ໃນຕອນເຊົ້າຂອງວັນທີ 11 ກັນຍາ 2023 ສູນອິນເຕີເນັດ ແຫ່ງຊາດ ໄດ້ຈັດກອງປະຊຸມ ມອບ-ຮັບ ໃບຍ້ອງຍໍ ປະຈຳປີ 2022 ໃຫ້ແກ່ພະນັກງານພາຍໃນສູນ ໂດຍມີຄະນະສູນ, ຄະນະພະແນກ ພ້ອມດ້ວຍພະນັກງານວິຊາການພາຍໃນ ສູນອິນເຕີເນັດ ແຫ່ງຊາດ ໃຫ້ກຽດເຂົ້າຮ່ວມຢ່າງພ້ອມພຽງ.

ຈຸດປະສົງຂອງກອງປະຊຸມ ແມ່ນເພື່ອມອບໃບຍ້ອງຍໍໃຫ້ແກ່ພະນັກງານທີ່ມີຜົນງານດີເດັ່ນ ປະເພດ I : ດີຫຼາຍ ຈຳນວນ 58 ທ່ານ ແລະ ປະເພດ II : ດີ ຈຳນວນ 11 ທ່ານ, ໃຫ້ກຽດມອບໃບຍ້ອງຍໍໃນຄັ້ງນີ້ ໂດຍ ທ່ານ ມີນາໄຊ ພິລາວົງ ຄະນະພັກກະຊວງ ເຕັກໂນໂລຊີ ແລະ ການສື່ສານ,​ ເລຂາໜ່ວຍພັກ ສູນອິນເຕີເນັດແຫ່ງຊາດ,​ ຫົວໜ້າ ສູນອິນເຕີເນັດ ແຫ່ງຊາດ.

ໃນຕອນທ້າຍຂອງກອງປະຊຸມ ທ່ານ ມີນາໄຊ ພິລາວົງ ໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນສຳເລັດທີ່ພະນັກງານພາຍໃນສູນຍາດແຍ່ງມາໄດ້ ແລະ ໄດ້ຖືໂອກາດໂອ້ລົມພະນັກງານທັງໝົດ ໃຫ້ສືບຕໍ່ເອົາໃຈໃສ່ຈັດຕັ້ງປະຕິບັດວຽກງານວິຊາສະເພາະທີ່ຕົນຮັບຜິດຊອບ ດ້ວຍຄວາມຮັບຜິດຊອບສູງ ພ້ອມຍັງໄດ້ສົ່ງເສີມໃຫ້ພະນັກງານນຳໃຊ້ເຕັກໂນໂລຊີທີ່ມີ ເຂົ້າມາຊ່ວຍອຳນວຍຄວາມສະດວກໃນການເຮັດວຽກໃຫ້ຫຼາຍຂຶ້ນ. ຄຽງຄູ່ກັນນີ້ ທ່ານ ຫົວໜ້າສູນ ຍັງໄດ້ຮຽກຮ້ອງໃຫ້ບັນດາພະນັກງານພາຍໃນສູນທຸກຄົນ ເອົາໃຈໃສ່ໃນການຍົກລະດັບຄວາມຮູ້ ການເພີ່ມຂີດຄວາມສາມາດຂອງຕົນ ເພື່ອນຳມາຜັນຂະຫຍາຍ ແລະ ປະກອບສ່ວນເຂົ້າໃນການຈັດຕັ້ງປະຕິບັດວຽກງານໃນຂົງເຂດທີ່ຕົນຮັບຜິດຊອບຢ່າງຕັ້ງໜ້າ ແລະ ໃຫ້ໄດ້ຮັບຜົນສໍາເລັດຍິ່ງໆຂຶ້ນໄປ.