ກອງປະຊຸມ ສະຫຼຸບຜົນການເຄື່ອນໄຫວວຽກງານ ປະຈຳປີ 2021 ແລະ ທິດທາງແຜນການ ປະຈຳປີ 2022 ຂອງຄະນະຊາວໜຸ່ມຮາກຖານ ສູນອິນເຕີເນັດ ແຫ່ງຊາດ

23/03/2022

ກອງປະຊຸມ ສະຫຼຸບຜົນການເຄື່ອນໄຫວວຽກງານ ປະຈຳປີ 2021 ແລະ ທິດທາງແຜນການ ປະຈຳປີ 2022  ຂອງຄະນະຊາວໜຸ່ມຮາກຖານ ສູນອິນເຕີເນັດ ແຫ່ງຊາດ

      ໃນຕອນບ່າຍຂອງວັນທີ 23 ມີນາ 2022, ຄະນະຊາວໜຸ່ມຮາກຖານ ສູນອິນເຕີເນັດ ແຫ່ງຊາດ ໄດ້ຈັດ ກອງປະຊຸມ ສະຫຼຸບຜົນການເຄື່ອນໄຫວວຽກງານ ປະຈຳປີ 2021 ແລະ ທິດທາງແຜນການ ປະຈຳປີ 2022 ຂອງຕົນຂຶ້ນ ໃນທ່າມກາງບັນຍາກາດ ທີ່ທົ່ວພັກ ທົ່ວລັດ ແລະ ທົ່ວປວງຊົນລາວທັງຊາດ ອອກແຮງແຂ່ງຂັນສ້າງຜົນງານຂ່ຳນັບຮັບຕ້ອນ ແລະ ສະເຫຼີມສະຫຼອງວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 67 ປີ (22 ມີນາ 1955 ຫາ 22 ມີນາ 2022) ແລະ ວັນສ້າງຕັ້ງຄະນະຊາວໜຸ່ມປະຊາຊົນປະຕິວັດລາວ ຄົບຮອບ 67 ປີ (14 ເມສາ 1955 ຫາ 14 ເມສາ 2022) ທີ່ຈະມາເຖິງ. ພ້ອມດຽວກັນນັ້ນ, ບັນດາຫນ່ວຍພັກຮາກຖານ,​ ຄະນະພັກຮາກຖານ ແລະ ສາມອົງການຈັດຕັ້ງມະຫາຊົນ ກໍ່ກໍາລັງຂຸ້ນຂ້ຽວ ສ້າງຜົນງານ ແລະ ຂະບວນການ ກະກຽມ ຂໍ່ານັບຮັບຕ້ອນ ກອງປະຊຸມໃຫຍ່ຜູ້ແທນ ຄັ້ງທີ II ຂອງອົງຄະນະພັກ ກະຊວງເຕັກໂນໂລຊີ ແລະ ການສື່ສານ ທີ່ຈະເປີດຂຶ້ນໃນມໍ່ໆນີ້.

         ກອງປະຊຸມ ໄດ້ຮັບກຽດເປັນປະທານກອງປະຊຸມຂອງ  ສະຫາຍ  ແກ້ວວີສຸກ ໂສລະພົມ,  ຄະນະພັກກະຊວງ ເຕັກໂນໂລຊີ ແລະ ການສື່ສານ, ເລຂາໜ່ວຍພັກ, ຫົວໜ້າສູນອິນເຕີເນັດ ແຫ່ງຊາດ, ແລະ ສະຫາຍ ພວງປະເສີດ ແກ້ວສຸວັນ, ກຳມະການຄະນະບໍລິຫານງານ ສູນກາງຊາວໜຸ່ມປະຊາຊົນປະຕິວັດລາວ, ເລຂາຄະນະບໍລິຫານງານຊາວໜຸ່ມ ກະຊວງເຕັກໂນໂລຊີ ແລະ ການສື່ສານ, ມີບັນດາ ຄະນະບໍລິຫານງານ, ຄະນະໜ່ວຍ, ຄະນະຈຸ ແລະ ສະມາຊິກຊາວໜຸ່ມຮາກຖານ ສອຊ ເຂົ້າຮ່ວມ ຢ່າງພ້ອມພຽງ. ໃນນີ້ ທາງຄະນະພັກ ແລະ ຄະນະບໍລິຫານງານຊາວໜຸ່ມ ໄດ້ເອົາໃຈໃສ່ຊີ້ນຳ ຕໍ່ກັບການຈັດກອງປະຊຸມໃນຄັ້ງນີ້ ໂດຍຈັດໃນຮູບແບບກອງປະຊຸມທາງໄກ 100% ເພື່ອຫຼີກເວັ້ນການສຳຜັດ ແລະ ການຊຸມນຸມຊ້ອງໜ້າ, ທັງເປັນການປະຕິບັດມາດຕະການປ້ອງກັນພະຍາດໂຄວິດ 19 ຢ່າງເຂັ້ມງວດ.

