ພິທີມອບ-ຮັບ ໜ້າທີ່ຫົວໜ້າສູນອິນເຕີເນັດແຫ່ງຊາດ ແລະ ຫົວໜ້າສູນສົ່ງເສີມ ແລະ ຖ່າຍທອດເຕັກໂນໂລຊີ, ກະຊວງເຕັກໂນໂລຊີ ແລະ ການສື່ສານ(ກຕສ) ເພື່ອຊັບຊ້ອນປ່ຽນແທນ ແນໃສ່ເພື່ອຮອງຮັບໃຫ້ແກ່ການຈັດຕັ້ງປະຕິບັດວຽກງານຂອງສອງພາກສ່ວນດັ່ງກ່າວໄດ້ດຳເນີນຢ່າງປົກກະຕິ. ພິທີດັ່ງກ່າວໄດ້ຈັດຂຶ້ນໃນຕອນບ່າຍຂອງວັນທີ 30 ພະຈິກ 2022 ນີ້, ທີ່ຫ້ອງປະຊຸມໃຫຍ່ກະຊວງ(ສີສະເກດ) ໃຫ້ກຽດເຂົ້າຮ່ວມຂອງທ່ານ ບັນດິດ ສຈ. ບໍ່ວຽງຄໍາ ວົງດາລາ, ກໍາມະການສູນກາງພັກ, ເລຂາຄະນະພັກ, ລັດຖະມົນຕີ ກຕສ, ມີບັນດາທ່ານຮອງລັດຖະມົນຕີ, ບັນດາຄະນະກົມ/ທຽບເທົ່າ ແລະ ຜູ້ອໍານວຍການໃຫຍ່ ບໍລິສັດ ວິສາຫະກິດ ອ້ອມຂ້າງ ພ້ອມດ້ວຍພະນັກງານພາກສ່ວນກ່ຽວຂ້ອງເຂົ້າຮ່ວມ.

ໃນພິທີຄັ້ງນີ້ໄດ້ມີການເຊັນມອບ-ຮັບໜ້າທີ່ ລະຫວ່າງ ທ່ານ ແກ້ວວິສຸກ ໂສລະພົມ, ຫົວໜ້າສູນອິນເຕີເນັດແຫ່ງຊາດ(ຜູ້ເກົ່າ) ຖືກແຕ່ງຕັ້ງເປັນຮອງລັດຖະມົນຕີ ແລະ ທ່ານ ມີນາໄຊ ພິລາວົງ, ຫົວໜ້າສູນສົ່ງເສີມ ແລະ ຖ່າຍທອດເຕັກໂນໂລຊີ ມາເປັນ ຫົວໜ້າສູນອິນເຕີເນັດແຫ່ງຊາດ(ຜູ້ໃໝ່) ແລະ ພ້ອມດຽວກັນ, ກໍໄດ້ເຊັນມອບ-ຮັບໜ້າທີ່ ລະຫວ່າງທ່ານ ມີນາໄຊ ພິລາວົງ, ຫົວໜ້າສູນສົ່ງເສີມ ແລະ ຖ່າຍທອດເຕັກໂນໂລຊີ(ຜູ້ເກົ່າ) ແລະ ທ່ານ ນາງ ເກສອນ ສຸລິວົງ, ຮັກສາການຫົວໜ້າສູນສົ່ງເສີມ ແລະ ຖ່າຍທອດເຕັກໂນໂລຊີ(ຜູ້ໃໝ່).

