ໃນຕອນແລງຂອງວັນທີ 04 ກໍລະກົດ 2023, ທີ່ຫ້ອງປະຊຸມຂອງກົມສ່ວຍສາອາກອນ, ກະຊວງການເງິນ ໄດ້ມີພີທີເຊັນສັນຍາ ການຮ່ວມມືພັດທະນານຳໃຊ້ລາຍເຊັນເອເລັກໂຕຣນິກ (Certificate Authority/Digital Signature) ເຂົ້າໃນລະບົບຄຸ້ມຄອງງົບປະມານແຫ່ງລັດ (ລາຍຮັບ-ລາຍຈ່າຍ) ລະຫວ່າງ ສູນອິນເຕີເນັດ ແຫ່ງຊາດ, ກະຊວງເຕັກໂນໂລຊີ ແລະ ການສື່ສານ ແລະ ກົມເຕັກໂນໂລຊີຂໍ້ມູນຂ່າວສານການເງິນ, ກະຊວງການເງິນ. ຊຶ່ງຈຸດປະສົງຂອງການເຊັນສັນຍາດັ່ງກ່າວກໍເພື່ອຮ່ວມກັນສຶກສາ, ພັດທະນາ, ຕິດຕັ້ງ ແລະ ນໍາໃຊ້ລາຍເຊັນເອເລັກໂຕຣນິກ (Certificate Authority/Digital Signature) ຂອງ ສູນອິນເຕີເນັດ ແຫ່ງຊາດ, ກະຊວງເຕັກໂນໂລຊີ ແລະ ການສື່ສານ ເຂົ້າໃນລະບົບຄຸ້ມຄອງງົບປະມານແຫ່ງລັດ (ລາຍຮັບ-ລາຍຈ່າຍ) ຂອງກະຊວງການເງິນ ເປັນຕົ້ນແມ່ນ ລະບົບແຈ້ງພາສີປະຕູດຽວ ແຫ່ງຊາດ (ASYCUDA, NSWA+) ຂອງກົມພາສີ, ລະບົບຂໍ້ມູນຂ່າວສານຄຸ້ມຄອງລາຍຮັບ ບົດສະຫຼຸບລາຍງານການເງິນ-ບັນຊີ ຂອງບໍລິສັດ/ຫົວໜ່ວຍທຸລະກິດ ແລະ ໃບແຈ້ງມອບອາກອນ ຂອງກົມສ່ວຍສາອາກອນ (TaxRIS), ລະບົບຄຸ້ມຄອງຄັງເງິນແຫ່ງຊາດ ໃນການອອກໃບອະນຸມັດລາຍຈ່າຍງົບປະມານ ໃບຄໍາສັ່ງຈ່າຍເງິນ ໃບຖອນເງິນ ຂອງກົມງົບປະມານແຫ່ງລັດ (RTIS, GFIS+) ແລະ ລະບົບຄຸ້ມຄອງເອກະສານແບບເອເລັກໂຕຣນິກ (i-Office), ເພື່ອຫຼຸດຜ່ອນຂັ້ນຕອນໃນການດຳເນີນເອກະສານ ແບບເຈ້ຍ, ສົ່ງເສີມການສົ່ງຮັບເອກະສານ ແບບເອເລັກໂຕຣນິກ ຜ່ານທາງອອນລາຍ ໃຫ້ຮັບປະກັນຄວາມຖືກຕ້ອງ, ປອດໄພ ແລະ ວ່ອງໄວ, ເປັນການປະກອບສ່ວນທີ່ສໍາຄັນ ເຂົ້າໃນວຽກງານ ການຫັນເປັນທັນສະໄໝຂອງຂະແໜງການເງິນ. ພ້ອມທັງເປັນການຊຸກຍູ້ສົ່ງເສີມການຈັດເກັບລາຍຮັບເພີ່ມ ແລະ ຄຸ້ມຄອງການຮົ່ວໄຫຼຂອງລາຍຈ່າຍ ຕາມວາລະແຫ່ງຊາດ ວ່າດ້ວຍ ການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ. ນອກຈາກນັ້ນ, ຜູ້ເຂົ້າຮ່ວມທັງໝົດຍັງໄດ້ຮັບຊົມວິດີໂອສາທິດກ່ຽວກັບການນຳໃຊ້ລາຍເຊັນເອເລັກໂຕຣນິກ ອີກດ້ວຍ.

