ໃນຕອນເຊົ້າຂອງວັນທີ  18 ກຸມພາ 2021, ສະຫະພັນກຳມະບານ ກະຊວງໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ໄດ້ຈັດພິທີປາຖະກະຖາ ເຜີຍແຜ່, ເຊື່ອມຊຶມສະເຫຼີມສະຫຼອງວັນສ້າງຕັ້ງສະຫະພັນກຳມະບານລາວ ຄົບຮອບ 65 ປີ (01 ກຸມພາ 1956-01 ກຸມພາ 2021) ແລະ ເຜີຍແຜ່ຂໍ້ແຂ່ງຂັນ 05 ເປັນເຈົ້າ, ໂດຍການເປັນປະທານ ກອງປະຊູມ​ ແລະ​ ເຜີຍແຜ່ເນື້ອໃນໂດຍ ທ່ານ​ ວິໄລ ວົງຂະເສີມ ຄະນະພັກ​ ຮອງປະທານ​ສູນກາງສະຫະພັນກຳມະບານລາວ​ ແລະ ​ທ່ານ​ ປອ​ ພູວົງ ​ຝາກເຟືອງໃຈ ຫົວຫນ້າກົມ​ຂະບວນການ-ຍ້ອງຍໍ ​ສູນກາງສະຫະພັນກຳມະບານລາວ.ເປັນກຽດເຂົ້າຮ່ວມໂດຍທ່ານ​ທອງໃສ ຊານໄຊຍະ ຮອງເລຂາຄະນະພັກ ​ຮອງ​ລັດຖະມົນຕີ​ກະຊວງ​ ປທສ​ ພ້ອມນັ້ນກໍ່ມີ​ປະທານ​ສະຫະພັນກຳມະບານກະຊວງ​ ປທສ ​​ພ້ອມຄະນະ, ຄະນະພັກບັນດາກົມທຽບເທົ່າ,​ ຄະນະພັກຮາກຖານບັນດາບໍລິສັດ​ ພ້ອມດ້ວຍສະມາຊິກກໍາມະບານເຂົ້າຮ່ວມຢ່າງພ້ອມພຽງ​.

     ຈຸດປະສົງການຈັດພິທີປາຖະກະຖາໃນຄັ້ງນີ້ກໍ່ເພື່ອເປັນການໂຄສະນາສຶກສາອົບຮົມປູກຈິດສຳນຶກ ແລະ ສ້າງຄວາມຮັບຮູ້ຢ່າງເລິກເຊິ່ງກ່ຽວກັບມູນເຊື້ອການກຳເນີດ, ເຕີບໃຫຍ່ຂະຫຍາຍຕົວຂອງສະຫະພັນກຳມະບານລາວ ໃນຕະຫລອດໄລຍະ 65 ປີ ໃຫ້ແກ່ສະມາຊິກກຳມະບານ, ກຳມະກອນ ແລະ ຜູ້ອອກແຮງງານ, ເພື່ອເສີມຂະຫຍາຍທາດແທ້ ມູນເຊື້ອປະຕິວັດຂອງສະມາຊິກກຳມະບານ, ກຳມະກອນ ແລະ ຜູ້ອອກແຮງງານທີ່ມີຜົນງານໃນການປະກອບສ່ວນອັນສຳຄັນ ເຂົ້າໃນພາລະກິດປົດປ່ອຍປະເທດຊາດໃນເມື່ອກ່ອນກໍ່ຄືໄລຍະປົກປັກຮັກສາ ແລະ ສ້າງສາພັດທະນາປະເທດຊາດ ພາຍໃຕ້ການນຳພາຂອງພັກປະຊາຊົນປະຕິວັດລາວ. ແນໃສ່ປຸກລະດົມ ແລະ ປູກຈິດສຳນຶກໃຫ້ແກ່ສະມາຊິກກຳມະບານ, ກຳມະກອນ ແລະ ຜູ້ອອກແຮງງານໃຫ້ມີຄວາມບຸກບືນ, ຕັ້ງໜ້າປະກອບສ່ວນເຂົ້າໃນການເຄື່ອນໄຫວວຽກງານກຳມະບານ, ສ້າງຂະບວນການແຂ່ງຂັນ 5 ເປັນເຈົ້າ, ຕິດພັນກັບຂະບວນການແຂ່ງຂັນ ຮັກຊາດ ແລະ ພັດທະນາ, ການສ້າງໜ່ວຍພັກ ປອດໃສ, ເຂັ້ມແຂງ, ໜັກແໜ້ນ ຕິດພັນກັບການປະຕິບັດໜ້າທີ່ວິຊາສະເພາະ ແລະ ຂະບວນການຜະລິດ, ສ້າງທັດສະນະໃນການອອກແຮງງານທີ່ມີລະບຽບວິໄນໃຫ້ກວ້າງຂວາງ ແລະ ຟົດຟື້ນກວ່າເກົ່າ.

      ພ້ອມດຽວກັນນີ້ກໍ່ເປັນການເຜີຍແຜ່ເນື້ອໃນຂໍ້ແຂ່ງຂັນ 5 ເປັນເຈົ້າຂອງກໍາມະບານ ສະບັບປັບປຸງ ໃຫ້ຜູ້ເຂົ້າຮ່ວມໄດ້ເຂົ້າໃຈ ແລະ ເພື່ອກະກຽມຂື້ນແຜນນໍາໄປຈັດຕັ້ງປະຈິບັດຂໍ້ແຂ່ງຂັນດັ່ງກ່າວ ໃນຮາກຖານ/ໜ່ວຍຕ່າງໆ ໃຫ້ເປັນຂະບວນຟົດຟື້ນ ແລະ ມີປະສິດທິຜົນສູງ.

 ຂຽນຂ່າວໂດຍ: ສະຫະພັນກໍາມະບານ ກະຊວງ ປທສ.