ຂ່າວໃໝ່

ໃນເວລາ 09:00 ນາທີ, ຂອງວັນທີ 15 ກໍລະກົດ 2014 ຢູ່ທີ່ ສູນອິນເຕີເນັດແຫ່ງຊາດ ໄດ້ຈັດກອງປະຊຸມເປີດກວ້າງທົ່ວສູນເພື່ອເຜີຍແຜ່ ກົດລະບຽບພາຍໃນຂອງກະຊວງໄປສະນີ ໂທລະຄົມມະນາຄົມ ແລະ ການສື່ສານ ພາຍໃຕ້ການເປັນປະທານໂດຍ ທ່ານ ແກ້ວວິສຸກ ໂສລະພົມ ຮັກສາການຫົວໜ້າສູນອິນເຕີເນັດແຫ່ງຊາດ, ເຊິ່ງມີຄະນະສູນ, ຄະນະພະແນກ ແລະ ວິຊາການຂອງ ສອຊ ເຂົ້າຮ່ວມຢ່າງພ້ອມພຽງ. ໃນກອງປະຊຸມ ທ່ານ ສີສັນ ປອງນະທີ ຫົວໜ້າພະແນກ ບໍລິຫານ-ຈັດຕັ້ງ ແລະ ການເງິນ ໄດ້ຂຶ້ນຜ່ານກົດລະບຽບພາຍໃນຂອງ ກະຊວງ ປທສ. ຫຼັງຈາກນັ້ນ ທ່ານ ຮັກສາການຫົວໜ້າສູນອິນເຕີເນັດແຫ່ງຊາດ ໄດ້ໃຫ້ກຽດໂອ້ລົມກັບພະນັກງານ ສອຊ ເພື່ອໃຫ້ເຫັນເຖິງຄວາມສຳຄັນຂອງກົດລະບຽບດັ່ງກ່າວ, ພ້ອມກັນນັ້ນທ່ານຍັງໄດ້ໂອ້ລົມເພີ່ມເຕີມກ່ຽວກັບທິດທາງ ແລະ ແຜນຍຸດທະສາດຂອງສູນກໍ່ຄື ກະຊວງ ປທສ ທີ່ພວມສຸມໃສ່ຈັດຕັ້ງປະຕິບັດໃນປະຈຸບັນເພື່ອໃຫ້ບັນລຸຜົນຕາມລະດັບຄາດໝາຍຂອງພັກ-ລັດ ທີ່ໄດ້ມອບໝາຍໃຫ້.