ຂ່າວໃໝ່

ກອງປະຊຸມ ປະກາດການສ້າງຕັ້ງ ແລະ ແຕ່ງຕັ້ງຄະນະໜ່ວຍພັກ ສູນອິນເຕີເນັດ ແຫ່ງຊາດ,ສູນສະກັດກັ້ນ ແລະ ແກ້ໄຂເຫດສຸກເສີນທາງຄອມພີວເຕີ ແລະ ພິທີຮັບສະມາຊິກພັກສໍາຮອງ.  

ໜ່ວຍ​ພັກສູນອິນເຕີເນັດ ແຫ່ງຊາດ (ສອຊ) ໄດ້​ເປີດກອງປະຊຸມ ປະກາດການສ້າງຕັ້ງ ແລະ ແຕ່ງຕັ້ງຄະນະໜ່ວຍພັກ ສູນອິນເຕີເນັດ ແຫ່ງຊາດ (ສອຊ), ສູນສະກັດກັ້ນ ແລະ ແກ້ໄຂເຫດສຸກເສີນທາງຄອມພີວເຕີ (ສກຄ ຫຼື ລາວເຊີດ – LaoCERT) ແລະ ພິທີຮັບສະມາຊິກພັກສໍາຮອງ ໃນຕອນບ່າຍ ຂອງ​ວັນ​ທີ 06 ທັນວາ 2017, ພາຍໃຕ້ການເປັນປະທານຂອງ ສະຫາຍ ແກ້ວວີສຸກ ໂສລະພົມ, ຄະນະພັກ ກະຊວງ ໄປສະນີ, ໂທລະຄົມມະນາຄົມ ແລະ ການສື່ສານ (ປທສ), ເລຂາໜ່ວຍພັກ ສອຊ, ໂດຍການເຂົ້າຮ່ວມຂອງ ຄະນະໜ່ວຍພັກ ສອຊ, ຕາງໜ້າຄະນະໜ່ວຍພັກ ກົມ/ສູນ ອ້ອມຂ້າງ ກະຊວງ ປທສ ແລະ ສະມາຊິກພັກ ຂອງ ທັງ​ສອງໜ່ວຍພັກ ​ເຂົ້າ​ຮ່ວມ​ຢ່າງ​ພ້ອມພຽງ.

ໃນກອງປະຊຸມ, ໄດ້ມີການປະກາດສ້າງຕັ້ງ ໜ່ວຍພັກ ສກຄ ໂດຍໄດ້ແຕ່ງຕັ້ງບົ່ງໂຕ ສະຫາຍ ຄຳຫຼ້າ ສຸນນາລັດ, ຫົວໜ້າ ສກຄ ເປັນເລຂາໜ່ວຍພັກ, ພ້ອມທັງແຕ່ງຕັ້ງ ຄະນະພັກ ສກຄ 02 ສະຫາຍ ​ແລະ ​ແຕ່ງ​ຕັ້ງ​ບົ່ງ​​ໂຕ​​ເອົາ ຄະນະ​ພັກ ສອຊ 01 ສະຫາຍ. ໃນພິທີ ສະຫາຍ ແກ້ວວີສຸກ ​ໂສລະພົມ ໄດ້ໂອ້ລົມ ແລະ ໃຫ້ຄຳໂອວາດ ທັງ 02 ໜ່ວຍພັກ, ໂດຍໄດ້ເນັ້ນໜັກ ການຊີ້ນໍາ-ນໍາພາ ພາຍໃນໜ່ວຍ ເພື່ອສ້າງໜ່ວຍພັກຕົນໃຫ້ກາຍເປັນ ໜ່ວຍພັກ ​ເຂັ້ມແຂງ-ຮູ້ນໍາພາຮອບດ້ານ, ​ໃຫ້ຍົກສູງດ້ານເນື້ອໃນ ແລະ ຄຸນນະພາບການດໍາເນີນຊີວິດການເມືອງ ເພື່ອຮັບປະກັນ 03 ລັກສະນະ ຄື: ລັກສະນະນໍາພາ, ສຶກສາອົບຮົມ ແລະ ລັກສະນະຕໍ່ສູ້.

ພ້ອມດຽວກັນນັ້ນ, ສະຫາຍ ກໍ່ໄດ້ໃຫ້ຄຳ​ໂອວາດ​ເຖິງສະມາຊິກພັກສຳຮອງໃໝ່ ໃຫ້ເອົາໃຈໃສ່ສຶກສາ ກົດລະບຽບພັກ ເປັນຕົ້ນແມ່ນ ສິດ ແລະ ໜ້າທີ່ ຂອງສະມາຊິກພັກ ໂດຍສະເພາະ​ແມ່ນ 05 ຫຼັກການ ແລະ 03 ທິດນໍາ. ​ກ່ອນໜ້ານີ້ ສອຊ ໄດ້ຈັດກອງປະຊຸມຮັບສະມາຊິກພັກສຳຮອງ ຈຳນວນ 06 ສະຫາຍ ໃນວັນທີ 10 ພະຈິກ 2017.