ຂ່າວໃໝ່

ບໍລິການຝາກເວບໄຊ້

  • ສູນອິນເຕີເນັດແຫ່ງຊາດ (ສອຊ), ກະຊວງ ໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ສໍາເລັດການຈັດຊຸດຝຶກອົບຮົມໃນຫົວຂໍ້: “ການສ້າງອົງກອນແຫ່ງການຮຽນຮູ້ ເພື່ອພັດທະນາຄຸນນະພາບໃນການຄຸ້ມຄອງ ແລະ ການບໍລິຫານອົງກອນ ໄລຍະ ທີ 1” ໃນລະຫວ່າງວັນທີ 17-19, 24-27 ແລະ 30-31 ກໍລະກົດ 2018 (ກໍານົດ 9 ວັນ) ພິທີເປີດ-ປິດ ການຝຶກອົບຮົມຄັ້ງນີ້ ໃຫ້ກຽດເຂົ້າຮ່ວມເປັນປະທານໂດຍ ທ່ານ ມີນາໄຊ ພິລາວົງ, ຮອງຫົວໜ້າ ສູນອິນເຕີເນັດ ແຫ່ງຊາດ, ໂດຍມີສໍາມະນາກອນຕາງໜ້າຈາກ ບັນດາກົມອ້ອມຂ້າງ ກະຊວງ ປທສ ເຂົ້າຮ່ວມທັງໝົດ 35 ທ່ານ, ໃຫ້ກຽດຂຶ້້ນບັນຍາຍຫົວຂໍ້ການຝຶກອົບຮົມໂດຍທ່ານ ຮສ. ປອ. ບຸນ​ລ້ວນ​ ດ້ວງ​ເງິນ, ຜູ້ອຳນວຍການສະ​ຖາ​ບັນ​ພັດທະນາ​ຊັບພະຍາກອນ​ມະນຸດ ລາວ-ຍີ່ປຸ່ນ, ມະຫາວິທະຍາ​ໄລ​ແຫ່ງ​ຊາດ ແລະ ທ່ານ ອ.ຈ ນາງ ສຸດຖະໜອມ ພິມສະຫວັດ ຮອງຜູ້ອຳນວຍການສະ​ຖາ​ບັນ​ພັດທະນາ​ຊັບພະຍາກອນ​ມະນຸດ ລາວ-ຍີ່ປຸ່ນ, ມະຫາວິທະຍາ​ໄລ​ແຫ່ງ​ຊາດ.

  • ການເປີດຝຶກອົບຮົມຄັ້ງນີ້ແມ່ນເຕັມໄປດ້ວຍບັນຍາກາດທີ່ຟົດຟື້ນ, ເນື່ອງຈາກບັນດານັກສຳມະນາກອນ ໄດ້ໃຫ້ຄວາມເອົາໃຈໃສ່ ຕໍ່ການຮັບຟັງການບັນຍາຍ, ແລກປ່ຽນຄຳຄິດເຫັນ ແລະ ເຮັດກິດຈະກຳເປັນກຸ່ມ ຕາມການໂຈດທີ່ ວິທະຍາກອນ ຕັ້ງຂຶ້ນ, ຊຶ່ງເປັນການຝຶກອົບຮົມກ່ຽວກັບ ການບໍລິຫານຄວາມຮູ້ໃນອົງກອນ, ໃຫ້ແຕ່ລະຄົນມີສ່ວນຮ່ວມໃນການແບ່ງປັນຄວາມຮູ້ ແລະ ປະສົບການຂອງຕົນ ເພື່ອເອົາມາໝູນໃຊ້ໃນການພັດທະນາອົງກອນ, ພ້ອມທັງຮຽນຮູ້ທັກສະໃນການເປັນຜູ້ນໍາ, ການບໍລິຫານເວລາ ເພື່ອແກ້ໄຂບັນດາໜ້າວຽກທີ່ຖືກມອບໝາຍໃຫ້ທັນຕາມກໍານົດ, ຈຸດປະສົງ ແລະ ຖືກຕາມຄາດໝາຍທີ່ໄດ້ວາງໄວ້.
  • ມາຮອດຕອນບ່າຍ ຂອງວັນທີ 1 ສິງຫາ 2018 ແມ່ນໄດ້ສໍາເລັດ ຊຸດຝຶກອົບຮົມດັ່ງກ່າວ ແລະ ໄດ້ມີພິທີ ມອບໃບຢັ້ງຢືນ ແລະ ປິດຊຸດຝຶກອົບຮົມດັ່ງກ່າວໂດຍທ່ານ ມີນາໄຊ ພິລາວົງ ໄດ້ກ່າວຊົມເຊີຍ ມາຍັງ ອາຈານ, ນັກສຳມະນາກອນ ທຸກທ່ານ ທີ່ເອົາໃຈໃສ່ ຕັ້ງໜ້າ ຄົ້ນຄວ້າ ອອກຄວາມຄິດເຫັນ, ເຮັດໃຫ້ຊຸດຝຶກອົບຮົມຄັ້ງນີ້ ເຕັມໄປດ້ວຍບັນຍາກາດ ທີ່ຟົດຟື້ນ ແລະ ໄດ້ເນັ້ນໃຫ້ນັກສໍາມະນາກອນທັງໝົດ ເອົາໃຈໃສ່ຕໍ່ການນໍາເອົາບົດຮຽນທີ່ໄດ້ຈາກການຟັງບັນຍາຍ, ແລກປ່ຽນຄຳຄິດເຫັນ ແລະ ເຮັດກິດຈະກຳຕ່າງໆ ໃນການຝຶກອົບຮົມຄັ້ງນີ້ ມາຈັດຕັ້ງຜັນຂະຫຍາຍເຂົ້າໃນວຽກງານ ຂະແໜງຂອງຕົນໃຫ້ມີປະສິດຕິພາບ ແລະ ປະສິດທິຜົນສູງສຸດ.
  • ສູນອິນເຕີເນັດ ແຫ່ງຊາດ ຈະໄດ້ສືບຕໍ່ຮ່ວມກັບ ສະຖາບັນສະ​ຖາ​ບັນ​ພັດທະນາ​ຊັບພະຍາກອນ​ມະນຸດ ລາວ-ຍີ່ປຸ່ນ, ມະຫາວິທະຍາ​ໄລ​ແຫ່ງ​ຊາດ ເພື່ອຈັດຊຸດຝຶກອົບຮົມໃນຫົວຂໍ້: “ການສ້າງອົງກອນແຫ່ງການຮຽນຮູ້ ເພື່ອພັດທະນາຄຸນນະພາບໃນການຄຸ້ມຄອງ ແລະ ການບໍລິຫານອົງກອນ ໄລຍະ ທີ 2” ໃນທ້າຍເດືອນ ສິງຫາ 2018 ຕໍ່ໄປ.