ພະນັກງານ ສູນອິນເຕີເນັດ ແຫ່ງຊາດ ສຳເລັດການສັກວັກແຊງ ປ້ອງກັນພະຍາດ ໂຄວິດ-19 ເຂັມທີ 2 ສ່ວນໃຫຍ່ແລ້ວ ໃນວັນທີ 04/06/2021 ຕາມຂະບວນການຂອງກະຊວງ ເຕັກໂນໂລຊີ ແລະ ການສື່ສານ, ໂດຍຜ່ານມາ ໄດ້ຮ່ວມຂະບວນການສັກວັກແຊງ ເຂັມທີ 1 ຂອງ ກະຊວງ ຕສ ໃນວັນທີ 05/05/2021, ເຊິ່ງກ່ອນໜ້ານັ້ນ ພະນັກງານ ຈຳນວນໜຶ່ງ ແມ່ນໄດ້ສຳເລັດການສັກວັກແຊງເອງແລ້ວ, ສ່ວນອີກຈຳນວນໜຶ່ງ ແມ່ນຈະສືບຕໍ່ຕາມກຳນົດການສັກວັກແຊງ ເຂັມທີ 2 ຕາມພາຍຫຼັງ.

     ໃນການຈັດຕັ້ງປະຕິບັດມາດຕະການປ້ອງກັນ ແລະ ຄວບຄຸມ ການລະບາດຂອງພະຍາດ ໂຄວິດ-19, ນັບແຕ່ວັນທີ 22/04/2021 ເປັນຕົ້ນມາ ສູນອິນເຕີເນັດ ແຫ່ງຊາດ ໄດ້ຈັດຕັ້ງປະຕິບັດຢ່າງເຄັ່ງຄັດ ຕາມ ຄຳສັ່ງຂອງນາຍົກລັດຖະມົນຕີ ສະບັບເລກທີ 15/ນຍ, ລົງວັນທີ 21 ເມສາ 2021 ວ່າດ້ວຍການເພີ່ມທະວີມາດຕະການສະກັດກັ້ນ, ຄວບຄຸມ ແລະ ກຽມພ້ອມຮອບດ້ານ ເພື່ອຕ້ານພະຍາດໂຄວິດ-19, ພ້ອມທັງຈັດຕັ້ງປະຕິບັດ ບັນດາແຈ້ງການ, ຄຳແນະນຳ ແລະ ມາດຕະການຕ່າງໆທີ່ວາງອອກຢ່າງເຂັ້ມງວດ. ອີກດ້ານໜຶ່ງ, ສູນອິນເຕີເນັດ ແຫ່ງຊາດ ຍັງໄດ້ປະກອບສ່ວນເຂ້ົາໃນຄະນະສະເພາະກິດຂອງ ກະຊວງເຕັກໂນໂລຊີ ແລະ ການສື່ສານ ເພື່ອຮັບຜິດຊອບວຽກງານຕ້ານພະຍາດ ໂຄວິດ-19 ໃນການຊີ້ນຳ, ຕິດຕາມກວດກາ ແລະ ປະເມີນຜົນການຈັດຕັ້ງປະຕິບັດວຽກງານສະກັດກັ້ນ, ຄວບຄຸມ ແລະ ແກ້ໄຂການລະບາດ.

     ເພື່ອເປັນການຮັກສາໄລຍະຫ່າງທາງສັງຄົມ ແລະ ຫຼຸດຜ່ອນການແຜ່ລະບາດຂອງພະຍາດໂຄວິດ ສູນອິນເຕີເນັດ ແຫ່ງຊາດ ໄດ້ມີການ ຈັດຕັ້ງແບ່ງວຽກໃຫ້ພະນັກງານເຂົ້າປະຈຳການໃນແຕ່ລະວັນຕາມຄວາມເໝາະສົມ ແລະ ອີກສ່ວນໜຶ່ງແມ່ນໃຫ້ສືບຕໍ່ເຮັດວຽກຂອງຕົນເປັນປົກກະຕິ ຢູ່ເຮືອນ ຫຼື ທີ່ພັກອາໄສ ໂດຍຜ່ານລະບົບສື່ສານເອເລັກໂຕຣນິກ ຜ່ານອິນເຕີເນັດ. ຖ້າພະນັກງານຫາກມີຄວາມສ່ຽງ ແມ່ນຈະໃຫ້ແຍກປ່ຽວ ກັກຕົວເອງຢູ່ເຮືອນ ເພື່ອຮັບປະກັນບໍ່ໃຫ້ມີການແຜ່ລະບາດຢູ່ພາຍໃນສູນ.

     ສູນອິນເຕີເນັດ ແຫ່ງຊາດ ໄດ້ມີມາດຕະການຮັກສາຄວາມປອດໄພ ແລະ ມາດຕະການການກວດກາພະຍາດດ້ວຍຂັ້ນຕອນຕ່າງໆ ຄື: ໃຫ້ພະນັກງານ ເຂົ້າ-ອອກ ສູນ ຜ່ານປະຕູດຽວ ໂດຍໃສ່ຜ້າອັດປາກ, ເວັ້ນໄລຍະຫ່າງ, ວັດແທກອຸນຫະພູມ, ລ້າງມືດ້ວຍເຈວ. ສຳລັບບຸກຄົນພາຍນອກ ທີ່ຈະເຂົ້າມາພາຍໃນສູນ ຕ້ອງລະບຸຕົວຕົນກ່ອນເຂົ້າມາປະຕິບັດວຽກ ຫຼື ພົວພັນວຽກງານ ເຊັ່ນ: ການສະແດງບັດປະຈຳຕົວ, ບັດສັກວັກແຊງ ແລະ ການລະບຸຕົວຕົນຜ່ານແອັບພລິເຄຊັນ LaoKYC ດ້ວຍການ Scan QR Code ເທິງໂທລະສັບມືຖື.

   ເຖິງວ່າຈະສັກວັກຊີນແລ້ວກໍຕາມ, ສູນອິນເຕີເນັດ ແຫ່ງຊາດ ຍັງໄດ້ເນັ້ນຢ້ຳໃຫ້ພະນັກງານທຸກຄົນ ຕ້ອງໄດ້ສືບຕໍ່ປະຕິບັດຕາມມາດຕະການ ແລະ ລະບຽບການ ທີ່ທາງຂັ້ນເທິງວາງອອກມາເປັນແຕ່ລະໄລຍະຢ່າງເຂັ້ມງວດ, ເພື່ອຮັບປະກັນ ການປະຕິບັດໜ້າທີ່ຮັບຜິດຊອບຂອງຕົນເອງ ແລະ ຊ່ວຍແພດໝໍໃນການສະກັດກັ້ນ ແລະ ຄວບຄຸມພະຍາດລະບາດໃນຄັ້ງນີ້.

ຂ່າວໂດຍ : ສອຊ