ໃນຕອນເຊົ້າ ວັນທີ 02 ມີນາ 2021 ທີ່ຜ່ານມາ ສູນອິນເຕີເນັດ ແຫ່ງຊາດ ໄດ້ຕ້ອນຮັບຂະບວນທັດສະນະສຶກສາຂອງຄູອາຈານ ແລະ ນັກສຶກສາ ຄະນະວິສະວະກຳສາດ ຄອມພີວເຕີ ຈາກມະຫາວິທະຍາໄລ ສຸພານຸວົງ ແຂວງ ຫລວງພະບາງ, ເຊິ່ງມີນັກສຶກສາປີທີ 2 ພາກວິຊາ ວິສະວະກຳສາດຄອມພີວເຕີ  ຈໍານວນ 36 ຄົນ ພ້ອມດ້ວຍຄູອາຈານ ແລະ ຕາງໜ້າຈາກ ສອຊ ເຂົ້າຮ່ວມ

    ໃຫ້ກຽດກ່າວຕ້ອນຮັບຄະນະຄູອາຈານ ແລະ ນັກສຶກສາໂດຍ ທ່ານ ມີນາໄຊ ພິລາວົງ ຮອງຫົວໜ້າ ສູນອິນເຕີເນັດ ແຫ່ງຊາດ (ສອຊ) ແລະ ໃນວາລະດຽວກັນ ທ່ານ ນ ລາວັນ ລັດຕະນະວັນໂນ ຮອງຫົວໜ້າ ພະແນກແຜນການ ແລະ ການຮ່ວມມື ໄດ້ໃຫ້ກຽດຂື້ນນຳສະເໜີກ່ຽວກັບ ພາລະບົດບາດ ແລະ ວຽກງານຂອງ ສອຊ ໂດຍຫຍໍ້ ເປັນຕົ້ນແມ່ນ: ວຽກງານລວມສູນການສື່ສານ, ວຽກງານສູນຂໍ້ມູນແຫ່ງຊາດ, ວຽກງານລະຫັດຊື່ອິນເຕີເນັດ (.LA), ວຽກງານການອອກໃບຮັບຮອງລາຍເຊັນເອເລັກໂຕຣນິກ ແລະ ວຽກງານການຄຸ້ມຄອງຄວາມປອດໄພຂໍ້ມູນຂ່າວສານພາຍໃນ ສອຊ

  ໃນການທັດສະນະສຶກສາຄັ້ງນີ້ ສອຊ ໄດ້ນຳພາຄະນະຄູອາຈານ ແລະ ນັກສືກສາ ຈາກ ມະຫາວິທະຍາໄລ ສຸພານຸວົງ ເຂົ້າຢ້ຽມຊົມຫ້ອງສູນຂໍ້ມູນ ແລະ ໄດ້ອະທິບາຍການເຮັດວຽກໂດຍລວມ ກ່ຽວກັບລະບົບເຕັກນິກ ແລະ ລະບົບຮັກສາຄວາມປອດໄພຂອງ ສູນຂໍ້ມູນ ແຫ່ງຊາດ, ເຊິ່ງທາງຄະນະຄູອາຈານ ແລະ ນັກສຶກສາ ໄດ້ສະແດງຄວາມສົນໃຈ ແລະ ຕັ້ງຄຳຖາມ ເພື່ອແລກປ່ຽນຄວາມຮູ້ ກ່ຽວກັບ ການຄຸ້ມຄອງວຽກງານໄອຊີທີໂດຍລວມ ພາຍໃຕ້ຄວາມຮັບຜິດຊອບ ຂອງ ສອຊ ກັນຢ່າງຟົດຟື້ນ

ຂຽນຂ່າວໂດຍ : ສູນອິນເຕີເນັດແຫ່ງຊາດ