ໃນລະຫວ່າງວັນທີ 25-26 ພະ​ຈິກຜ່ານມານີ້, ສປ. ຈີນ ແລະ ປະ​ເທດ​ສະ​ມາ​ຊິກ​ອາ​ຊຽນ ໄດ້ຈັດກອງປະຊຸມທາງໄກພາຍ​ໃຕ້ຫົວ​ຂໍ້ “ຂໍ້ມູນຂ່າວສານ ລະຫວ່າງ ອາຊຽນ-ສປ.ຈີນ ຄັ້ງທີ 4 (The 4th China-ASEAN Information Harbor Forum)” ຄຽງຄູ່ກັນນັ້ນ, ຍັງມີງານວາງສະແດງສິນຄ້າ ຈີນ - ອາຊຽນ ຄັ້ງທີ 17 ປີ 2020. ໂດຍການເປັນປະທານຂອງ ທ່ານ Zhuang Rongwen (ຈ້ວງ ຫຼົງ ເຫວີນ), ລັດ​ຖະ​ມົນ​ຕີ​ຄະ​ນະ​ບໍ​ລິ​ຫານ​ງານ ແລະ ຄຸ້ມ​ຄອງ​ອິນ​ເຕີ​ເນັດ ແຫ່ງ ສ​ປ. ຈີນ (Minister of Cyberspace Administration of The People Republic of China), ຕາງ​ໜ້າເຂົ້າຮ່ວມຝ່າຍ ສ​ປ​ປ ລາວ ໂດຍ ທ່ານ ທັນ​ສະ​ໄໝ ກົມ​ມະ​ສິດ, ລັດ​ຖະ​ມົນ​ຕີ​ກະ​ຊວງ ໄປ​ສະ​ນີ, ໂທ​ລະ​ຄົມ​ມະ​ນາ​ຄົມ ແລະ ການ​ສື່​ສານ (ປ​ທ​ສ) ​ໃນ​ນາມ​ເປັນ​ປະ​ທານ ADGMIN ແລະ  ມີບັນດາ ເຈົ້າ​ໜ້າ​ທີ່​ອາ​ວຸ​ໂສ ດິຈິຕອນອາ​ຊຽນ, ກອງເລຂາອາຊຽນ, ບັນດາຜູ້​ປະ​ກອບ​ການ​ພາກ​ລັດ-ເອ​ກະ​ຊົນ ພ້ອມດ້ວຍພາກສ່ວນກົມກ່ຽວຂ້ອງ.

         ກອງ​ປະ​ຊຸມຄັ້ງນີ້ ​ຈັດ​ຂື້ນພາຍ​ໃຕ້​ຄຳ​ຂັວນ "ເຕັກ​ໂນ​ໂລ​ຊີ​ດິ​ຈິ​ຕອນ ເຊື່ອມ​ຕໍ່​ອາ​ຊຽນ, ຄວາມ​ສະຫຼຽວ​ສະຫຼາດ ສ້າງ​ອະ​ນາ​ຄົດ" ​ເພື່ອ​ແນໃສ່ການແລກປ່ຽນ ແລະ ສົນທະນາກ່ຽວກັບຫົວຂໍ້ຕ່າງໆ ເ​ປັນ​ຕົ້ນ: ການພັດທະນາເສດຖະກິດດິຈິຕອນ, ການເຊື່ອມຕໍ່ທີ່ທັນ​ສະ​ໄໝ, ການຮ່ວມມືທີ່ຕ່າງຝ່າຍຕ່າງມີຜົນປະໂຫຍດ ເພື່ອອຳນວຍຄວາມສະດວກໃຫ້ແກ່ການສ້າງ​ຖານ​ຂໍ້​ມູນ​ຂ່າວ​ສານ ຈີນ - ອາຊຽນ, ການແລກປ່ຽນຂໍ້ມູນຂ່າວສານ, ການຮ່ວມມືດ້ານເຕັກນິກ, ການສົ່ງເສີມການບໍລິການດ້ານເສດຖະກິດ ແລະ ການຄ້າທາງອິນເຕີເນັດ, ການແລກປ່ຽນເຕັກ​ໂນ​ໂລ​ຊີ​ລະ​ຫວ່າງປະຊາຊົນ, ການເປີດໂສມໜ້າໃໝ່ສຳລັບການຮ່ວມມືເສດຖະກິດດິຈິຕອນ ຈີນ - ອາຊຽນ, ພື້ນ​ຖານ​ໂທ​ລະ​ຄົມ​ມະ​ນາ​ຄົມ ແລະ ການພັດທະນານະວັດຕະກຳ​ໃໝ່.

