ຂ່າວໃໝ່

ບໍລິການຝາກເວບໄຊ້

 

 

ສູນອິນເຕີເນັດ ແຫ່ງຊາດ ລົງເຜີຍແຜ່ພາລະບົດບາດ ແລະ ວຽກງານຂອງສູນ ໃຫ້ແກ່

ພະແນກ ປທສ ນະຄອນຫຼວງ, ແຂວງ ພາກກາງ ແລະ ພາກໃຕ້

ໃນວັນທີ 18 ທັນວາ 2018, ໄດ້ມີພິທີເປີດ ຊຸດຝຶກອົບຮົມ ເຜີຍແຜ່ບັນດາວຽກງານຂອງ ສູນອິນເຕີເນັດ ແຫ່ງຊາດ (ສອຊ), ທີ່ ພະແນກ ໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ແຂວງຈຳປາສັກ, ນະຄອນປາກເຊ, ໂດຍການເປັນປະທານຮ່ວມຂອງ ທ່ານ ວົງນ້ອຍ ສີວັນທອງ, ຮອງຫົວໜ້າ ສູນອິນເຕີເນັດ ແຫ່ງຊາດ, ແລະ ທ່ານ ກອງແກ້ວ ປັນຍາພອນ , ຫົວໜ້າພະແນກ ປທສ ແຂວງ ຈຳປາສັກ. ພ້ອມນີ້ ກໍ່ຍັງມີບັນດາ ຫົວໜ້າ-ຮອງຫົວໜ້າ ພະແນກ ແລະ ວິຊາການ ຈາກ ພະແນກ ປທສ ນະຄອນຫຼວງ, ແຂວງ ພາກກາງ ແລະ ພາກໃຕ້ ຈຳນວນ 29 ທ່ານ ເຂົ້າຮ່ວມໃນຊຸດຝຶກອົບຮົມຢ່າງພ້ອມພຽງ.

 

ໂດຍໄດ້ຮັບການອະນຸມັດເຫັນດີຈາກກະຊວງ ປທສ, ສອຊ ໄດ້ແຕ່ງຕັ້ງຄະນະຮັບຜິດຊອບ ເຊິ່ງປະກອບດ້ວຍ ຫົວໜ້າ-ຮອງຫົວໜ້າ ພະແນກ ແລະ ວິຊາການ ລົງເຜີຍແຜ່-ນຳສະເໜີກ່ຽວກັບພາລະບົດບາດ ແລະ ວຽກງານທີ່ສູນໄດ້ຜັນຂະຫຍາຍຈາກ ວິໄສທັດ, ແຜນຍຸດທະສາດ ແລະ ແຜນພັດທະນາ ຂອງກະຊວງ ປທສ ເຂົ້າໃນວຽກງານຫຼັກອັນເປັນຕົ້ນຕໍຂອງສູນຮັບຜິດຊອບ ເພື່ອໃຫ້ຜູ້ເຂົ້າຮ່ວມຮັບຮູ້ ແລະ ເຂົ້າໃຈ, ໂດຍສະເພາະ ວຽກງານການລວມສູນການສື່ນສານ-ກວດກາການນຳໃຊ້ອິນເຕີເນັດ, ວຽກງານຄຸ້ມຄອງລະຫັດຊື່ອິນເຕີເນັດແຫ່ງຊາດ .LA, ວຽກງານ ສູນຂໍ້ມູນແຫ່ງຊາດ ແລະ ວຽກງານ ການສ້າງສູນອອກໃບຮັບຮອງທາງເອເລັກໂຕຣນິກແຫ່ງຊາດ, ແລະ ວຽກງານອື່ນໆ ຕາມການມອບໝາຍຂອງກະຊວງ ປທສ ແລະ ລັດຖະບານ.

ຊຸດຝຶກອົບຮົມ ຈະດຳເນີນໄປເປັນເວລາ 3 ວັນ ແລະ ຈະສຳເລັດໃນວັນທີ 20 ທັນວາ 2018.