ຂ່າວໃໝ່

ບໍລິການຝາກເວບໄຊ້

ໃນວັນພຸດ ທີ 23 ພຶດສະພາ 2018, ທີ່ ຫ້ອງປະຊຸມໃຫຍ່ ສູນອິນເຕີເນັດ ແຫ່ງຊາດ (ສອຊ), ຄະນະຊາວໜຸ່ມຮາກຖານ ສູນອິນເຕີເນັດ ແຫ່ງຊາດ ໄດ້ເປີດກອງປະຊຸມໃຫຍ່ ຄັ້ງທີ II ຂຶ້ນ ໂດຍມີ ສະຫາຍ ວົງນ້ອຍ ສີວັນທອງ ຮອງເລຂາໜ່ວຍພັກ ສອຊ, ສະຫາຍ ພວງປະເສີດ ແກ້ວສຸວັນ ຮອງເລຂາຄະນະບໍລິຫານງານ ຊປປລ ກະຊວງ ປທສ, ພ້ອມດ້ວຍຕາງໜ້າຈາກ 3 ອົງການຈັດຕັ້ງ ອ້ອມຂ້າງ ສອຊ ເປັນຄະນະປະທານ, ມີຕາງໜ້າຈາກໜ່ວຍຊາວໜຸ່ມຮາກຖານອ້ອມຂ້າງ ກະຊວງ ປທສ ແລະ ສະມາຊິກຊາວໜຸ່ມ ສອຊ ເຂົ້າຮ່ວມຢ່າງພ້ອມພຽງ.


ຄະນະປະທານ ແລະ ຜູ້ເຂົ້າຮ່ວມກອງປະຊຸມ ຖ່າຍຮູບລວມ


ກອງປະຊຸມໃຫຍ່ ຄັ້ງທີ II ຂອງ ຄະນະຊາວໜຸ່ມຮາກຖານ ສູນອິນເຕີເນັດ ແຫ່ງຊາດ

ໃນກອງປະຊຸມ, ສະຫາຍ ສີ​ສັນ ປອງ​ນະ​ທີ , ຮອງ​ເລ​ຂາ​ຄະ​ນະ​ບໍ​ລິ​ຫານ​ງານຊາວ​ໜຸ່ມ​ກະ​ຊວງ ປ​ທ​ສ , ອະ​ດີດ ເລຂາຄະນະຊາວໜຸ່ມຮາກຖານ ສອ​ຊ ໄດ້ຂຶ້ນຜ່ານບົດລາຍງານການເມືອງ ໃນໄລຍະ 5 ປີ ຜ່ານມາ (2013-2018) ພ້ອມທັງ ໄດ້ວາງທິດທາງແຜນການໃນການຈັດຕັ້ງປະຕິບັດ ຂອງ ຄະນະຊາວໜຸ່ມຮາກຖານ ສອຊ ໃນສະໄໝຕໍ່ໜ້າ (2018-2022), ເຊິ່ງ​ບົດລາຍງານການເມືອງໄດ້ຕີລາຄາສູງເຖິງຜົນງານ ແລະ ໄຊຊະນະຂອງການຈັດຕັ້ງປະຕິບັດແນວທາງ ມະຕິຂອງກອງ​ປະ​ຊຸມ​ໃຫ​ຍ່​ຜູ້​ແທນ​ຊາວ​ໜຸ່ມ​ລາວ​ທົ່ວ​ປະ​ເທດ​ຄັ້ງ​ທີ 7 ໃນ​ຊຸມປີທີ່ຜ່ານມາ. ພ້ອມກັນນັ້ນ, ກໍ່ໄດ້ຍົກໃຫ້​ເຫັນສະ​ພາບ​ໂດຍ​ລວມ​ທີ່​ມີ​ທັງ ດ້ານດີ, ດ້ານອ່ອນ ແລະ ຂໍ້ຄົງຄ້າງ ເຊິ່ງຕ້ອງໄດ້ສືບຕໍ່ປັບປຸງແກ້ໄຂໃນຕໍ່ໜ້າ, ຊອກໃຫ້ເຫັນສາເຫດຕ່າງໆ ແລະ ສະຫຼຸບສັງລວມຖອດຖອນເປັນບົດຮຽນການນຳພາຂອງຕົນ. ພ້ອມນັ້ນ ຍັງໄດ້ຜ່ານບົດສໍາຫຼວດການນຳພາ ຂອງ ຄະນະບໍລິຫານງານ ຊາວໜຸ່ມຮາກຖານ ສອຊ ໂດຍ ສະຫາຍ ນາງ ສາລິກາ ວົງຄໍາມະນີ, ຮອງເລຂາ ຄະນະບໍລິຫານງານ ຊາວໜຸ່ມຮາກຖານ ສອຊ.