      ໃນພິທີ ສະຫາຍ ໄຊສົມຫວັງ ສຸວັນນະວົງ ເລຂາຄະນະບໍລິຫານງານຊາວໜຸ່ມຮາກຖານ ສູນອິນເຕີເນັດ ແຫ່ງຊາດ ໄດ້ສະເໜີບົດສະຫຼຸບຜົນການເຄື່ອນໄຫວ ປະຈຳປີ 2021 ແລະ ທິດທາງແຜນການ ປະຈຳປີ 2022 ຂອງຊາວໜຸ່ມ ສອຊ, ເຊິ່ງໄດ້ເນັ້ນໜັກໃຫ້ເຫັນບັນດາຜົນງານທີ່ຍາດມາໄດ້, ໂດຍສະເພາະ ແມ່ນວຽກງານຕິດພັນກັບວິຊາສະເພາະ ທີ່ສະມາຊິກຊາວໜຸ່ມ ສອຊ ເປັນຜູ້ຈັດຕັ້ງປະຕິບັດຕົວຈິງ ພາຍໃຕ້ການຊີ້ນຳ-ນຳພາ ຂອງຄະນະໜ່ວຍພັກ ສອຊ ໃນການຮັບປະກັນດ້ານເຕັກນິກການເຊື່ອມຕໍ່-ການສື່ສານ ແລະ ວຽກງານໂຄງລ່າງພື້ນຖານເຕັກນິກສູນຂໍ້ມູນແຫ່ງຊາດ, ລາຍເຊັນເອເລັກໂຕຣນິກ, ລະຫັດຊື່ອິນເຕີເນັດ ແລະ ອື່ນໆ, ເຊິ່ງລ້ວນແລ້ວແຕ່ເປັນພື້ນຖານກະກຽມໃຫ້ແກ່ການຫັນເປັນດິຈິຕອນ, ການພັດທະນາເສດຖະກິດດິຈິຕອນ ແລະ ກ້າວເຂົ້າສູ່ຍຸກອຸດສາຫະກຳ 4.0 ຂອງ ສປປ ລາວ. ສະຫາຍ ໄຊສົມຫວັງ ສຸວັນນະວົງ ຍັງໄດ້ຕີລາຄາ ດ້ານດີ, ດ່ານອ່ອນ ແລະ ບັນດາຂໍ້ຄົງຄ້າງ ເຊິ່ງສະມາຊິກຊາວໜຸ່ມທຸກສະຫາຍ ຕ້ອງໄດ້ພາກັນປັບປຸງແກ້ໄຂໃຫ້ດີຂຶ້ນເລື້ອຍໆ.

ພ້ອມດຽວກັນນັ້ນ, ສະຫາຍ ສຸລິສັກ ພົມມະແສນ  ຮອງເລຂາ, ປະທານກວດກາ ຄະນະບໍລິຫານງານຊາວໜຸ່ມຮາກຖານ ສອຊ ໄດ້ນຳສະເໜີກ່ຽວກັບການຈັດຕັ້ງປະຕິບັດ ການປະເມີນ ຂໍ້ແຂ່ງຂັນ 4 ບຸກ ໃນໄລຍະຜ່ານມາ ເຊິ່ງຄະນະຊາວໜຸ່ມຮາກຖານ ສອຊ ສາມາດຍາດມາໄດ້ນາມມະຍົດ 4 ບຸກ 2 ປີຊ້ອນ (2018 ແລະ 2019), ແລະ ໄດ້ເນັ້ນໜັກໃຫ້ ສະມາຊິກຊາວໜຸ່ມ ສອຊ ທຸກສະຫາຍ ສືບຕໍ່ຮັກສາມູນເຊື້ອໃນການຈັດຕັ້ງປະຕິບັດຂໍ້ແຂ່ງຂັນ 4 ບຸກ ເພື່ອໃຫ້ຍາດມາໄດ້ ນາມມະຍົດ ຄະນະຊາວໜຸ່ມຮາການ 4 ບຸກ ເປັນປີທີ 3 ຕິດຕໍ່ກັນ.

