ຫົວໜ້າສູນອິນເຕີເນັດ ແຫ່ງຊາດ (ສອຊ) ໄດ້ເຂົ້າຮ່ວມເປັນວິທະຍາກອນ ໃນກອງປະຊຸມເນື່ອງໃນໂອກາດການເຂົ້າເປັນສະມາຊິກ ອົງການກການຄ້າໂລກ (WTO) ຂອງ ສປປ ລາວ ຄົບຮອບ 8 ປີ. ກອງປະຊຸມໄດ້ຈັດຂຶ້ນພາຍໃຕ້ຫົວຂໍ້ “ການກະກຽມການຫຼຸດພົ້ນອອກຈາກປະເທດດ້ອຍພັດທະນາໃນຍຸກເສດຖະກິດດິຈິຕອນ” ໃນວັນທີ 2 ກຸມພາ 2021 ທີ່ກະຊວງອຸດສາຫະກຳ ແລະ ການຄ້າ (ອຄ) ເປັນກຽດເຂົ້າຮ່ວມຂອງ ທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງ ອຄ, ທ່ານ ປີເຕີ ເຮມ໋ອນ ເອກອັກຄະລັດຖະທູດ ສະຫະລັດອາເມຣິກາປະຈຳລາວ ໂດຍມີຜູ້ເຂົ້າຮ່ວມຈາກພາກລັດ, ພາກທຸລະກິດ ແລະ ສະຖາບັນການສຶກສາ ຈຳນວນ 200 ກວ່າທ່ານ.

   ໃນກອງປະຊຸມ ທ່ານ ແກ້ວວີສຸກ ໂສລະພົມ ຫົວໜ້າ ສອຊ ໄດ້ນຳສະເໜີໂດຍຫຍໍ້ກ່ຽວກັບຄວາມເປັນມາຂອງການຮ່າງ ວິໄສທັດການພັດທະນາ ໄລຍະ 20 ປີ (2021-2040), ຍຸດທະສາດການພັດທະນາ ໄລຍະ 10 ປີ (2021-2030) ແລະ ແຜນພັດທະນາ ເສດຖະກິດດິຈິຕອນ ແຫ່ງຊາດ ໄລຍະ 5 ປີ ຄັ້ງທີ I (2021-2025), ເຊິ່ງປະຈຸບັນ ສປປ ລາວ ແມ່ນໄດ້ນຳໃຊ້ເຕັກໂນໂລຊີດິຈິຕອນ ເຂົ້າໃນການຈັດຕັ້ງປະຕິບັດວຽກງານ ກໍ່ຄືການດຳລົງຊີວິດປະຈຳວັນ ໂດຍສະເພາະໃນຍຸກ New Normal ໃນປະຈຸບັນ, ເຮັດໃຫ້ປະເທດເຮົາ ຕ້ອງໄດ້ກ້າວເຂົ້າສູ່ຍຸກເສດຖະກິດດິຈິຕອນຢ່າງຫຼີກລ່ຽງບໍ່ໄດ້ ແລະ ຈະກາຍເປັນສ່ວນສຳຄັນໃນການພາປະເທດກະກຽມການຫຼຸດພົ້ນອອກຈາກສະຖານະດ້ອຍພັດທະນາ.