ກອງປະຊຸມໃຫຍ່ ຄັ້ງທີ II ຂອງ ກໍາມະບານ ຮາກຖານ ສູນອິນເຕີເນັດ ແຫ່ງຊາດ ໃນຄັ້ງວັນທີ 08 ກຸມພາ 2024, ທີ່ຫ້ອງປະຊຸມໃຫຍ່ ຊັ້ນ 2 ສູນອິນເຕີເນັດ ແຫ່ງຊາດ

12/02/2024

ກອງປະຊຸມໃຫຍ່ ຄັ້ງທີ II ຂອງ ກໍາມະບານ ຮາກຖານ ສູນອິນເຕີເນັດ ແຫ່ງຊາດ ໃນຄັ້ງວັນທີ 08 ກຸມພາ 2024, ທີ່ຫ້ອງປະຊຸມໃຫຍ່ ຊັ້ນ 2 ສູນອິນເຕີເນັດ ແຫ່ງຊາດ

ກໍາມະບານ ຮາກຖານ ສູນອິນເຕີເນັດ ແຫ່ງຊາດ (ສອຊ) ໄດ້ຈັດກອງປະຊຸມໃຫຍ່ ຄັ້ງທີ II ຂຶ້ນໃນວັນທີ 08 ກຸມພາ 2024 ທີ່ ຫ້ອງປະຊຸມໃຫຍ່ ຊັ້ນ 02 ຂອງ ສອຊ, ໂດຍການເປັນປະທານຂອງ ສະຫາຍ ມີນາໄຊ ພິລາວົງ ຄະນະບໍລິຫານພັກ ກະຊວງ ເຕັກໂນໂລຊີ ແລະ ການສື່ສານ, ເລຂາໜ່ວຍພັກ, ຫົວໜ້າ ສອຊ, ສະຫາຍ ສຸດໃຈ ພິມມະສີ, ປະທານ ສະຫະພັນ ກຳມະບານ ກະຊວງ ເຕັກໂນໂລຊີ ແລະ ການສື່ສານ, ແລະ ສະຫາຍ ພອນສະຫວັດ ຄົງສະຫວັດ, ປະທານ ກຳມະບານ ຮາກຖານ ສອຊ, ພ້ອມທັງມີຕາງໜ້າຊາວໜຸ່ມ ແລະ ແມ່ຍິງ ສອຊ ແລະ ສະມາຊິກກຳມະບານຮາກຖານ ສອຊ, ເຂົ້າຮ່ວມທັງໝົດ 56 ສະຫາຍ, ຍິງ 22 ສະຫາຍ.

ໃນໂອກາດນີ້, ສະຫາຍ ພອນສະຫວັດ ຄົງສະຫວັດ, ປະທານ ກຳມະບານຮາກຖານ ສູນອິນເຕີເນັດ ແຫ່ງຊາດ ໄດ້ກ່າວເປີດກອງປະຊຸມຢ່າງເປັນທາງການ ພ້ອມທັງ ຜ່ານຮ່າງບົດລາຍງານການເມືອງ ແລະ ທິດທາງແຜນການ 05 ປີໃນຕໍ່ຫນ້າ ຂອງກຳມະບານຮາກຖານ ສອຊ ພ້ອມທັງຕີລາຄາດ້ານດີ, ດ້ານອ່ອນ, ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້. ຫຼັງຈາກນັ້ນ ສະຫາຍ ສະຫາຍ ພົມມະທັດ ພູມະນີວົງ, ປະທານກວດກາກຳມະບານຮາກຖານ ສອຊ ໄດ້ຂຶ້ນຜ່ານບົດສໍາຫຼວດການນໍາພາ ຂອງຄະນະກຳມະບານຮາກຖານ ສອຊ.

ໃນກອງປະຊຸມ ສະຫາຍ ມີນາໄຊ ພິລາວົງ, ຄະນະບໍລິຫານງານພັກ ກະຊວງ ເຕັກໂນໂລຊີ ແລະ ການສື່ສານ, ເລຂາໜ່ວຍພັກ ສອຊ ໄດ້ໃຫ້ກຽດມີຄຳເຫັນຊີ້ນຳຕໍ່ກອງປະຊຸມໃຫຍ່ ແລະ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານການຊີ້ນໍາ-ນໍາພາ ຂອງ ຄະນະກຳມະບານຮາກຖານ ສອຊ ໃນໄລຍະຜ່ານມາ. ພ້ອມນັ້ນ, ສະຫາຍ ຍັງໄດ້ຮຽກຮ້ອງໃຫ້ບັນດາສະຫາຍຜູ້ແທນກອງປະຊຸມ ຍົກສູງສະຕິຄວາມຮັບຜິດຊອບ ແລະ ຄຳນຶງເຖິງຄວາມສຳຄັນຂອງການຕັດສິນໃຈເລືອກເອົາຄະນະກຳມະບານຮາກຖານ ຊຸດໃໝ່ ເຊິ່ງຈະເປັນຜູ້ນຳພາເຄື່ອນໄຫວວຽກງານກຳມະບານທີ່ຕິດພັນກັບວຽກງານວິຊາສະເພາະ ໃນອີກ 05 ປີ ຕໍ່ໜ້າ ໂດຍການຄຳນຶງເຖິງມາດຖານເງື່ອນໄຂ, ຄວາມຮູ້, ຄວາມສາມາດ, ວິໄສທັດ ແລະ ຄວາມເປັນຜູ້ນຳ ພ້ອມທັງໄດ້ສະເໜີໃຫ້ບັນດາສະຫາຍຜູ້ແທນກອງປະຊຸມພ້ອມກັນປະຕິບັດການລົງຄະແນນສຽງໃຫ້ຖືກຕາມກົດລະບຽບ ແລະ ຂັ້ນຕອນ ທີ່ທາງຄະນະຄວບຄຸມການປ່ອນບັດແນະນຳຢ່າງເຂັ້ມງວດ ເພື່ອເຮັດໃຫ້ກອງປະຊຸມໃຫຍ່ຄັ້ງນີ້ເກີດປະໂຫຍດສູງສຸດ ແລະ ບັນລຸຕາມເປົ້າໝາຍທີ່ວາງໄວ້.

