ທ່ານ ແກ້ວວິສຸກ ໂສລະພົມ ຫົວໜ້າ ສູນອິນເຕີເນັດແຫ່ງຊາດ

    ໃນວັນທີ 21 ມັງກອນ 2022 ສູນອິນເຕີເນັດ ແຫ່ງຊາດ ໄດ້ຈັດກອງປະຊຸມເພື່ອສະຫຼຸບການຈັດຕັ້ງປະຕິບັດວຽກງານ ປະຈຳປີ 2021 ແລະ ທິດທາງແຜນການ ປະຈຳປີ 2022 ຂຶ້ນທີ່ ຫ້ອງປະຊຸມໃຫຍ່ຊັ້ນ 02 ຂອງ ສູນອິນເຕີເນັດ ແຫ່ງຊາດ (ສອຊ) ໂດຍການເປັນປະທານຂອງ ທ່ານ ແກ້ວວິສຸກ ໂສລະພົມ ຫົວໜ້າ ສູນອິນເຕີເນັດແຫ່ງຊາດ, ມີການເຂົ້າຮ່ວມຈາກບັນດາຄະນະສູນ, ຄະນະພະແນກ, ພ້ອມທັງໄດ້ມີການເຂົ້າຮ່ວມຜ່ານລະບົບປະຊຸມທາງໄກ ຂອງບັນດາພະນັກງານພາຍໃນສູນ.

    ໃນວາລະດຽວກັນນີ້ ທ່ານ ວົງນ້ອຍ ສີວັນທອງ ຮອງຫົວໜ້າ ສູນອິນເຕີເນັດ ແຫ່ງຊາດ ໄດ້ຂຶ້ນເຜີຍແຜ່ ເອກະສານສຳຄັນຕ່າງໆກ່ຽວກັບວັນສ້າງຕັ້ງກອງທັບປະຊາຊົນລາວ ຄົບຮອບ 73 ປີ (20 ມັງກອນ 1949 – 20 ມັງກອນ 2022).

                                                                                                                                                     ທ່ານ ວົງນ້ອຍ ສີວັນທອງ ຮອງຫົວໜ້າ ສູນອິນເຕີເນັດ ແຫ່ງຊາດ

     ໃນພິທີ ທ່ານ ພອນສະຫວັດ ຄົງສະຫວັດ ຮອງຫົວໜ້າ ສູນອິນເຕີເນັດ ແຫ່ງຊາດ ໄດ້ຜ່ານບົດສະຫຼຸບຕີລາຄາ, ປະເມີນຜົນ ການຈັດຕັ້ງປະຕິບັດວຽກງານປະຈຳປີ 2021 ຂອງ ສອຊ ເຊິ່ງລວມມີຜົນສຳເລັດທາງດ້ານການເມືອງແນວຄິດ, ດ້ານວິຊາສະເພາະ, ວຽກງານສາມອົງການຈັດຕັ້ງ, ວຽກງານປິ່ນອ້ອມທີ່ທາງຂັ້ນເທິງມອບໝາຍໃຫ້ຕາມແຕ່ລະໄລຍະ, ລວມໄປເຖິງການຈັດຕັ້ງ ແລະ ແບບແຜນການນຳພາໃນໄລຍະທີ່ຜ່ານມາ ເຊິ່ງໄດ້ມີການສະຫຼຸບຕີລາຄາ ຖອດຖອນບົດຮຽນ ແລະ ສ່ອງແສງລາຍງານຕາມແຕ່ລະຂັ້ນຢ່າງເປັນປົກກະຕິ, ນອກນັ້ນຍັງໄດ້ເກັບກຳສະພາບການທີ່ພົ້ນເດັ່ນ ເພື່ອລາຍງານໃຫ້ທາງ ກະຊວງ ເຕັກໂນໂລຊີ ແລະ ການສື່ສານ ໄດ້ຮັບຊາບເປັນແຕ່ລະໄລຍະ. ພ້ອມດຽວກັນນີ້ ຍັງໄດ້ຜ່ານທິດທາງແຜນການ ປະຈຳປີ 2022 ທີ່ ສອຊ ຈະຕ້ອງສູ້ຊົນໃຫ້ສຳເລັດຕາມຄາດໝາຍໂດຍການນຳພາ-ຊີ້ນຳຢ່າງເລິກເຊິ່ງຂອງຄະນະສູນ ແລະ ການຈັດຕັ້ງປະຕິບັດຢ່າງຕັ້ງໜ້າຂອງບັນດາພະແນກພາຍໃນ ສອຊ.