        ໃນ​ໄລ​ຍະ​ຜ່ານ​ມາ​ໃນ​ຂອບສອງຝ່າຍ, ສ​ປ​ປ ລາວ ແລະ ສ​ປ. ຈີນ ມີການຮ່ວມມືກັນຢ່າງໃກ້ຊິດພາຍໃຕ້ແຜນແມ່ບົດ ໃນການສ້າງຊຸມຊົນໃຫ້ມີອະນາຄົດ ຮ່ວມປະກອບສ່ວນເຂົ້າໃນການພັດທະນາເສດຖະກິດ ແລະ ປັບປຸງຊີວິດການເປັນຢູ່ຂອງປະຊາຊົນສອງ​ຊາດໃຫ້​ດີ​ຂື້ນ. ໃນໂອກາດດຽວກັນນີ້, ​ກະ​ຊວງ ປ​ທ​ສ ໄດ້​​ຕາງ​ໜ້າ​ນຳສະ​ເໜີກ່ຽວກັບວິທີການນຳໃຊ້ ICT ເຂົ້າໃນຍຸກ ເສດຖະກິດດິຈິຕອນ ໂດຍສະເພາະໃນ​ໄລ​ຍະ​ການ​ແຜ່​ລະ​ບາດ​ຂອງພະ​ຍາດ COVID-19 ນີ້ ລວມມີ: (1)ຮັບ​ປະ​ກັນການເຊື່ອມຕໍ່​ອິນ​ເຕີ​ເນັດ ແລະ ໃຫ້​ມີ​ພື້ນ​ຖານ​ໂຄງ​ລ່າງ ແລະ ​ການ​ບໍ​ລິ​ການໃນລາຄາທີ່ເໝາະສົມ; (2)ນຳໃຊ້ຫຼາຍພ​ຣາດ​ຟອມ, ຊ່ອງ​ທາງການເຜີຍແຜ່ຂໍ້ມູນຂ່າວສານ ແລະ ​ແຈ້ງເຕືອນໃຫ້ກັບຜູ້ຊົມ​ໃຊ້ມືຖື; (3)ຮັບ​ປະ​ກັນ​ວຽກ​ງານຄວາມປອດໄພທາງໄຊເບີ; (4)ສົ່ງເສີມ​ການ​ເງິນ​ທັນ​ສະ​ໄໝ (Fintech) ແລະ ການບໍລິການດ້ານ​ການເງິນ​ເທິງມືຖື; (5)ສືບຕໍ່​ພັດ​ທະ​ນາ Digital Application ​ເປັນ​ຕົ້ນລັດຖະບານ​ທັນ​ສະ​ໄໝ ແລະ ຊຸກຍູ້ການເປີດໃຊ້ໂປແກຼມມືຖືເພື່ອໃຫ້ການບໍລິການແກ່ສັງຄົມ; (6)ສ້າງຄວາມເຂັ້ມແຂງໃຫ້ພາກເອກະຊົນ ໃນການປະດິດສ້າງ ແລະ ຊຸກຍູ້ການຮູ້​ນຳ​ໃຊ້ດິຈິຕອນໃຫ້ແກ່ພົນລະເມືອງ.

            ສໍາລັບທິດທາງແຜນການໃນຕໍ່ໜ້າ, ທີ່​ປະ​ຊຸມໄດ້ສະເໜີໃຫ້ເອົາໃຈໃສ່ ສືບຕໍ່ຮ່ວມມືກັນ ໃນ​ການແລກປ່ຽນຂໍ້ມູນ-ຂ່າວສານປະສົບການ ແລະ ບົດຮຽນທີ່ດີໃນການນໍາໃຊ້ໄອຊີທີ ເພື່ອເຝົ້າລະວັງ, ສະກັດກັ້ນ ແລະ ຮັບມືກັບພະຍາດໂຄວິດ-19 ແລະ ສືບຕໍ່ ​ກຽມພ້ອມ​ຮັບ​ມື​ບັນ​ດາ​ສະ​ພາບ​ການ ທີ່​ອາດ​​ເກີດ​ຂື້ນ​ໃນ​ອະ​ນາ​ຄົດ.

               ຂ່າວໂດຍ:    ພະ​ແນກ​ອາ​ຊຽນ, ກົມແຜນການ ແລະ ການຮ່ວມມື.

               ພາບ: ຫ້ອງການ.