ອະດີດຄະນະບໍລິຫານງານຊາວໜຸ່ມຮາກຖານ ສອຊ ກ່າວຄຳອຳລາ


ຄະນະບໍລິຫານງານຊາວໜຸ່ມຮາກຖານ ສອຊ ຊຸດໃໝ່ ແລະ ອະດີດຄະນະບໍລິຫານງານຊາວໜຸ່ມຮາກຖານ ສອຊ

ກອງປະຊຸມ ໄດ້ດໍາເນີນການເລືອກຕັ້ງ ຄະນະບໍລິຫານງານ ຊາວໜຸ່ມຮາກຖານ ສອຊ ຊຸດໃໝ່, ໂດຍໄດ້ເລືອກເອົາ 5 ສະຫາຍ ຈາກ 7 ສະຫາຍ. ກອງປະຊຸມຮອບປະຖົມມະລຶກ ໄດ້ແຕ່ງຕັ້ງ ເລຂາ, ຮອງເລຂາ, ປະທານກວດກາ ແລະ ກໍາມະການ ດັ່ງນີ້:

  1. ສະຫາຍ ໄຊສົມຫວັງ ສຸວັນນະວົງ              ເປັນເລຂາ
  2. ສະຫາຍ ນ ສາລິກາ ວົງຄໍາມະນີ               ເປັນຮອງເລຂາ ທັງເປັນ ປະທານກວດກາ
  3. ສະຫາຍ ສຸລິສັກ ພົມມະແສນ                 ເປັນກໍາມະການ
  4. ສະຫາຍ ວົງສີສຸກ ທໍາມະວົງ           ເປັນກໍາມະການ
  5. ສະຫາຍ ນ ສຸວັນນີ ໄຊສົງຄາມ                ເປັນກໍາມະການ


ຄະນະບໍລິຫານງານຊາວໜຸ່ມຮາກຖານ ສອຊ ຊຸດໃໝ່

ສະຫາຍ ພວງປະເສີດ ແກ້ວສຸວັນ ໄດ້ໂອ້ລົມນຳ ຄະນະບໍລິຫານງານ ຊາວໜຸ່ມຮາກຖານ ສອຊ ຊຸດໃໝ່ ທີ່ໄດ້ຮັບຄັດເລືອກ ແລະ ຖືກແຕ່ງຕັ້ງ, ພ້ອມທັງໄດ້ໃຫ້ຄຳໂອວາດ ໂດຍເນັ້ນໃສ່ບາງຈຸດສໍາຄັນ ດັ່ງນີ້:

   1. ໃຫ້ເອົາໃຈໃສ່ສຶກສາອົບຮົມແນວຄິດການເມືອງແນວຄິດ, ປູກຈິດສໍານຶກທີ່ດີໃຫ້ກັບຊາວໜຸ່ມ-ໄວໜຸ່ມ ໃຫ້ມີນໍາໃຈຮັກຊາດ
        ຮັກບ້ານເກີດເມືອງນອນ ແລະ ຮັກທ່ານຜູ້ນໍາ, ສືບທອດມູນເຊື້ອອົງອາດກ້າແກ່ນຂອງຊາວໜຸ່ມລາວລຸ້ນກ່ອນ, ມູນເຊື້ອ
        ວັດທະນະທໍາທີ່ດີງາມຂອງຊາດ, ຂອງເຜົ່າ, ເສີມຂະຫຍາຍມູນເຊື້ອຄວາມດຸໝັ່ນຂະຫຍັນພຽນ, ມີນໍ້າໃຈຮັກຊາດຮັກການ
         ອອກແຮງງານ, ປະຢັດມັດທະຍັດ, ມີແບບແຜນດໍາລົງຊີວິດທີ່ປອດໃສຂາວສະອາດ ສ້າງແນວຄິດເພິ່ງຕົນເອງກຸ້ມຕົນເອງ
        ສ້າງຄວາມເຂັ້ມແຂງດ້ວຍຕົນເອງເທື່ອລະກ້າວ.

