັດ ແຫ່ງຊາດ, ມີຄະນະສູນ, ຄະນະພະແນກ ແລະ ອ້າຍເອື້ອຍນ້ອງ ພະນັກງານ ສອຊ ເຂົ້າຮ່ວມຢ່າງພ້ອມພຽງ.

ທ່ານ ມີນາໄຊ ພິລາວົງ, ຫົວໜ້າສູນອິນເຕີເນັດແຫ່ງຊາດ ໄດ້ລາຍງານສະພາບການເຄື່ອນໄຫວ ແລະ ການຈັດຕັ້ງປະຕິບັດວຽກງານຂອງ ສອຊ ໃນໄລຍະຜ່ານມາ, ໂດຍສະເພາະ ໃນໄລຍະ 5 ເດືອນຕົ້ນປີ 2023, ບັນດາຂໍ້ຄົງຄ້າງ ແລະ ແຜນວຽກສືບຕໍ່.

ທ່ານ ແກ້ວວີສຸກ ໂສລະພົມ, ຮອງລັດຖະມົນຕີ ກະຊວງ ເຕັກໂນໂລຊີ ແລະ ການສື່ສານ, ໄດ້ໂອ້ລົມຕໍ່ກອງປະຊຸມ ໂດຍມີທິດຊີ້ນຳໃຫ້ ຄະນະນຳ ແລະ ອ້າຍເອື້ອຍນ້ອງ ສູນອິນເຕີເນັດ ແຫ່ງຊາດ ທຸກຄົນ ເອົາໃຈໃສ່ສືບຕໍ່ຈັດຕັ້ງປະຕິບັດວຽກງານໃຫ້ສຳເລັດຕາມແຜນການທີ່ວາງໄວ້ ໂດຍໃຫ້ປັບໃຫ້ສອດຄ່ອງ ແລະ ແທດເໝາະຕາມສະພາບການຕົວຈິງໃນແຕ່ລະໄລຍະ.

ບົດຂ່າວ: ສອຊ