ໃນຕອນເຊົ້າຂອງວັນທີ 17 ພະຈິກ 2020, ທີ່ ສູນອິນເຕີເນັດ ແຫ່ງຊາດ (ສອຊ), ກະຊວງໄປສະນີ, ໂທລະຄົມມະນາຄົມ ແລະ ການສື່ສານ (ກະຊວງ ປທສ) ໄດ້ມີພິທີເປີດສຳມະນາທາງໄກ ໃນຫົວຂໍ້ “ຄົ້ນຄວ້າການສ້າງແຜນຍຸດທະສາດ IPv6 ແລະ NIX, ພ້ອມທັງ ການນໍາໃຊ້ DNSSEC ໃນລະຫັດຊື່ອິນເຕີເນັດ .LA ຂັ້ນ 3”, ໂດຍມີ ທ່ານ ແກ້ວວີສຸກ ໂສລະພົມ ຫົວໜ້າສູນອິນເຕີເນັດ ແຫ່ງຊາດ, ກະຊວງໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ແລະ ທ່ານ ຫງວຽນ ຮົງ ຖັງ (Mr. Nguyen Hong Thang) ຫົວໜ້າສູນເຄືອຂ່າຍຂໍ້ມູນຂ່າວສານອິນເຕີເນັດ ຫວຽດນາມ (Vietnam Internet Network Information Center – VNNIC), ກະຊວງ ຂໍ້ມູນຂ່າວສານ ແລະ ການສື່ສານ (MIC) ສສ ຫວຽດນາມ. ມີບັນດາທ່ານຄະນະພະແນກ ແລະ ຊ່ຽວຊານຂອງທັງສອງສູນ, ແລະ ບັນດານັກສຳມະນາກອນ ເຂົ້າຮ່ວມຢ່າງພ້ອມພຽງ.

ການຈັດສຳມະນາທາງໄກຄັ້ງນີ້ ແມ່ນການຮ່ວມມືພາຍໃຕ້ບົດບັນທຶກຄວາມເຂົົ້າໃຈ ແລະ ແຜນການຮ່ວມມືລະຫວ່າງ ກະຊວງ ປທສ ສປປ ລາວ ແລະ ກະຊວງ MIC ສສ ຫວຽດນາມ, ໂດຍສະເພາະ ແມ່ນການຮ່ວມມືລະຫວ່າງ ສອງ ສູນ ຄື: ສອຊ (LANIC) ແລະ VNNIC, ເຊິ່ງດໍາເນີນໄປເປັນເວລາ 02 ວັນ, ລະຫວ່າງວັນທີ 17-18 ພະຈິກ 2020.

ຊຸດສຳມະນາທາງໄກຄັ້ງນີ້ ປະກອບດ້ວຍ ການນໍາສະເໜີ ແລະ ແລກປ່ຽນບົດຮຽນກັນລະຫວ່າງ ສອງພາກສ່ວນ ໂດຍສະເພາະ ແມ່ນສະພາບລວມໃນການພັດທະນາ ແລະ ການກະກຽມ ເພື່ອຫັນປ່ຽນຈາກການນຳໃຊ້ IPv4 ໄປເປັນ IPv6, ການພັດທະນາລະບົບສູນກາງອິນເຕີເນັດພາຍໃນ (National Internet Exchange - NIX), ແລະ ການຄຸ້ມຄອງລະຫັດຊື່ອິນເຕີນເນັດ.

ບົດຮຽນຈາກຊຸດສຳມະນາທາງໄກໃນຄັ້ງນີ້, ສູນອິນເຕີເນັດ ແຫ່ງຊາດ ຈະໄດ້ນໍາໄປຜັນຂະຫຍາຍເຂົ້າໃນການສ້າງບັນດາລະບຽບການ, ນິຕິກຳ ແລະ ການຈັດຕັ້ງປະຕິບັດ ທີ່ຕິດພັນກັບໜ້າວຽກຕົວຈິງ ເພື່ອກະກຽມຄວາມພ້ອມ ໃນການຫັນເປັນດິຈິຕອນ (Digital Transformation), ການພັດທະນາເສດຖະກິດດິຈິຕອນ (Digital Economy) ແລະ ການກ້າວໄປສູ່ຍຸກອຸດສາຫະກຳ 4.0 ໃນອະນາຄົດ.