ໃນຕອນບ່າຍຂອງວັນທີ 10 ພະຈິກ 2023 ນີ້, ທີ່ຫ້ອງປະຊຸມ ຂອງສູນອິນເຕີເນັດແຫ່ງຊາດ, ກະຊວງເຕັກໂນໂລຊີ ແລະ ການສື່ສານ (ກຕສ), ໄດ້ມີພິທີຮັບເອົາມະຫາຊົນກ້າວໜ້າເຂົ້າເປັນສະມາຊິກພັກສໍາຮອງ ແລະ ພິທີເລື່ອນສະມາຊິກພັກສໍາຮອງ ຂຶ້ນເປັນສະມາຊິກພັກສົມບູນຂອງພັກປະຊາຊົນປະຕິວັດລາວ ຂອງ 02 ໜ່ວຍພັກພາຍໃນ ອົງຄະນະພັກ ກຕສ ປະກອບມີ: ໜ່ວຍພັກສູນອິນເຕີເນັດແຫ່ງຊາດ ແລະ ໜ່ວຍພັກສະຖາບັນຄົ້ນຄວ້າການນຳໃຊ້ເຕັກໂນໂລຊີອັດສະລິຍະ ໃຫ້ກຽດເປັນປະທານໂດຍ ສະຫາຍ ປອ. ສັນຕິສຸກ ສິມມາລາວົງ ເລຂາປະຈໍາພັກກະຊວງ, ປະທານກວດກາ, ຮອງລັດຖະມົນຕີ ກຕສ, ມີບັນດາສະຫາຍເລຂາ, ຮອງເລຂາ ຂອງໜ່ວຍພັກກົມ/ທຽບເທົ່າ ພ້ອມດ້ວຍສະມາຊິກພັກ ໜ່ວຍພັກສູນອິນເຕີເນັດ ແຫ່ງຊາດ ແລະ ໜ່ວຍພັກສະຖາບັນຄົ້ນຄວ້າການນຳໃຊ້ເຕັກໂນໂລຊີອັດສະລິຍະ ເຂົ້າຮ່ວມ ຢ່າງພ້ອມພຽງ.

ໃນພິທີດັ່ງກ່າວ, ສະຫາຍ ມີນາໄຊ ພິລາວົງ, ຄະນະພັກກະຊວງ ຕສ, ເລຂາໜ່ວຍພັກ, ຫົວໜ້າ ສູນອິນເຕີເນັດ ແຫ່ງຊາດ ໄດ້ຂຶ້ນຜ່ານ ມະຕິຕົກລົງ ວ່າດ້ວຍການອະນຸມັດໃຫ້ມະຫາຊົນກ້າວໜ້າ ສູນອິນເຕີເນັດ ແຫ່ງຊາດ ເຂົ້າເປັນສະມາຊິກພັກສໍາຮອງ ຈໍານວນ 04 ສະຫາຍ, ຍິງ 02 ສະຫາຍ. ຈາກນັ້ນ, ສະຫາຍ ປະລິຕະ ແສງຈັນທຣ໌, ຮອງເລຂາໜ່ວຍພັກ, ຮອງຫົວໜ້າ ສະຖາບັນຄົ້ນຄວ້າການນຳເຕັກໂນໂລຊີອັດສະລິຍະ ໄດ້ຂຶ້ນຜ່ານ ມະຕິຕົກລົງ ວ່າດ້ວຍການອະນຸມັດເລື່ອນສະມາຊິກພັກສຳຮອງ ຂື້ນເປັນສະມາຊິກພັກສົມບູນ ຈຳນວນ 03 ສະຫາຍ, ຍິງ 02 ສະຫາຍ.

ໂອກາດດຽວກັນນີ້, ສະຫາຍ ປອ. ສັນຕິສຸກ ສິມມາລາວົງ  ກໍໄດ້ໃຫ້ກຽດມອບມະຕິຕົກລົງ ແລະ ປື້ມກົດລະບຽບພັກປະຊາຊົນປະຕິວັດລາວ ສະໄໝທີ XI ໃຫ້ກັບສະມາຊິກພັກສໍາຮອງ ແລະ ສະມາຊິກພັກສົມບູນໃໝ່. ພ້ອມທັງໂອ້ລົມ ແລະ ກ່າວສະແດງຄວາມຍິນດີ, ຍ້ອງຍໍຊົມເຊີຍຜູ້ທີ່ໄດ້ເຂົ້າເປັນສະມາຊິກພັກໃໝ່ ແລະ ຜູ້ທີ່ໄດ້ເລື່ອນເປັນສະມາຊິກພັກສົມບູນ.  ພ້ອມນີ້, ສະຫາຍໄດ້ເນັ້ນໜັກໃຫ້ບັນດາສະມາຊິກພັກ ເອົາໃຈໃສ່ຝຶກຝົນຫຼໍ່ຫຼອມຕົນເອງ ທາງດ້ານຄວາມຮູ້, ຄວາມສາມາດ ແລະ ທາງດ້ານອົງການຈັດຕັ້ງ ພ້ອມທັງສືບຕໍ່ຈັດຕັ້ງປະຕິບັດບັນດາກົດລະບຽບ ແລະ ນິຕິກໍາຕ່າງໆ ຂອງພັກປະຊາຊົນປະຕິວັດລາວ ສະໄໝທີ XI ວາງອອກຢ່າງເຂັ້ມງວດ, ໃຫ້ມີຄວາມກະຕືລືລົ້ນ, ຫ້າວຫັນ, ເຮັດແທ້ທໍາຈິງ ປະຕິບັດໜ້າທີ່ວຽກງານ ທີ່ຕົນຮັບຜິດຊອບຢ່າງມີແບບແຜນ ແລະ ແຍກອອກໃຫ້ເປັນແຜນອັນລະອຽດ ພ້ອມທັງມີການຕິດຕາມກວດກາຜົນສໍາເລັດ ແລະ ຊ່ວຍເຫຼືອເຊິ່ງກັນ ແລະ ກັນ. ໂດຍສະເພາະແມ່ນ ຈົ່ງຍົກສູງຄວາມຮັບຜິດຊອບໜ້າທີ່ການເມືອງ ທີ່ພັກ ແລະ ການຈັດຕັ້ງໄດ້ມອບໝາຍໃຫ້, ເປັນແບບຢ່າງນຳໜ້າໃນທຸກຂະບວນການ, ຕັ້ງໜ້າຝຶກຝົນຫຼໍ່ຫຼ້ອມຕົນເອງໃຫ້ກາຍເປັນສະມາຊິກພັກທີ່ມີຄຸນທາດການເມືອງ, ມີຄຸນສົມບັດສິນທໍາປະຕິວັດທີ່ໜັກແໜ້ນ, ຍົກລະດັບຄວາມຮູ້, ຄວາມສາມາດທາງດ້ານວິຊາສະເພາະ, ທິດສະດີການເມືອງ ເພື່ອສາມາດຕອບສະໜອງໄດ້ຕາມຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່.

ພາບ+ຂ່າວ: ສູນອິນເຕີເນັດ ແຫ່ງຊາດ