 

ບັນດາຜູ້ແທນກອງປະຊຸມ ໄດ້ພ້ອມກັນນໍາໃຊ້ສິດປະຊາທິປະໄຕຂອງຕົນ ເລືອກຕັ້ງເອົາຄະນະກຳມະບານຮາກຖານ ສອຊ ຊຸດໃໝ່ ບົນພື້ນຖານຫຼັກການລວມສູນປະຊາທິປະໄຕ ແລະ ຖືກຕ້ອງສອດຄ່ອງກັບມາດຖານເງື່ອນໄຂທີ່ກໍານົດໄວ້, ຊຶ່ງມີຜູ້ລົງສະໝັກເລືອກຕັ້ງທັງໝົດ 08 ສະຫາຍ, ຍິງ 04 ສະຫາຍ ແລະ ເລືອກໄດ້ 05 ສະຫາຍ. ກອງປະຊຸມຄັ້ງປະຖົມມະລຶກຄົບຄະນະປະທານກອງປະຊຸມໃຫຍ່ ໄດ້ຕົກລົງເຫັນດີຮັບຮອງເອົາ ຄະນະກຳມະບານຮາກຖານ ຄື: ສະຫາຍ ພົມມະທັດ ພູມະນີວົງເປັນ ປະທານ; ສະຫາຍ ນາງ ຄຳພັດ ໄຊຍະວັນສີ ເປັນ ຮອງປະທານ ພ້ອມທັງເປັນປະທານກວດກາ; ສະຫາຍ ສົມໃຈ ມົວເປັນ ຮອງປະທານ; ສະຫາຍ ນາງ ອ້ອຍຄຳ ໄຊຍະວົງ ແລະ ສະຫາຍ ນາງ ສຸກດາລາ ອິນທະວົງ ເປັນ ຄະນະ.

ໃນຕອນທ້າຍຂອງກອງປະຊຸມ ໄດ້ມີການມອບໃບຍ້ອງຍໍການແຂ່ງຂັນ 5 ເປັນເຈົ້າ ໃຫ້ແກ່ ກຳມະບານຮາກຖານ ສູນອິນເຕີເນັດແຫ່ງຊາດ. ພ້ອມດຽວກັນນັ້ນ ຍັງໄດ້ຮັບຟັງການໂອ້ລົມອັນມີຄວາມໝາຍໜັກແໜ້ນ ແລະ ເລິກເຊິ່ງຈາກ ສະຫາຍ ສຸດໃຈ ພິມມະສີ, ປະທານສະຫະພັນກຳມະບານ ກະຊວງ ເຕັກໂນໂລຊີ ແລະ ການສື່ສານ, ຊຶ່ງສະຫາຍໄດ້ເຫັນດີເປັນເອກະພາບຕໍ່ການຕີລາຄາສະພາບການເຄື່ອນໄຫວຂອງຄະນະກຳມະບານຮາກຖານ ສອຊ ໃນໄລຍະຜ່ານມາ ເເລະ ເຫັນດີ ເປັນເອກະພາບ ຕໍ່ບົດລາຍງານການເມືອງ ແລະ ບົດສຳຫຼວດການນຳພາ ຂອງຄະນະກຳມະບານ ຊຸດເກົ່າ ແລະ ຊົມເຊີຍ ຕໍ່ຜົນສໍາເລັດທີ່ຄະນະກຳມະບານ ຍາດມາໄດ້ໃນໄລຍະຜ່ານມາ ຊຶ່ງເປັນຜົນງານອັນໃຫຍ່ຫຼວງ ແລະ ເປັນພື້ນຖານອັນສໍາຄັນໃຫ້ແກ່ການສືບຕໍ່ ຜັນຂະຫຍາຍເຂົ້າໃນຂົງເຂດວຽກງານກຳມະບານຮາກຖານ ສອຊ ທີ່ຕິດພັນກັບການເຄື່ອນໄຫວວຽກງານວິຊາສະເພາະ. ພ້ອມທັງໄດ້ເນັ້ນໜັກໃຫ້ ຄະນະກຳມະບານຮາກຖານ ສອຊ ສືບຕໍ່ນໍາພາ ສະມາຊິກພາຍໃນຮາກຖານ ປະຕິບັດວຽກງານທີ່ຖືກມອບໝາຍຢ່າງຕັ້ງໜ້າ, ເພີ່ມທະວີຄວາມສາມັກຄີ ພາຍໃຕ້ການນໍາພາຂອງພັກ, ເຊີດຊູຄວາມຮັບຜິດຊອບສູງໃນໜ້າທີ່ວຽກງານການເມືອງ ຂອງຕົນ ແລະ ສຸມໃສ່ໜ້າທີ່ວຽກງານທີ່ໄດ້ຮັບມອບໝາຍ ປະກອບສ່ວນເຮັດໃຫ້ວຽກງານດັ່ງກ່າວປະສົບຜົນສຳເລັດຕາມແຜນການທີ່ວາງໄວ້ຢ່າງຈົບງາມ.

ບົດຂ່າວ ແລະ ພາບ ສອຊ

 

ການລົງທະບຽນລະຫັດຊື່ເປັນພາສາລາວ ໄດ້ແລ້ວ
ສູນອິນເຕີເນັດ ແຫ່ງຊາດ ເປັນຄູ່ຮ່ວມມືກັບ APNIC