ໃນຕອນເຊົ້າຂອງວັນທີ 28 ມັງກອນ 2021, ທີ່ ສູນອິນເຕີເນັດ ແຫ່ງຊາດ, ກະຊວງໄປສະນີ, ໂທລະຄົມມະນາຄົມ ແລະ ການສື່ສານ, ໄດ້ມີພິທີລົງນາມເຊັນສັນຍາຮ່ວມມື ໃນການສະໜອງບໍລິການອອກໃບຮັບຮອງລາຍເຊັນເອເລັກໂຕຣນິກທີ່ທັນສະໄຫມ  ລະຫວ່າງ ບໍລິສັດ ວິນເທັກສ ຈໍາກັດ ແລະ ບໍລິສັດ ສະຕາຣ ໂທລະຄົມ (Unitel),​ ໂດຍມີ ທ່ານ ບຸນສະເຫຼີມໄຊ ເຄນນາວົງ ຮອງລັດຖະມົນຕີ ກະຊວງໄປສະນີ, ໂທລະຄົມມະນາຄົມ ແລະ ການສື່ສານ (ປທສ), ມີບັນດາຫົວໜ້າກົມ/ທຽບເທົ່າ ອ້ອມຂ້າງກະຊວງ ປທສ, ຄະນະອຳນວຍການ ບໍລິສັດ ວິນເທັກສ ແລະ ບໍລິສັດ ສະຕາຣ ໂທລະຄົມ ຈຳກັດ (ຢູນິເທວ), ພ້ອມດ້ວຍບັນດາຄະນະນຳ ແລະ ພະນັກງານທີ່ກ່ຽວຂ້ອງທັງສອງຝ່າຍ ເຂົ້າຮ່ວມ.

ລັດຖະບານ ໄດ້ອອກກົດໝາຍວ່າດ້ວຍລາຍເຊັນເອເລັກໂຕນິກ ເປັນບ່ອນອີງໃຫ້ແກ່ການຈັດຕ້ັງປະຕິບັດວຽກງານດັ່ງກ່າວ. ໄລຍະຜ່ານມາ, ໃນການພັດທະນາລະບົບອອກໃບຮັບຮອງລາຍເຊັນເອເລັກໂຕຣນິກ ແຫ່ງຊາດ ເພື່ອໃຫ້ບໍລິການລາຍເຊັນດິຈິຕອນ ໂດຍການນຳໃຊ້ເຕັກໂນໂລຊີ Public Key Infrastructure (PKI), ກະຊວງ ປທສ ໄດ້ມີການອອກໃບຮັບຮອງລາຍເຊັນເອເລັກໂຕຣນິກ ໃຫ້ແກ່ພາກລັດ (Government CA) ນຳໃຊ້ ເຂົ້າໃນການບໍລິການຕ່າງໆ ເປັນຕົ້ນ ລະບົບ e-Office, e-License ໃນກະຊວງ ປທສ, ນຳໃຊ້ເຊັນອະນຸມັດການອອກວີຊາ ໃນລະບົບ e-Visa ຂອງກະຊວງການຕ່າງປະເທດ, ພ້ອມດຽວກັນ ກໍ່ກຳລັງຕິດຕັ້ງເຂົ້າໃນລະບົບ TaxRIS ຂອງກະຊວງການເງິນ, ບັນດາທະນາຄານ ແລະ ອີກຫຼາຍພາກສ່ວນທີ່ມີຄວາມພ້ອມໃນການຫັນເປັນທັນສະໄໝທາງດ້ານດິຈິຕອນ.

ໃນຍຸກ New Normal ການນຳໃຊ້ເຕັກໂນໂລຊີດິຈິຕອນ ແມ່ນຈຳເປັນ ແລະ ຂາດບໍ່ໄດ້, ຄວາມຕ້ອງການໃນການຊົມໃຊ້ລາຍເຊັນເອເລັກໂຕຣນິກ ແມ່ນມີຈຳນວນຫຼາຍ ໃນຫຼາກຫຼາຍຂົງເຂດວຽກງານທີ່ແຕກຕ່າງກັນ, ເຮັດໃຫ້ບໍ່ທັນສາມາດຕອບສະໜອງສັງຄົມໄດ້ຢ່າງພຽງພໍ. ດັ່ງນັ້ນ, ກະຊວງ ປທສ ໄດ້ມອບໃຫ້ ສູນອິນເຕີເນັດ ແຫ່ງຊາດ ຮ່ວມມືກັບ ບໍລິສັດ ວິນເທັກສ ຈຳກັດ ຊ່ວຍສົ່ງເສີມການນຳໃຊ້ລະບົບອອກໃບຮັບຮອງລາຍເຊັນເອເລັກໂຕຣນິກໃຫ້ແກ່ພາກສ່ວນທົ່ວໄປ (Public CA) ໃຫ້ເກີດປະໂຫຍດສູງສຸດ, ຕອບສະໜອງໄດ້ຕາມຄວາມຮຽກຮ້ອງຕ້ອງການນຳໃຊ້ຂອງສັງຄົມ, ພ້ອມທັງຮັບປະກັນ ໃຫ້ມີການພັດທະນາຢ່າງຕໍ່ເນື່ອງ ແລະ ຍືນຍົງ.  

ສຳລັບ ບໍລິສັດ ສະຕາຣ ໂທລະຄົມ (ຫຼື ຢູນິເທວ) ກໍ່ແມ່ນບໍລິສັດທີ່ມີຄວາມນຳໜ້າທາງດ້ານເຕັກໂນໂລຊີ ແລະ ໄດ້ພັດທະນາພື້ນຖານໂຄງລ່າງລະບົບເຄືອຂ່າຍ ໂທລະຄົມມະນາຄົມ ໃນຂອບເຂດທົ່ວປະເທດ ແລະ ນຳໃຊ້ເຕັກໂນໂລຊີທີ່ທັນສະໄໝ, ໄດ້ປະກອບສ່ວນ ໃນການສະໜອງບໍລິການທາງດ້ານໂທລະຄົມມະນາຄົມ ໃຫ້ກັບສັງຄົມ ແລະ ໄດ້ກາຍເປັນບໍລິສັດໂທລະຄົມມະນາຄົມ ທີ່ນອນຢູ່ໃນລະດັບແຖວໜ້າຂອງ ສປປ ລາວ, ກັບພື້ນທີ່ປົກຄຸ້ມສັນຍານກວ້າງຂວາງ, ມີລະບົບເຄືອຂ່າຍ ສາມາດຮັບໃຊ້ໃຫ້ລູກຄ້າຈຳນວນຫຼາຍ.

ການຮ່ວມມື ລະຫວ່າງ ສອງບໍລິສັດ ຈະເປັນຈຸດລິເລີ່ມໃນການໃຫ້ບໍລິການອອກໃບຮັບຮອງລາຍເຊັນເອເລັກໂຕຣນິກທົ່ວໄປ (Public CA) ໃຫ້ແກ່ສັງຄົມ ໃນ ສປປ ລາວ ຢ່າງເປັນຮູບປະທຳ. ທັງສອງຝ່າຍຈະໄດ້ເອກະພາບກັນ ໃນການໃຫ້ບໍລິການສຳລັບລູກຄ້າຂອງ ບໍລິສັດ ສະຕາຣ ໂທລະຄົມ ມີຄວາມສະດວກສະບາຍໃນການຮັບຮອງລາຍເຊັນເອເລັກໂຕຣນິກ, ແລະ ຍິ່ງຈະເຮັດໃຫ້ມີການນຳໃຊ້ໃນສັງຄົມຢ່າງກວ້າງຂວາງ.