      ຫຼັງຈາກນັ້ນ ສະຫາຍ ພວງປະເສີດ ແກ້ວສຸວັນ ໄດ້ໃຫ້ກຽດມີຄຳເຫັນຕໍ່ກອງປະຊຸມ ເຊິ່ງໄດ້ສະແດງຄວາມຊົມເຊີຍຕໍ່ບັນດາຜົນງານທີ່ຍາດມາໄດ້ໃນປີຜ່ານມາ ພ້ອມທັງເນັ້ນຢ້ຳໃຫ້ບັນດາສະມາຊິກຊາວໜຸ່ມ ສອຊ ຈົ່ງສືບຕໍ່ຮັກສາມູນເຊື້ອອັນດີງາມທີ່ເຮັດໄດ້ຜ່ານມາ, ພ້ອມທັງປັບປຸງບັນດາຈຸດອ່ອນ ແລະ ຂໍ້ຄົງຄ້າງ ເພື່ອໃຫ້ກາຍເປັນກຳລັງແຮງ ແລະ ເປັນຜູ້ຊ່ວຍທີ່ດີຂອງພັກ.

      ກອງປະຊຸມຍັງໄດ້ຮັບຟັງການໂອ້ລົມ ຂອງ ສະຫາຍ  ແກ້ວວິສຸກ ໂສລະພົມ, ເຊິ່ງທິດຊີ້ນຳ ແລະ ທຸກຄຳໂອວາດຂອງສະຫາຍ ຖືເປັນເຂັມທິດຊີ້ທາງໃຫ້ແກ່ ສະມາຊິກຊາວໜຸ່ມ ສູນອິນເຕີເນັດ ແຫ່ງຊາດ ໄດ້ນຳເອົາໄປຜັນຂະຫຍາຍ ຈັດຕັ້ງປະຕິບັດເຂົ້າໃນວຽກງານວິຊາສະເພາະ, ທັງໃນການດຳລົງຊີວິດປະຈຳວັນ ໃຫ້ເປັນຄົນຮູ້ຜູ້ດີ ສ້າງປະໂຫຍດໃຫ້ແກ່ສັງຄົມ ກໍ່ຄືການຈັດຕັ້ງປະຕິບັດທຸກໜ້າທີ່ ທຸກວຽກງານ ທີ່ໄດ້ຮັບມອບໝາຍຈາກຂັ້ນເທິງ ກໍ່ຄື ຄະນະພັກ ຄະນະສູນ ອິນເຕີເນັດ ແຫ່ງຊາດ. ທັງນີ້ ກໍ່ເພືື່ອເປັນການຝຶກຝົນຫຼໍ່ຫຼອມຕົນເອງ ໃຫ້ມີຄວາມຮູ້ ຄວາມສາມາດ ເພື່ອກຽມພ້ອມຮັບພາລະກິດ ເປັນຜູ້ສືບທອດທີ່ດີຂອງພັກ, ເປັນພະນັກງານທີ່ມີປະສິດທິພາບຂອງລັດ, ດັ່ງຄຳຂວັນຂອງຊາວໜຸ່ມທີ່ວ່າ: “ຊາວໜຸ່ມ ແມ່ນກະດູກສັນຫຼັງຂອງຊາດ”, “ຊາວໜຸ່ມ ແມ່ນແຂນຂວາຂອງພັກ”, “ຊາວໜຸ່ມຈົ່ງເປັນດັ່ງນົກອິນຊີ ທີ່ບໍ່ຫວັ່ນກົວຕໍ່ພະຍຸລົມແດງ ຈົ່ງກາຍເປັນສິນໄຊຂອງຍຸກສະໄໝພວກເຮົາ”.

   

ຂ່າວໂດຍ: ຄະນະຊາວໜຸ່ມຮາກຖານ ສູນອິນເຕີເນັດ ແຫ່ງຊາດ

 

ການລົງທະບຽນລະຫັດຊື່ເປັນພາສາລາວ ໄດ້ແລ້ວ