ໃນໂອກາດເຂົ້າຮ່ວມພິທີຄັ້ງນີ້, ທ່ານ ບັນດິດ ສຈ. ບໍ່ວຽງຄໍາ ວົງດາລາ ໄດ້ມີຄໍາເຫັນ ແລະ ໂອ້ລົມຕໍ່ພິທີ ຊຶ່ງທ່ານໄດ້ກ່າວສະແດງຄວາມຍ້ອງຍໍຊົມເຊີຍຜູ້ທີ່ໄດ້ຮັບການແຕ່ງຕັ້ງໃນຄັ້ງນີ້ ແລະ ໄດ້ເນັ້ນໜັກເປັນເຈົ້າການນໍາພາບັນດາກະຊວງ, ຂະແໜງການທີ່ກ່ຽວຂ້ອງເພື່ອຫັນເປັນດິຈິຕ໋ອນໃນຂອບເຂດທົ່ວປະເທດ ໂດຍສະເພາະໃນທ້າຍເດືອນທັນວາ 2022 ຈະມີການຈັດງານສັບປະດາດິຈິຕ໋ອນ ປີ 2022 ແຫ່ງຊາດຂຶ້ນ ໂດຍກະຊວງໄດ້ຮັບກຽດຈັດຂຶ້ນເປັນຄັ້ງທໍາອິດ ຊຶ່ງປຽບເໝືອນສຽງຣະຄັງປະຫວັດສາດທີ່ສໍາຄັນເພື່ອໃຫ້ທົ່ວປະເທດ ກໍຄືສາກົນໄດ້ຮັບຮູ້ວ່າ ສປປ ລາວ ໄດ້ເລີ່ມຕົ້ນຂະບວນການຫັນເປັນດິຈິຕ໋ອນ ຊຶ່ງຈະເປັນພາລະກໍາປະຫວັດສາດ ແລະ ໜ້າທີ່ການເມືອງ ທີ່ພັກ-ລັດ ມອບໝາຍໃຫ້. ຊຶ່ງການຫັນເປັນດິຈິຕ໋ອນ ແມ່ນຂະບວນການໜຶ່ງທີ່ຫຼີກລ່ຽງບໍ່ໄດ້ ຈະເປັນຂະບວນການທີ່ຈະສ້າງລັດດິຈິຕ໋ອນ ແລະ ສ້າງສັງຄົມດິຈິຕ໋ອນ ຈະເປັນວຽກງານໜຶ່ງຂອງສູນອິນເຕີເນັດແຫ່ງຊາດທີ່ຈະຕ້ອງໄດ້ເປັນເຈົ້າການ ໂດຍສະເພາະແມ່ນການເຊື່ອມຕໍ່ບັນດາຂໍ້ມູນ ແລະ ການຄຸ້ມຄອງນຳໃຊ້ອິນເຕີເນັດ ຊຶ່ງເປັນປັດໄຈພື້ນຖານທີ່ສໍາຄັນ ໂດຍຂະຫຍາຍສັນຍານອິນເຕີເນັດໄປໃຫ້ທົ່ວເຖິງທຸກຂົງເຂດພາຍໃນປະເທດ ພ້ອມນັ້ນ, ຈະຕ້ອງປົກປ້ອງຮັກສາຄວາມປອດໄພທາງໄຊເບີ, ການນໍາໃຊ້ອິນເຕີເນັດຢູ່ໃນສັງຄົມອອນລາຍ ເພື່ອຫຼີກລ່ຽງການໂຈລະກໍາຂໍ້ມູນ ແລະ ເຮັດໃຫ້ຜູ້ນໍາໃຊ້ມີຄວາມປອດໄພທາງດ້ານຂໍ້ມູນໃຫ້ມີປະສິດທິພາບ. ຄຽງຄູ່ກັນນັ້ນ, ສູນສົ່ງເສີມ ແລະ ຖ່າຍທອດເຕັກໂນໂລຊີ ກໍເປັນສູນໜຶ່ງທີ່ຈະນໍາເອົາຄວາມຮູ້, ນໍາເອົາບັນດາທິດສະດີ, ນໍາເອົາບັນດາເຕັກໂນໂລຊີໃໝ່ໆ ເຜີຍແຜ່ອອກໄປສູ່ສັງຄົມ ໂດຍສະເພາະແມ່ນການຈັດຝຶກອົບຮົມ, ສໍາມະນາ, ຈັດການຖ່າຍທອດ ແລະ ການສົ່ງເສີມ ເຕັກໂນໂລຊີດິຈິຕ໋ອນ ໃຫ້ກວ້າງຂວາງ.

ພາບ+ຂ່າວ: ເລັກເຊ່ຍ ສຸດທິວົງ