ໃນຕອນເຊົ້າຂອງ ວັນສຸກ ວັນທີ 24 ກຸມພາ 2017 ທີ່ຫ້ອງປະຊຸມໃຫຍ່ ກະຊວງ ໄປສະນີ, ໂທລະຄົມມະນາຄົມ ແລະ ການສື່ສານ (ປທສ), ໄດ້ມີພິທີມອບໃບຢັ້ງຢືນໜ່ວຍພັກເຂັ້ມແຂງ-ຮູ້ນໍາພາຮອບດ້ານ, ມອບບັດສະມາຊິກພັກສົມບູນ ຊຸດທີ່ 2, ມອບຮັບໃບຍ້ອງຍໍຜົນງານຮັບໃຊ້ກອງປະຊຸມອາຊຽນ ຄັ້ງທີ່ 28 ແລະ 29 ທີ່ ສປປ ລາວ ເປັນເຈົ້າພາບ ແລະ ພິທີມອບຮັບໃບຍ້ອງຍໍຜູ້ທີ່ມີຜົນງານດີເດັ່ນ ປະຈຳປີ 2016 ຂອງ ກະຊວງ ປທສ, ພາຍໃຕ້ການເປັນປະທານ ຂອງ ທ່ານ ປອ. ທັນສະໄໝ ກົມມະສິດ, ກຳມະການສູນກາງພັກ, ເລຂາພັກ, ລັດຖະມົນຕີ ກະຊວງ ປທສ, ໂດຍມີການເຂົ້າຮ່ວມຂອງ ທ່ານ ບຸນສະເຫຼີມໄຊ ເຄນນາວົງ, ຄະນະປະຈຳພັກ ກະຊວງ ປທສ, ຮອງລັດຖະມົນຕີ ກະຊວງ ປທສ, ຄະນະພັກກົມ/ທຽບເທົ່າ, ບັນດາຄະນະພັກ ແລະ ສະມາຊິກພັກ ອ້ອມຂ້າງ ກະຊວງ ປທສ ແລະ ປທສ ນະຄອນຫຼວງ ກໍ່ໄດ້ເຂົ້າຮ່ວມຢ່າງພ້ອມພຽງ.



ໃນຄັ້ງນີ້ ຄະນະພັກ ກະຊວງ ກໍ່ໄດ້ຮັບຮອງເອົາ ໜ່ວຍພັກສູນອິນເຕີເນັດ ແຫ່ງຊາດ, ໜ່ວຍພັກກົມຈັດຕັ້ງ, ໜ່ວຍພັກຫ້ອງການ, ແລະ ອີກ 07 ໜ່ວຍພັກ ທີ່ມາຈາກບັນດາໜ່ວຍ ຜູ້ໃຫ້ບໍລິການດ້ານໂທລະຄົມມະນາຄົມພາຍໃນ  ໄດ້ຮັບນາມມະຍົດເປັນ ໜ່ວຍພັກເຂັ້ມແຂງ-ຮູ້ນຳພາຮອບດ້ານ ປະຈຳປີ 2016.

ໃນນີ້ ສູນອິນເຕີເນັດ ແຫ່ງຊາດ ຍັງໄດ້ຮັບການປະດັບ ຫຼຽນໄຊແຮງງານ ຊັ້ນ II ຈາກຜົນສໍາເລັດໃນການປະກອບສ່ວນຮັບໃຊ້ ກອງປະຊຸມສຸດຍອດອາຊຽນ ຄັ້ງທີ 28 ແລະ 29 ທີ່ ສປປ ລາວ ເປັນເຈົ້າພາບ.