ໜ່ວຍພັກສູນອິນເຕີເນັດ ແຫ່ງຊາດ ໄດ້ຈັດພິທີຮັບສະມາຊິກພັກສຳຮອງ

04/02/2021

     ໜ່ວຍພັກສູນອິນເຕີເນັດ ແຫ່ງຊາດ ໄດ້ຈັດພິທີຮັບສະມາຊິກພັກສຳຮອງ ໃນຕອນເຊົ້າຂອງວັນທີ 03 ກຸມພາ 2021 ທີ່ຫ້ອງປະຊຸມໃຫຍ່ ສູນອິນເຕີເນັດ ແຫ່ງຊາດ (ສອຊ) ກະຊວງໄປສະນີ, ໂທລະຄົມມະນາຄົມ ແລະ ການສື່ສານ (ປທສ). ພິທີດັ່ງກ່າວ ໄດ້ຮັບກຽດເປັນປະທານໂດຍ ສະຫາຍ ແກ້ວວີສຸກ ໂສລະພົມ ຄະນະພັກກະຊວງ ປທສ, ເລຂາໜ່ວຍພັກ ສອຊ, ມີບັນດາຄະນະໜ່ວຍພັກ ແລະ ສະມາຊິກພັກພາຍໃນສູນ ເຂົ້າຮ່ວມຢ່າງພ້ອມພຽງ.

      ໃນພິທີ ສະຫາຍ ທົງໄຊ ພຸດທະວົງສີ ໄດ້ສະເໜີຄຳຮ້ອງເຂົ້າເປັນສະມາຊິກພັກ ແລະ ໄດ້ປະຕິຍານຕົນໃນການຈັດຕັ້ງປະຕິບັດລະບຽບພັກຢ່າງເຄັ່ງຄັດ.ຕໍ່ຈາກນັ້ນ ສະຫາຍ ແກ້ວວີສຸກ ໂສລະພົມ ກໍ່ໄດ້ໂອ້ລົມ ໃຫ້ຄຳໂອວາດຕໍ່ສະມາຊິພັກສຳຮອງໃຫມ່ ແລະ ສະມາຊິກພັກສົມບູນທຸກສະຫາຍ ໂດຍໄດ້ເນັ້ນຫນັກໃຫ້ທຸກສະຫາຍ ຕັ້ງຫນ້າ ເອົາໃຈໃສ່ສືບຕໍ່ຈັດຕັ້ງປະຕິບັດລະບຽບຂອງພັກ ໂດຍສະເພາະບັນດາ 5 ຫລັກການ ແລະ 3 ທີດນຳ, ບັນດາກົດໝາຍ-ລະບຽບການຂອງລັດ ໂດຍສະເພາະຂອງກະຊວງ ແລະ ສູນ ຢ່າງເຂັ້ມງວດ, ແລະ ໃຫ້ຮັກສາໄດ້ມູນເຊື້ອອັນດີງາມຂອງໜ່ວຍພັກ ທີ່ສາມາດຍາດມາໄດ້ນາມມະຍົດ ໜ່ວຍພັກປອດໃສ ເຂັ້ມແຂງ ໜັກແໜ້ນ 5 ສະໄໝຊ້ອນ ນັບແຕ່ປີ 2016 ຮອດປີ 2020.

ຂຽນຂ່າວໂດຍ: ສູນອິນເຕີເນັດແຫ່ງຊາດ

 

 

ການລົງທະບຽນລະຫັດຊື່ເປັນພາສາລາວ ໄດ້ແລ້ວ