  1. ເອົາໃຈໃສ່ຄົ້ນຄ້ວາ, ຮໍ່າຮຽນກໍາແໜ້ນແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ມະຕິຂອງພັກ, ຂອງຊາວໜຸ່ມ ໃຫ້ເຂົ້າໃຈຖືກຕ້ອງເລິກເຊິ່ງ ເປັນເຈົ້າການໂຄສະນາອະທິບາຍ, ເຜີຍແຜ່ໃຫ້ຊາວໜຸ່ມໃນຄວາມຮັບຜິດຊອບຂອງຕົນຮັບຮູ້ເຂົ້າໃຈເປັນເອກະພາບ; ພ້ອມກັນນັ້ນກໍເປັນເຈົ້າການຄົ້ນຄ້ວາ, ປຶກສາຫາລື, ຈັດຕັ້ງຜັນຂະຫຍາຍອອກເປັນແຜນງານ, ໂຄງການ, ກິດຈະກໍາລະອຽດ, ແບ່ງງານ, ແບ່ງຄວາມຮັບຜິດຊອບໃຫ້ກັນຈະແຈ້ງ, ຈັດຕັ້ງປະຕິບັດໃຫ້ດີມີຜົນສໍາເລັດ, ພ້ອມນັ້ນກໍຊຸກຍູ້ກວດກາຕີລາຄາ ແລະ ສະຫຼຸບຖອດຖອນບົດຮຽນແຕ່ລະໄລຍະ.
  2. ເອົາໃຈໃສ່ສືບຕໍ່ປັບປຸງການຈັດຕັ້ງຊາວໜຸ່ມໃຫ້ເຕີບໃຫ່ຍ, ເຂັ້ມແຂງໜັກແໜ້ນດ້ານການເມືອງແນວຄິດ, ການຈັດຕັ້ງ ແລະ ແບບແຜນວິທີເຮັດວຽກວິທີນໍາພາຕົ້ນຕໍ ແມ່ນສຸມໃສ່ໜ່ວຍຊາວໜຸ່ມຮາກຖານ, ພະແນກ, ຂະແໜງການ ແລະ ໂຮງຮຽນ ໃຫ້ມີຄວາມສາມາດພຽງພໍໃນການຈັດຕັ້ງນໍາພາ, ສຶກສາອົບຮົມ ແລະ ດຶງດູດ, ຊວນເຊື່ອ ເຕົ້າໂຮມຊາວໜຸ່ມ ຢູ່ພາຍໃຕ້ການນໍາພາຂອງພັກ, ການຄຸ້ມຄອງຂອງລັດ;
  3. ສືບຕໍ່ເປີດຂະບວນການດ້ານຕ່າງໆໂດຍສອດຄ່ອງກັບຂໍ້ແຂ່ງຂັນ 4 ບຸກ ສອດຫ້ອຍກັບຂະບວນການພັດທະນາເສດຖະກິດສັງຄົມ, ຂະບວນການປະຕິບັດໜ້າທີ່ວິຊາສະເພາະ, ຂະບວນການສອນດີ ຮຽນເກັ່ງ, ຂະບວນແຂ່ງຂັນຫົວຄິດປະດິດສ້າງ, ຂະບວນການປ້ອງກັນຊາດປ້ອງກັນຄວາມສະງົບ, ແກ້ໄຂສິ່ງຫຍໍ້ທໍ້ໃນໝູ່ຊາວໜຸ່ມ-ເຍົາວະຊົນ, ການແກ້ໄຂຄວາມທຸກຍາກ ແລະ ອື່ນໆ, ປະກອບສ່ວນເຂົ້າຮ່ວມໃນຂະບວນການຕ່າງໆທີ່ຄະນະພັກ, ອໍານາດການປົກຄອງຈັດຕັ້ງຂຶ້ນ.
  4. ຢູ່ພາຍໃຕ້ການຊີ້ນໍາ ແລະ ນໍາພາໂດຍກົງຂອງຄະນະພັກ, ຮູ້ຈັກຍາດແຍ່ງຄໍາເຫັນຂອງຄະນະພັກ, ຄະນະນໍາຂອງຕົນ, ມີຫົວຄິດປະດິດສ້າງໃນການປະຕິບັດໜ້າທີ່, ຮູ້ຈັກຜັນຂະຫຍາຍມະຕິ, ຄໍາສັ່ງ ກໍຄືແຜນການຂອງຄະນະນໍາ ອອກມາ ເປັນແຜນການເຄື່ອນໄຫວຂອງໜ່ວຍຊາວໜຸ່ມ.
  5. ເອົາໃຈໃສ່ພົວພັນ, ຮ່ວມມືກັບອົງການຈັດຕັ້ງພາຄີ, ການຈັດຕັ້ງມະຫາຊົນອື່ນ, ນັບທັງຕ່າງປະເທດ ແລະ ອົງການຈັດຕັ້ງສາກົນ ເພື່ອຍາດແຍ່ງຄໍາຄິດຄໍາເຫັນ ບົດຮຽນ, ປະສົບການໃນວຽກງານ, ຍາດແຍ່ງການຊ່ວຍເຫຼືອດ້ານທຶນຮອນເພື່ອມາພັດທະນາຊາວໜຸ່ມ.