ໃນໂອກາດນີ້, ທ່ານ ປອ. ວິໄລທອງ ສຸດທະວິໄລ ຫົວໜ້າກົມເຕັກໂນໂລຊີຂໍ້ມູນຂ່າວສານການເງິນ ໄດ້ກ່າວວ່າ: ການຮ່ວມມືພັດທະນານຳໃຊ້ລາຍເຊັນເອເລັກໂຕຣນິກ (CA) ເຂົ້າໃນລະບົບຄຸ້ມຄອງງົບປະມານແຫ່ງລັດ (ລາຍຮັບ-ລາຍຈ່າຍ) ຂອງ ກະຊວງການເງິນ ລະຫວ່າງ ກົມເຕັກໂນໂລຊີຂໍ້ມູນຂ່າວສານການເງິນ, ກະຊວງການເງິນ ແລະ ສູນອິນເຕີເນັດແຫ່ງຊາດ, ກະຊວງເຕັກໂນໂລຊີ ແລະ ການສື່ສານ ໃນທາມກາງທີ່ແຕ່ລະຂະແໜງການກຳລັງຂຸ້ນຂ້ຽວ ຈັດຕັ້ງປະຕິບັດວາລະແຫ່ງຊາດ ເພື່ອແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ໃຫ້ປາກົດຜົນເປັນຈິງ, ກະຊວງການເງິນໄດ້ສຸມໃສ່ພັດທະນາ, ຍົກລະດັບລະບົບຄຸ້ມຄອງງົບປະມານແຫ່ງລັດ (ລາຍຮັບ-ລາຍຈ່າຍ) ໃຫ້ເປັນດິຈິຕ໋ອນເທື່ອລະກ້າວ ໂດຍສະເພາະລວມສູນການຊຳລະພາສີ-ອາກອນ, ຄ່າທຳນຽມ, ຄ່າບໍລິການ ແລະ ເບີກຈ່າຍຜ່ານລະບົບທະນາຄານ, ເຊື່ອມຕໍ່ລະບົບພາຍໃນກະຊວງການເງິນ ແລະ ຂະແໜງການທີ່ກ່ຽວຂ້ອງໃນການຄຸ້ມຄອງ, ວິເຄາະ ແລະ ວິໄຈຂໍ້ມູນລາຍຮັບໄປຄຽງຄູ່ກັບການຫຼຸດຜ່ອນຂັ້ນຕອນ, ປັບປຸງກົນໄກການຈັດຕັ້ງປະຕິບັດວຽກງານໃຫ້ກະທັດຮັດ, ມີຄວາມສະດວກ, ວ່ອງໄວ ແລະ ມີຄວາມໂປ່ງໃສ່.

ຈາກນັ້ນ, ທ່ານ ມີນາໄຊ ພິລາວົງ ຫົວໜ້າສູນອິນເຕີເນັດ ແຫ່ງຊາດ ໄດ້ສະເໜີໃຫ້ຮູ້ກ່ຽວກັບ ຄວາມໝາຍສຳຄັນ ແລະ ຄວາມຈຳເປັນໃນການນຳໃຊ້ລາຍເຊັນເອເລັກໂຕຣນິກ ໃນຍຸກການພັດທະນາເສດຖະກິດດິຈິຕ໋ອນ, ພ້ອມທັງຊີ້ໃຫ້ເຫັນເຖິງການພັດທະນາດັ່ງກ່າວ ແມ່ນສອດຄ່ອງກັບ ວິໄສທັດການພັດທະນາເສດຖະກິດດິຈິຕ໋ອນ ແຫ່ງຊາດ ໄລຍະ 20 ປີ (2021-2040), ຍຸດທະສາດການພັດທະນາເສດຖະກິດດິຈິຕ໋ອນ ແຫ່ງຊາດ ໄລຍະ 10 ປີ (2021-2030), ແຜນພັດທະນາເສດຖະກິດດິຈິຕ໋ອນ ແຫ່ງຊາດ ໄລຍະ 5 ປີ (2021-2025) ທີ່ສະພາແຫ່ງຊາດ ໄດ້ຮັບຮອງ ແລະ ລັດຖະບານ ໄດ້ປະກາດນໍາໃຊ້.

ລົງນາມໃນສັນຍາຄັ້ງນີ້, ໂດຍ ທ່ານ ມີນາໄຊ ພິລາວົງ ຫົວໜ້າສູນອິນເຕີເນັດ ແຫ່ງຊາດ ແລະ ທ່ານ ປອ. ວິໄລທອງ ສຸດທະວິໄລ ຫົວໜ້າກົມເຕັກໂນໂລຊີຂໍ້ມູນຂ່າວສານການເງິນ, ໂດຍໃຫ້ກຽດເຂົ້າຮ່ວມເປັນສັກຂີພິຍານຂອງ ທ່ານ ແກ້ວວິສຸກ ໂສລະພົມ ຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ແລະ ທ່ານ ບຸນປອນ ວັນນະຈິດ ຮອງລັດຖະມົນຕີ ກະຊວງການເງິນ, ພ້ອມນັ້ນກໍມີບັນດາ ຫົວໜ້າຫ້ອງການ, ກົມ/ທຽບເທົ່າ ຂອງທັງສອງກະຊວງ ແລະ ແຂກຖືກເຊີນເຂົ້າຮ່ວມ.

ຂ່າວ: ສູນອິນເຕີເນັດ ແຫ່ງຊາດ

ພາບ: ນາງ ທັດສະນີ ພົງບັນດິດ, ພະແນກປະຊາສຳພັນ