                                                                                                                                                           ທ່ານ ພອນສະຫວັດ ຄົງສະຫວັດ ຮອງຫົວໜ້າ ສູນອິນເຕີເນັດ ແຫ່ງຊາດ(ຂວາມື)

    ໃນໂອກາດດັ່ງກ່າວ ທ່ານ ແກ້ວວິສຸກ ໂສລະພົມ ຫົວໜ້າ ສູນອິນເຕີເນັດ ແຫ່ງຊາດ ໄດ້ຂຶ້ນກ່າວໂອ້ລົມເຖິງສະພາບລວມໃນປັດຈຸບັນ ແລະ ແລກປ່ຽນບັນຫາຂໍ້ຫຍຸ້ງຍາກ ແລະ ເອກະສານສຳຄັນຕ່າງໆ ໂດຍສະເພາະກ່ຽວກັບວາລະແຫ່ງຊາດ, ກ່ຽວກັບບັນຫາຢາເສບຕິດ ແລະ ການຫັນເປັນທັນສະໄໝໃນການເກັບລາຍຮັບເຂົ້າງົບປະມານ ກັບພະນັກງານພາຍໃນສູນ, ເຊິ່ງໄລຍະທີ່ຜ່ານມາມີຫຼາຍເຫດການເກີດຂຶ້ນ ໂດຍສະເພາະການດຳລົງຊີວິດ ແລະ ເຮັດວຽກຢູ່ໃນຊ່ວງຂອງການລະບາດພະຍາດ COVID-19, ເຊິ່ງພະນັກງານພາຍໃນ ສອຊ ກໍໄດ້ປະຕິບັດລະບຽບທີ່ສູນວາງອອກຢ່າງເຂັ້ມງວດ, ຈັດຕັ້ງປະຕິບັດວຽກງານວິຊາສະເພາະຢ່າງຕັ້ງໜ້າໂດຍຖືເອົາລະບຽບແບບແຜນວິທີການເຮັດວຽກແບບລວມສູນ, ເຮັດວຽກເປັນໝູ່ຄະນະ ແລະ ແບ່ງວຽກໃຫ້ຜູ້ຄົນຮັບຜິດຊອບເປັນຫຼັກໃນການຈັດຕັ້ງປະຕິບັດວຽກງານ ແລະ ໄດ້ນຳໃຊ້ເຕັກໂນໂລຊີເຂົ້າມາຊ່ວຍອຳນວຍຄວາມສະດວກໃນການເຮັດວຽກຫຼາຍຂຶ້ນ. ຄຽງຄູ່ກັນນີ້ ທ່ານ ຫົວໜ້າສູນ ຍັງໄດ້ຮຽກຮ້ອງໃຫ້ບັນດາພະນັກງານພາຍໃນສູນທຸກຄົນເອົາໃຈໃສ່ໃນການຍົກລະດັບຄວາມຮູ້ເພື່ອເພີ່ມຂີດຄວາມສາມາດຂອງຕົນ ໃນການນໍາມາຜັນຂະຫຍາຍ ແລະ ປະກອບເຂົ້າໃນການຈັດຕັ້ງປະຕິບັດວຽກງານໃນຂົງເຂດທີ່ຕົນຮັບຜິດຊອບຢ່າງຕັ້ງໜ້າ.

ຂ່າວໂດຍ: ສອຊ