ຄະນະບໍລິຫານງານຊາວໜຸ່ມຮາກຖານ ສອຊ ຊຸດໃໝ່ ໄດ້ກ່າວຮັບຄຳໂອວາດ ແລະ ປະຕິຍານຕົນຕໍ່ໜ້າທີ່ອັນມີກຽດສະຫງ່າ ທີ່ໄດ້ຮັບມອບໝາຍ ແລະ ໂດຍໄດ້ປະຕິຍານວ່າຈະຕັ້ງໜ້າຝຶກຝົນຫຼໍ່ຫຼອມ ໃຫ້ມີຄວາມພ້ອມທາງດ້ານແບບແຜນການນໍາພາ, ຈະເສີມຂະຫຍາຍທາດແທ້ ແລະ ມູນເຊື້ອຂອງຊາວໜຸ່ມ ປະຊາຊົນປະຕິວັດລາວ ເຂົ້າໃນຂະບວນການຈັດຕັ້ງປະຕິບັດວຽກງານຕົວຈິງ, ຈະຕັ້ງໜ້າຮັບຜິດຊອບທຸກຂົງເຂດວຽກງານຕາມຂອບເຂດສິດ ແລະ ພັນທະຂອງຊາວໜຸ່ມ ດ້ວຍຄວາມຈົ່ງຮັກພັກດີ ແລະ ດ້ວຍຄວາມຮັບຜິດຊອບສູງ, ຈະຕັ້ງໜ້າປະກອບສ່ວນ ທາງດ້ານສະຕິປັນຍາ, ເຫື່ອແຮງ ເຂົ້າໃນການຈັດຕັ້ງເຄື່ອນໄຫວວຽກງານ ຕາມພາລະບົດບາດ, ສິດໜ້າທີ່ຂອງຊາວໜຸ່ມ ໃຫ້ສຸດຄວາມສາມາດ ເພື່ອໃຫ້ສົມກັບຄວາມໄວ້ເນື້ອເຊື່ອໃຈຂອງ ສະມາຊິກຊາວໜຸ່ມ ທີ່ໄດ້ເລືອກມາຮັບໜ້າທີ່ ທີ່ມີກຽດສະຫງ່າດັ່ງກ່າວ.


ຄະນະບໍລິຫານງານຊາວໜຸ່ມຮາກຖານ ສອຊ ຊຸດໃໝ່ ກ່າວຮັບຄຳໂອວາດກອງປະຊຸມ 

ກອງປະຊຸມ ໄດ້ດໍາເນີນໄປດ້ວຍຜົນສຳເລັດອັນຈົບງາມ ແລະ  ສິ້ນສຸດລົງໃນເວລາ 12:00 ຂອງມື້ດຽວກັນ.