ສູນອິນເຕີເນັດ ແຫ່ງຊາດ (ສອຊ), ກະຊວງເຕັກໂນໂລຊີ ແລະ ການສື່ສານ (ກຕສ) ໄດ້ຈັດຝຶກອົບຮົມການນຳໃຊ້ລາຍເຊັນເອເລັກໂຕຣນິກ ແບບ Softkey ໃຫ້ແກ່ພະນັກງານ - ລັດຖະກອນ ຂັ້ນພະແນກ ຂອງບັນດາກົມ/ທຽບເທົ່າ ພາຍໃນ ກະຊວງ ຂຶ້ນໃນລະຫວ່າງວັນທີ 04-05 ຕຸລາ 2022 ຜ່ານມານີ້, ທີ່ ຫ້ອງປະຊຸມໃຫຍ່ ສູນອິນເຕີເນັດແຫ່ງຊາດ. ໂດຍການເປັນປະທານກ່າວເປີດຂອງ ທ່ານ ພອນສະຫວັດ ຄົງສະຫວັດ, ຮອງຫົວໜ້າ ສູນອິນເຕີເນັດ ແຫ່ງຊາດ. ຊຶ່ງໄດ້ຈັດແບ່ງການຝຶກອົບຮົມອອກເປັນ 4 ຊຸດ ແລະ ມີຜູ້ເຂົ້າຮ່ວມທັງໝົດ ຈໍານວນ 109 ທ່ານ.

ການຝຶກອົບຮົມການນຳໃຊ້ລາຍເຊັນເອເລັກໂຕຣນິກ ແບບ Softkey ໃນຄັ້ງນີ້ ແມ່ນວຽກງານໜຶ່ງທີ່ທາງພະແນກ ສູນຮັບຮອງລາຍເຊັນເອເລັກໂຕຣນິກ ແຫ່ງຊາດ, ສອຊ ເຫັນໄດ້ເຖິງຄວາມໝາຍຄວາມສໍາຄັນ ເພື່ອເປັນການຍົກລະດັບຄວາມຮູ້ ຄວາມສາມາດ ແລະ ເສີມສ້າງຄວາມຮູ້ຄວາມເຂົ້າໃຈໃຫ້ແກ່ພະນັກງານຂັ້ນພະແນກ ພາຍໃນ ກຕສ ຮູ້ຫຼັກການພື້ນຖານໃນການນຳໃຊ້, ຂັ້ນຕອນການຕິດຕັ້ງໂປຼແກຼມລົງລາຍເຊັນ ລວມໄປເຖິງ ຂອບເຂດຂອງການນຳໃຊ້ລາຍເຊັນເອເລັກໂຕຣນິກ ແບບ Softkey ເພື່ອໃຫ້ສາມາດນຳໄປໝູນໃຊ້ເຂົ້າໃນວຽກງານການລົງລາຍເຊັນຂອງຕົນໄດ້.

ໃນວາລະການຝຶກອົບຮົມ, ບັນດາຜູ້ເຂົ້າຮ່ວມໄດ້ຮັບຟັງການນໍາສະເໜີພາບລວມຂອງລະບົບລາຍເຊັນເອເລັກໂຕຣນິກ ແບບ Softkey, ວິທີການດາວໂຫຼດ, ຕິດຕັ້ງ ແລະ ນຳໃຊ້ Plugin Virtual CSP ແລະ App Gov Softkey. ພ້ອມກັນນັ້ນ, ຍັງມີການສາທິດການລົງລາຍເຊັນເອເລັກໂຕຣນິກໃນເອກະສານ PDF ຜ່ານໂປຣແກຣມ Adobe Acrobat Reader DC ແລະ ການແນະນຳໃນການກວດກາລາຍເຊັນເອເລັກໂຕຣນິກທີ່ຖືກຕ້ອງ. ໂດຍນັກວິທະຍາກອນຈາກ ພະແນກ ສູນຮັບຮອງລາຍເຊັນເອເລັກໂຕຣນິກ ແຫ່ງຊາດ, ສູນອິນເຕີເນັດ ແຫ່ງຊາດ ເປັນຜູ້ບັນລະຍາຍ ແລະ ທົດລອງການປະຕິບັດຕົວຈິງ ພ້ອມດ້ວຍທີມງານທີ່ຕິດຕາມໃຫ້ຄຳແນະນຳ ແກ່ນັກສຳມະນາກອນທີ່ເຂົ້າຮ່ວມຝຶກໃນຄັ້ງນີ້.

ການຝຶກອົບຮົມຄັ້ງນີ້ ໄດ້ດໍາເນີນໄປດ້ວຍບັນຍາກາດຟົດຟື້ນ ແລະ ມີຄວາມໝາຍ ຊຶ່ງຜ່ານການຝຶກອົບຮົມ ເຫັນໄດ້ວ່ານັກສໍາມະນາກອນມີຄວາມສົນໃຈ ແລະ ເອົາໃຈໃສ່ຢ່າງຕັ້ງໜ້າໃນການຝຶກ ໂດຍໄດ້ສະແດງອອກຈາກການແລກປ່ຽນຄຳຄິດເຫັນຕໍ່ບັນດາຫົວຂໍ້ຢ່າງມີລັກສະນະສ້າງສັນ ເຮັດໃຫ້ບັນຍາກາດໃນການຝຶກອົບຮົມເປັນໄປດ້ວຍຄວາມຟົດຟື້ນ ແລະ ດໍາເນີນໄປດ້ວຍຜົນສໍາເລັດຢ່າງຈົບງາມ.

ພາບ ແລະ ຂ່າວ: ພະແນກ ສູນຮັບຮອງລາຍເຊັນ ເອເລັກໂຕຣນິກ ແຫ່ງຊາດ, ສູນອິນເຕີເນັດ ແຫ່ງຊາດ.