ກອງປະຊຸມສະຫຼຸບການເຄື່ອນໄຫວຽກງານຊາວໜຸ່ມປະຈຳປີ 2020 ແລະ ທິດທາງແຜນການປະຈຳປີ 2021 ຂອງ ຄະນະຊາວໜຸ່ມຮາກຖານ ສູນອິນເຕີເນັດ ແຫ່ງຊາດ

02/03/2021

      ຄະນະຊາວໜຸ່ມປະຊາຊົນປະຕິວັດລາວ ຮາກຖານ ສູນອິນເຕີເນັດ ແຫ່ງຊາດ ໄດ້ຈັດກອງປະຊຸມສະຫຼຸບການເຄື່ອນໄຫວຽກງານຊາວໜຸ່ມປະຈຳປີ 2020 ແລະ ທິດທາງແຜນການປະຈຳປີ 2021 ຂອງຕົນຂຶ້ນ ໃນວັນທີ 24 ກຸມພາ 2021, ທີ່ຫ້ອງປະຊຸມໃຫຍ່ ສູນອິນເຕີເນັດ ແຫ່ງຊາດ, ໂດຍການເປັນປະທານຂອງ ສະຫາຍ ມີນາໄຊ ພິລາວົງ ຮອງເລຂາໜ່ວຍພັກ ຮອງຫົວໜ້າສູນອິນເຕີເນັດແຫ່ງຊາດ, ມີບັນດາສະຫາຍຕາງໜ້າ ແມ່ຍິງ ແລະ ກຳມະບານ, ບັນດາຄະນະບໍລິຫານງານ ແລະ ສະມາຊິກຊາວໜຸ່ມພາຍໃນ ສອຊ ເຂົ້າຮ່ວມຢ່າງພ້ອມພຽງ.

      ໃນກອງປະຊຸມ, ສະຫາຍ ໄຊສົມຫວັງ ສຸວັນນະວົງ ຄະນະປະຈຳ ຄຊປປລ ກະຊວງ ປທສ, ເລຂາຄະນະບໍລິຫານງານຊາວໜຸ່ມຮາກຖານ ສູນອິນເຕີເນັດ ແຫ່ງຊາດ ໄດ້ຜ່ານບົດສະຫຼຸບການເຄື່ອນໄຫວຽກງານຊາວໜຸ່ມປະຈຳປີ 2020 ແລະ ທິດທາງແຜນການປະຈຳປີ 2021, ໂດຍໄດ້ຍົກໃຫ້ເຫັນຫຼາຍຜົນງານທີ່ພົ້ນເດັ່ນຂອງຄະນະຊາວໜຸ່ມ ສອຊ ກໍຄື ບັນດາສະມາຊິກຊາວໜຸ່ມ ຍາດມາໄດ້ ໃນປີທີ່ຜ່ານມາ. ພ້ອມກັນນັ້ນ, ກໍ່ໄດ້ຍົກໃຫ້ເຫັນດ້ານດີ, ດ້ານອ່ອນ, ຂໍ້ຄົງຄ້າງ ທີ່ຕ້ອງໄດ້ສືບຕໍ່ປັບປຸງແກ້ໄຂ, ສະແດງໃຫ້ເຫັນສາເຫດຕ່າງໆ ແລະ ສະຫຼຸບສັງລວມ ຖອດຖອນເປັນບົດຮຽນໃຫ້ແກ່ການນຳພາຂອງຄະນະບໍລິຫານງານ ຊປປລ ກະຊວງ ປທສ ໃນຕໍ່ໜ້າ.

ໃນກອງປະຊຸມ ຍັງໄດ້ມີການເຜີຍແຜ່ບັນດາຜົນສຳເລັດ ແລະ ເອກະສານສຳຄັນ ຄື:

  • ເຜີຍແຜ່ຜົນສຳເລັດການຈັດຕັ້ງປະຕິບັດ ແລະ ຍາດມາໄດ້ ນາມມະຍົດ ຄະນະຊາວໜຸ່ມຮາກຖານ 4 ບຸກ ປະຈຳປີ 2019 ແລະ ທິດທາງແຜນການໃນຕໍ່ໜ້າ, ໂດຍ ສະຫາຍ ສຸລິສັກ ພົມມະແສນ ຮອງເລຂາຄະນະບໍລິຫານງານຊາວໜຸ່ມຮາກຖານ ສອຊ;

  • ການນຳສະເໜີແຜນກິດຈະກຳຮ່ວມກັນລະຫວ່າງ 3 ອົງການຈັດຕັ້ງມະຫາຊົນ ພາຍໃນສູນ, ໂດຍ ສະຫາຍ ວົງສີສຸກ ທຳມະວົງ ກຳມະການຄະນະບໍລິຫານງານຊາວໜຸ່ມຮາກຖານ ສອຊ;

  • ເຜີຍແຜ່ການປັບປຸງໂຄງຮ່າງການຈັດຕັ້ງຄືນໃໝ່ ເນື່ອງຈາກມີການຊັບຊ້ອນພະນັກງານ, ໂດຍ ສະຫາຍ ຈະຕຸພົນ ພູມິນ ກຳມະການຄະນະບໍລິຫານງານຊາວໜຸ່ມຮາກຖານ ສອຊ;

  • ສະຫາຍ ໄຊສົມຫວັງ ສຸວັນນະວົງ ຍັງໄດ້ເຜີຍແຜ່ ມະຕິກອງປະຊຸມໃຫຍ່ຜູ້ແທນຊາວໜຸ່ມທົ່ວປະເທດ ຄັ້ງທີ VIII ເພື່ອໃຫ້ບັນດາສະມາຊິກ ໄດ້ຮັບຮູ້ ເຂົ້າໃຈ ແລະ ນຳໄປຜັນຂະຫຍາຍ ຈັດຕັ້ງປະຕິບັດໃຫ້ປະກົດຜົນເປັນຈິງ.


      ໃນຕອນທ້າຍ, ສະຫາຍ ມີນາໄຊ ພິລາວົງ ກໍ່ໄດ້ໃຫ້ກຽດໂອ້ລົມຕໍ່ກອງປະຊຸມ, ໂດຍໄດ້ຍ້ອງຍໍຕໍ່ບັນດາຜົນສຳເລັດ ທີ່ ຄະນະຊາວໜຸ່ມຮາກຖານ ສອຊ ຍາດມາໄດ້ ບໍ່ສະເພາະແຕ່ປີ 2020 ແຕ່ຍັງລວມເຖິງມູນເຊື້ອການປະກອບສ່ວນ ແລະ ການຕັ້ງໜ້າຈັດຕັ້ງປະຕິບັດວຽກງານຕ່າງໆ ຕະຫຼອດໄລຍະທີ່ຜ່ານມາ. ສະຫາຍ ໄດ້ເນັ້ນໃຫ້ ຄະນະບໍລິຫານງານຊາວໜຸ່ມ ກະຊວງ ປທສ ເອົາໃຈໃສ່ ສຶກສາອົບຮົມທາງດ້ານແນວຄິດ ຕໍ່ສະມາຊິກຊາວໜຸ່ມ ໃຫ້ມີຄວາມຫ້າວຫັ້ນ ມີຄວາມຮັບຜິດຊອບ ແລະ ເປັນເຈົ້າການໃນການປະຕິບັດໜ້າທີ່ໄດ້ຮັບມອບໝາຍ, ພ້ອມດຽວກັນນັ້ນ ກໍ່ຕ້ອງໄດ້ຊອກຫາ ຮຽນຮູ້ ໃຊ້ເວລາຫວ່າງໃຫ້ເປັນປະໂຫຍດ. ສະຫາຍຍັງໄດ້ເນັ້ນໜັກ ໃຫ້ສະມາຊິກຊາວໜຸ່ມ ມີສະຕິຕໍ່ການນຳໃຊ້ສື່ສັງຄົມອອນລາຍ, ເຊິ່ງໃນໄລຍະຜ່ານມາ ກໍ່ໄດ້ມີການນຳໃຊ້ໃນທາງທີ່ບໍ່ຖືກຕ້ອງໃນຫຼາຍລັກສະນະ ຫຼາຍຮູບການ ເຊັ່ນ: ການນຳໃຊ້ເປັນເຄື່ອງມືປຸກປັ່ນສ້າງຂ່າວປອມ ເປັນສາເຫດການສ້າງຄວາມວຸ້ນວາຍໃນສັງຄົມ, ການຕົວະຍົວະຫຼອກລວງໃນຮູບແບບຕ່າງໆ. ແຕ່ໃນທາງສ້າງສັນ, ແມ່ນໃຫ້ເອົາໃຈໃສ່ໃນການເສີມຂະຫຍາຍສະຕິປັນຍາ ແລະ ຫົວຄິດປະດິດສ້າງຂອງ ກຳລັງຊາວໜຸ່ມ-ໄວໜຸ່ມລາວ ເພື່ອປະກອບສ່ວນເຂົ້າໃນການສ້າງສາ ແລະ ພັດທະນາປະເທດຊາດ ເພື່ອຫັນເປັນດິຈິຕອນ ຢ່າງເປັນຂະບວນການຟົດຟື້ນ ແລະ ພົ້ນເດັ່ນ, ໂດຍສະເພາະ ແມ່ນ ຊາວໜຸ່ມ ພາຍໃນສູນ ກໍ່ຄື ຂະແໜງ ປທສ ຕ້ອງເປັນຕົວແບບພັດທະນາຕົນເອງ ໃຫ້ກາຍເປັນໄວໜຸ່ມດິຈິຕອນ ທີ່ມີທັກສະ ແລະ ຄວາມຮູ້ພື້ນຖານທາງດ້ານເຕັກໂນໂລຊີດິຈິຕອນ, ສາມາດໝູນໃຊ້ເຂົ້າໃນການຈັດຕັ້ງປະຕິບັດວຽກງານຕົວຈິງ ໃຫ້ມີປະສິດທິພາບ ແລະ ປະສິດທິຜົນ. 

ຂຽນຂ່າວໂດຍ: ສູນອິນເຕີເນັດແຫ່ງຊາດ

 

ການລົງທະບຽນລະຫັດຊື່ເປັນພາສາລາວ ໄດ້ແລ້ວ